早年曾在黃埔港工作。有次想幫襯一公廁，那公廁所在是一間山東人的建築公司範圍。其實那廁所也不算太污糟，但我入內一分鐘不夠就要飛奔突圍出來，原因是那股蒜頭氣味攻得我眼鼻標水。我問過其他同事，他們也說不能在那廁內逗留。我知道我不適宜去山東旅行了，廁內的勁味，是山東人吃大蒜的“後遺症”。這廁所附近一定沒有吸血僵屍。幾十年來我未遇過另一間比它更"有味"的。
我也曾在大坑東的廉租屋居住過。我用廁所都盡可能乘巴士去遠D，雖然本區的廁所就在十公尺之內。點解捨近圖遠？就因為我冇咁多隻手可用。我數過0勒，入呢間近0既廁所要用四隻手以上。第一隻手係用以扶著墻壁，因為地面滑潺潺，分分鐘跣到隻銀錠咁；第二第三隻手用以揪高褲腳，以免積水彈濕；第四隻手掩鼻；第五隻手擔遮，因為天花嚴重漏水。唔使問，樓上同一位置肯定都係廁所，所以滴下來0既水係乜0野成份，睇怕都不用化驗了吧？第六隻手，用以拉褲鏈；如果抽煙就要用第七隻手，不抽了，但也要六隻手呀！
報紙上曾發表過一份調查報告，話全港最污糟的公廁係茶果嶺卸貨區內的那個。報告出了半年後，我有幸去過幫襯。但感味道也不太濃，廁也不全塞，只係地上所見有泛濫過的痕蹟，尚餘半吋漬水，應是“漸漸退潮”。我自恃對爬山鞋係新買0既，有成一吋厚，於是就當水鞋咁行入去，完事後也不覺有甚麼異樣，但之後成個禮拜都覺得腳板和腳指罅都好似有D粘粘滑滑咁，唔係咁舒服。我開頭尚以為對鞋焗，致令有點腳汗，直至有日爛屍得閒除0左鞋反轉來睇下，先見到,原來鞋底穿了個窿，咁我去卸貨區公廁踐踏黃白物之時，豈不是俾對新鞋出賣0左？！我用紅威寶加戈士的洗腳，洗0左三個月都仲好似未洗得乾淨！
但上述三間比起呢第四間又顯得全無新意了！有次在蝴蝶灣，我取0左商戶專用的鎖匙去開商戶專用的廁所門，這廁所內由地至頂都舖滿0左白瓷磚，照計易於打理，但講出0黎嚇親人：全間廁內由地上至四面墻壁，甚至天花，全都貼上了立體米田共！偶一不慎，您可一身一頭都領0野！
而呢四間巿區污廁，比起以前鄉間0既“廁王”又是小巫見大巫。我見識過幾間那樣的廁王：當您入內時，廁內還是寂靜得驚人，只有炎夏0既熱氣焗得屎尿中人欲嘔；跟著您會見到一大堆一大堆白色的糞蛆正在埋頭埋腦享受著大餐，而那些蟲蟲一見到有貴客蒞臨，立即散開來歡迎您，場面實在壯觀，仲勁過賓墟。十條八條小蟲蠕動起來，係冇可能聽得到其聲音0既，但過千萬條一齊來找您呢，咁就唔同LU，周圍都聽得到沙沙聲，不絕於耳，真係而家講起都毛骨聳然。糞蛆雖然行動緩慢，但一分鐘之內，總會有一條以上爬上您的腳背。所以男人小便時，就最好一邊小便一邊四處移動以作躲避，好像打游擊戰一樣，但大便就不敢了，我寧愿去外面0既草叢。您想想，如果俾佢0地爬上0左腳背，跟住就會上埋您條褲管，然後礸入... …
三毛在一篇文章裏盛讚過日本人的廁所文化，我則認為中國人亦很講究此點，但係只限於注重家中0既。中國人有錢之後就將家中0既廁所整到美輪美奐，鑲金鍍銀，外人入去洗手弄濕了少少地磚也不高興，而出到外面就判若兩人。呢D就關乎公民教育、公德心。

 回自講目錄