名女人

        (呵呵,我再唔寫番一篇半篇就真係名符其實最懶o既板主o勒)
       上流社會o既醜事,絕對唔會比中流下流社會少,呢個一早係公開o既秘密o黎,我都無乜好講。至於o個o的什麼名女人同老公人前恩愛,背後就各自偷食,又或者o的有錢佬有幾個錢就包起走馬燈咁多o既女星等等醜事,我都唔打算講o勒。我想講o既係一個我好不以為然o既名女人-章小蕙。
        前幾日,我打開本方向周刊,漫無目的咁揭下揭下,就揭到去ball場版,見到o個個已經破o左產既章小蕙,重著到成身身光頸靚咁去ball。我不嬲都對佢幾反感,咪睇下佢會有乜野「偉論」囉,果然o丫,佢又o係度發表佢o既「窮家女」理論:「我o的LV袋呀,銀版絕版袋呀,係舖頭俾我妝身o既零用錢,我要做PR見客,呢o的唔少得;我入名店都係為做research咋!我只不過係一個身光頸靚o既窮家女。」我當堂真係無說話好講,好o野!
        章小蕙小姐嘛,不嬲都出名在三樣o野:靚女,鐘意用名牌(相信大家都對於佢o個句:「飯可以唔食,衫唔可以唔買!」重記憶猶新o卦),重有埋親佢o個度o既男人都冇乜好下場,不過我相信都應該同佢鐘意用名牌有關。我都唔係好明,佢明明已經破o左產o架啦,都重可以咁樣大搖大擺懶得意,計我話,有關機構應該咁做:
        一.申請禁制令,叫佢o係傳媒面前少o的出現-你知啦,成日咁樣俾傳媒煲下,俾其他人見到破o左產都重咁歎,咁o的銀行呀,信用咭呀真係唔慌唔大災難啦。
        二.就算真係有職業需要,都唔該佢,一放工就好除番o的名牌落o黎,費事佢著得重靚過冇破產o既人,係咪?
我相信有關機構一咁做,唔單止章小姐無聲出,o的申請破產人數都可以少好多。