梁祝
尋晚同仁兔以及在廣州的外甥女亞YAN用MSN聊天，仁兔介紹亞YAN到筍筍提供的測命網站玩。但由於亞YAN的簡體WIN 98沒有繁體字語言支援，看不到內容，所以要由我去代她輸入出生日期，然後把結果逐段貼在MSN的MESSENGER對話框內讓她看。她看後十分雀躍，并立即要我代輸入另一男子的資料再測算。得出結果，那人的命理代表人物是梁山伯。仁兔就哈哈大笑，而我亦表示用梁山伯做代表的人似乎十分之弱，好渣，同我的代表郭靖、仁兔的代表張無忌就冇得比。亞YAN問點解，我就將個人感受話俾佢聽。
我話，首先，梁山伯係一個悲劇人物，咁已經係大吉利是。其次，梁山伯可謂不但愚蠢到無與倫比，而且心理不大正常。和一個扮作男裝的女子同窗多年，又在同一宿舍居住，咁都有能本事唔發現得到佢係雌雄，真係不可思議。你咪代為解釋作“掛住讀書”、“心無邪念”呢的咁白痴0既所謂理由呀！既然大家咁情投意合，唔使話一定要摸身摸勢，身上的味道都可以嗅到出來啦！仲有，一個女子的聲線、身段、生活習慣都與男人絕對有異，最重要的，是有種磁力，係會令異性相吸0既！所以就算祝英台係醜到類似八斤兩金0既男人婆，都冇理由唔露出馬腳0既。除非咁啦，梁山伯係中意男人啦，佢後來死都追住祝英台唔放，就係因為祝英台好似男人，問題係似張飛定係似小白臉0者。
而仁兔就話梁山伯好遲鈍又硬頸，幾年後至知祝英台係女人先至發晒狂，咁咪遲得交關囉，賴得邊個0者？最後佢唔甘心仲撼頭埋墻添！
我0地你一言我一語咁，攪到亞YAN冇晒癮。
我仲要補充一樣好重要0既，就係梁山伯咁樣為情自殺，佢冇諗過父母會好傷心0既咩？冇供養父母0既責任咩？為自己中意0既0野就忘記天職，係咪好自私先？
跟住我笑問亞YAN：梁山伯所代表0既男子係咪男朋友0黎0架？如果係就咪嫁俾佢啦！
亞YAN冇正面回答，但就話果個男仔又真係好婆婆媽媽喎。
不白 2002年11月21日