激氣
我雖然係0大陸出生，但都係喺香港生活咗好長時間，所以我每聽到大陸啲親友彈啲香港人弱智，我心中實在有啲唔係咁好受，假假哋我都算係大半個香人丫。但好多時我又冇得駁佢哋喎，事實又係咁丫嘛。
好似尋晚喺『百萬富翁』度，香港人又衰一鑊嘞。我一撳著個電視，畫面上已經做緊『百萬富翁』，啟泰問緊一個讀緊電腦0既學生：“細胞最外層係乜？”學生已用了五十五十，得番“細胞壁”同“細胞膜”。拿，我 真係都一啲都唔記得0架，但照推理，梗係細胞壁啦。點知呢位咁大個0既男學生，唔識唔單止，仲要打電話問班同學。最慘就係嗰班同學唔知係咪大整蠱，齊齊答話係細胞膜喎！我喺電視機前狂叫佢哋更正，佢哋梗係聽唔到啦！結果咪衰咗囉。唉真丟香港人架！雖然佢哋學0既係電腦0者，但凡事都要講邏輯、講執生0架嘛，唔係第時點喺社會度立足呀？老師老豆冇可能成世都喺佢身邊0架！好多嘢最外層都叫壁啦。你話間屋最外層係乜？佢會唔會答係綿胎蚊帳而唔係墻壁呢？咁人身最外層係皮毛定係橫隔膜？睇怕唔使讀過醫科至識丫嘛。唉，讀咁多書，真係讀屎片！
今晚又係，問亞摩尼亞係乜氣體，“氨”、“氯”、“氮”、“氧”？後三者大家都應略有所“聞”，邊有咁大陣味啫，咁即係氨啦！嗰個要立心取一百萬，咁大口氣0既男人結果選咗“氮”。不過呢題我唔怪佢，對佢嚟講係深咗少少。
而出問題嗰啲人又係好打有限，問埋啲“黎明第一首歌係乜”、“某女星原來姓乜”、“某女星第一個老公又姓乜”咁呢啲冇益冇建設性0既題目。咦，好似第三題未出過喎… …