廿三條立法有好處
廿三條立法勢在必行。現在反對的不但是徒勞無功，而且全都會列入黑名單。
凡事有利有弊，各位反對者也不必太悲觀，只要日後不再口多多，事事忍得就忍，唔忍得都要忍，一味埋頭埋腦搵錢就冇事 。講嚴酷，幾時比得上大陸？但而家咪一樣有好多人上去搵工、投資、買屋養老？
首先 我們先從經濟角度去睇下立此法的好處 ，就是會增加就業機會，這是目前社會最火燒眼眉的事。要做好捍衛政權，打擊反革命和叛國者，就必需好像三十年前咁隨街都是密探。我初步計過，首期至少要一萬人。另外各大廈的互助委員會亦要收歸官方管轄，形式等同大陸以前的街道組織，養住一群街八，成日入居民戶內搜索。而朝庭不使餓兵，密探和街八都有薪餉。各位青年人一定不知道以前的密探係幾咁有成就，恐怖份子永不會出現，隨便舉一個真事例：我有個朋友回鄉時在羅湖被英明偉大的祖國扣留了兩個月，罪名是他半年前在茶樓聊天時講過“共產黨好衰”。朋友想了很久終於想到的確有這回事，沒有冤枉他，所以朋友雖被關起來“接受教育”了兩個月，還真是服得那些密探好緊要。現今雖然科技比前高得多，但不可能完全取代人手，尤其是要進行大幅度的人盯人戰術，一定要增聘人員。
不要以為政府又會因而損失一大筆，最終受害仍是市民，政府內大把商人當政，不同無產階級話事。密探和街八一樣可以為政府搵錢，等同街上的黃腳魶咖啡妹，你話請佢地，使蝕水咩？拿，一立了法，唔使估，一定拉了李柱銘司徒華李卓仁梁國雄去祭旗，定罪後先話困他們去黑龍江或大西北勞改，如果求情，得，罰錢啦！李柱銘實大把身家，而司徒華同李卓仁又會有團體代付，得番長毛去火焰山終老。仲有，支聯會同職工盟的會員，大大話都有十零廿萬，咁每人罰一萬幾千，都咪話唔和味。唔單止咁，民賤聯工聯會班人都咪話呢世就安樂晒呀，話唔埋第日太空曾突然被人話係雙重間諜，咁呢幾十萬人都無一幸免，個個定額罰款三千。
從政治角度看，廿三條係為了直選舖路。到時候特首候選人只得太空曾、懲戒男(已懲戒完)、污穢庸、爭獻恥等等，港人成日話想一人一票，到時就會實現了，咪話唔民主呀！
仲有仲有，假如第日的法官好似電視劇《法外情》裏那些法官一樣徇私枉法，而且多了一把廿三條的刀，香港就會少好多唔聽話的劣民。
不白 2002年12月16日