男人，剪你丫嗱！ 筍
今晨七時，一名中國藉廿二歲男子沿佐敦道步行回家期間，突遭一名手持利器女子襲擊，混亂間男子飄飄長髮及尾指三吋長指甲遭削去，無需送院。事後該名女子逃去無蹤，據稱此女子經常出沒於香港九龍新界及離島一帶，以長髮或留有長指甲男性為襲擊目標，警方現正通緝該名女子歸案．．．．．．
香港男人唔知從幾時開始興留長頭髮，如果响條街度見到個有飄逸似瀑布長髮嘅唔好以為係靚女，分分鐘擰轉面係一個彪形大漢，滿瞼鬚根果隻；有啲長髮男人鍾意落好多gel去gel頭，一餅嘢咁好恐怖；又或者可能係好耐冇洗頭啲頭油積哂响度，有時搭車聞到都想嘔；相反有啲長髮男人就好好心機打理把頭髮，雖然比起一頭臭髮嘅男人好好多，但都係死罪一條，對於一個長頭髮女人來講，有咩難頂得過男友頭髮長過自己，後面睇似女人過自己，做hair treatment多過自己，有啲仲做埋負離子或紮辮仔添．．．真係撞鬼！
不過男人留長髮都唔係最難頂，最恐怖係留長尾指甲嘅男人，但偏偏又真係好多男人擁有一至三吋長嘅尾指指甲，聽講佢哋既指甲有好多用途，不過主要係用來挖耳仔，長長指甲藏住灰色污垢，真係嚇死人！筆者就响地鐵見過一個男人右手尾指挖耳，左手尾指挖鼻，一心二用兼臉露enjoy神情，嗚呼哀哉！
頭髮同指甲，留長是但一樣都咁恐怖，如果有個男人兩樣都有，真係人間極品！唔剪唔得呀！