抗爭手段及聯想 回自講目錄
我向來都好同情屯門0既居民，佢0地上班返學，早出晚歸，長年累月都要忍受塞車0既煎熬。如果有人能發明隱蔽式0既尿袋，相信一定會在屯門被搶購一空。每日數起0既交通大擠塞，除咗係呢條屯門公路設計有問題同埋接近兩端的道路不配套，仲有就係有幾單抗議行動都嚴重影響到屯門居民0既生計同學業。呢個社會上有好多抗議鬥爭，不大會對其他地方0既人造成不便，而偏偏專搞著屯門0既居民。
以損害其無辜者嚟要脅對方就範，是十分反智，亦無道德，提昇嚟講，形同拉登之流。如果咁都行得通，日後凡有人嗌交，都識得瞓喺鐵路上唔俾火車行，或攔住醫院門口唔俾人接受急救。好似嗰日堵塞長青隧道出入口的隧道員工，佢哋若然唔係做出傷害市民0既行動，而只係去佢老闆間屋企度搞事，甚至捅老闆幾刀，咁反而得到好多人拍手稱快。講番貨車慢駛遊行，最好就係喺特首辦公室周圍遊，等啲鬼佬用粗口向特首求救。點解又關特首事？原因係近年大財團欺壓小資本，以及勞資關係惡化都係政府一手造成。政府在“創造良好營商環境”0既幌子下，越窮0既就越慘，勞工法例名存實亡。
要與對方談判成功，自己必先有實力，實力來自：一，團結；二，合法；三，合理。在呢個法治社會，缺一不可。
喺動物世界，兩三隻老虎可以肆虐一大群牛羊，道理好簡單，就係牛羊各自逃命，甚至它們可能有一種想法：食咗另一隻，就唔使食我。假如牛羊團結，老虎就會絕種。幾隻老虎，點夠千百隻牛與羊打？而在人類社會上中，遠如秦滅六國，近如二次大戰初期及日寇侵華，甚或兩三個賊打劫幾十人，都係人多0既不夠團結而自取其辱。好可惜，中國人就好自私。試想吓，如果青馬管理公司所有員工團結，而唔係淨得嗰三九兩丁七，一齊罷工就唔使搞得咁狼狽啦。大家睇0下，而家美國西岸0既碼頭工人大罷工，有理冇理，產生咗極大0既破壞力。雖然香港好多工人同廠商都俾佢哋累到雞毛鴨血，但又奇在冇 乜人批評佢哋喎！
法和理係兩回事。呢度所講0既理，就係在我哋社會中公認而又不成文0既道德標準。有法未必有理，有理又未必合法，但法又大於理。有法而無理，相信好多善良0既人唔會憑法去取得利益，但好多奸商卻在此點上鑽營 ，佢哋鑽法律罅。比如工人還差一日到五年就可取長期服務金，奸商就在這一天炒佢魷魚 。最常見就係有些無良僱主暗中將公司的名字改了一小改，註冊成另一新公司，原班人馬仍在舊地址辦公，但舊公司蓄意拖欠工人一個月以上0既薪金，以及長期服務金或遣散費。打官司告他咩？老闆話舊公司己破產，乜都冇。 政府官員立法機關都不會不清楚這些案例，但呢啲案件卻繼續發生。無他，你話奸商冇道理，但奸商話吹咩，法律許可！現今普通所見，都是資方玩法，勞方縱使有理也損失慘重，所以勞工階層最宜加入工會。
政府縱容奸商，唔將勞工條例歸入普通法例，以為咁可吸引更多投資， 忽略咗香港只會有更多的紛爭分化。 勞工法例本就係監察勞資雙方的合約，以及資方向政府0既承諾，但政府對違反者毫無懲罰，簡直兒嬉。舉個例，幾年前國泰航空公司插贓嫁禍一空姐，若非有勞工界議員為其伸張，及同事合資請律師幫手打官司，沉冤永不會昭雪。航空公司雖已賠賞給受害人，但這種劣行，已涉及刑事，又不見律政司起訴它。 時至今日，政府仲帶頭破壞法例添。呢件就係政府準備立法減公務員人工。冇錯。香港公務員人工的確很高，尤其係在呢個經濟無止境下滑0既情況下，更顯高企 ，高薪公務員理當與市民共渡時艱。但呢個情況係邊個做成呢？舊年下半年研究減薪，搞到公務員嘈喧巴閉，仲話要同政府打官司，令政府發晒茅。唉！我都未見過有咁蠢0既政府。佢 啱啱先喺年頭加咗人工俾公務員咋 ！唔加，涷薪，公務員冇聲出；若一出聲，市民都唔會幫佢。但加完一陣又話減喎，俾錢人就易0者，想收番就難咯，咪捉蟲囉！香港經濟衰咗咁耐，盲公都知架車飛緊落危險斜坡0架啦，佢唔 踩迫力不單止，仲要加油 添。衰在呢架車係載住全港市民0架！真係應咗“車毀人亡”囉。既然政府都帶頭減人工，咁啲私營機構0既員工，本來一萬銀個月0既，就隨時收到老闆0既通知：“下個月五千咋”！咁就“窩可”咯。