勿以公眾利益為籌碼

o尋日,發生o左一單令我好不以為然o既新聞,就係青馬大橋o既工潮事件o勒!家陣香港經濟唔好大家都知,工人擔心減薪或裁員後生活有問題,係好正常o既事,一般公眾本來都應該會同情工人;之不過,而家俾佢地咁樣阻一阻個交通,你話重有幾多人會支持工人呢?

其實工潮要有成效,有時有一o的行動係在所難免。但係,有冇必要咁樣拉埋唔關事o既公眾落水呀?每逢我見親有任何工潮以公眾做籌碼,我都會即刻好反感,本o黎僅有o既一o的同情感都冇埋。呢種手法,又素來以運輸界用得最多,最"流行"o既梗係慢駛啦,次次慢駛,交通一定大亂,於是啦喎,o的工人咪籍此要脅資方囉。我真係好鬼憎呢種工潮手法,要令工潮有成效,係咪一定要咁做先?好o勒,資方軟化o勒,你地得o左啦,又有冇諗過要同公眾道歉先?好似尋日咁,的工人真係好自私,佢o地知唔知道有幾多人因為封路而返唔到工,或者少o左單生意咁呢?家陣經濟咁差,人地可能就係靠單生意開齋,你地又有冇諗過要賠先?就算唔賠錢,都起碼賠罪,等人o地條氣都順o的先啦。而家"談判"成功,就諗住側側膊唔道歉,有冇咁著數呀?

我最擔心就係呢種工潮手法漸漸成為風潮,o的工人有少少唔滿意就攪單咁杰o既,咁香港重得掂o既?咁好o丫,假設第時有班連鎖店員工同資方傾唔掂數,班員工就即刻上晒鎖,唔俾o的顧客出去,咁又得唔得先?"我地傾唔掂數o丫嘛,如果資方唔肯收回成命,我地唔會開番門俾人客o架!"咁香港咪變硬亂港?

所以,計我話,今次政府一定要俾o的教訓班工人,起碼都要迫佢地同公眾道歉,甚至告佢地整亂香港秩序都得!咁樣,工人先唔會亂o黎,我地呢o的小市民先至唔會無啦啦受罪啦,係嘛? 回自講目錄