藍色生死戀        回自講目錄                                               

      韓劇近來風頭甚勁，可惜我好鄉里，而家都係第一次睇嫁咋。呢齣戲我睇得好痛苦，唔係俾劇情感染而有所代入，而係我好唔想睇落去，但老婆就幾大都霸住個電視，連入廚房厠所都唔準人哋轉台，要當收音機咁聽。好衰唔衰，我個電腦又近電視喎，咁咪要戴住耳筒聽CD囉。歷年嚟啲反智電視劇都係咁騷擾我，令我要成日聽CD，聽完又聽，而家我嗰幾百隻CD都聽到會彈會唱嘞。

      點解我咁唔鍾意睇《藍色生死戀》呢？就因為佢好噚氣，好鬼煩，橋段又好老套。啲劇中人既口頭禪就係“我係真心嫁”。最慘就係啲人成日喊，男又喊女又喊，老又喊嫰又喊，個個都係喊包。你哋諗吓，我放工返嚟，食飯，但佢哋晚晚對住我喊喎，就算我唔信邪都知道就嚟行衰運啦！仲有，嗰兩個男主角都唔知係咪男人嚟既，除咗郁啲都喊之外，為人處事好婆媽，好拖泥帶水，好閃縮好反覆，咁既人好得人驚嫁。死啦，呢齣戲連禮拜六同日晚都做埋。好彩既係今晚大結局，聽晚冇啦掛！

       但我啱啱聽清楚呢齣戲叫《藍色生死戀一》，點解有個“一”字既？有一咪即係有二？有三... ...？

       咁我要準備定拎個紅藍袋返大陸買多啲CD返嚟至得嘞。

                                                                                                                                          不白