北京旅遊點

地點	特色	推介指數 (5個最高)
雍和宮	- 清世宗雍正帝未登基前之王府 - 現改為喇嘛廟 (清朝信喇嘛教)
景山公園	- 全北京唯一可以望到故宮全景的地方 (但影相就影唔到啦，因為故宮佔地太廣啦) - 為明崇禎帝自縊之地 (不過我搵唔到棵據聞係佢吊頸嘅樹喎) - 話係公園，不過就好似行山仔咁
北海公園	- 淨係記得園內有個白塔，印象模糊
天壇	- 古時皇帝祭天之處，北京仲有地壇㗎。 - 壇中心有舊圓形既石，好似話係俾皇帝跪 - 壇內有迴音壁，另外有一石，好似話企喺度拍手時另一端回聽到三下回音 (要成功拍手呀，企到舊石先算啦，咁鬼多人) - 前往祈年殿之道路 -- 中間嗰條係神路 -- 專俾神行，側面就有其他路，係俾百官行。左手邊仲有條溝，係俾動物行。點解有動物？用嚟祭天嘛。 - 祈年殿之建築藝術，相信大家去到聽導遊講解之後一定驚嘆當中之結構。柱嘅數目係按天干地支嘅數目而設，全殿據聞冇用一棵釘，全由鑲嵌而成。	講到咁，都有4分卦？
天安門廣場	- 可以容納百萬人嘅廣場 - 非常非常之大，由頭行到尾有排行 - 首都重地 - 附近就係人民大會堂/毛澤東紀念館/人民英雄記念碑等 - 我之前話嗰條長安大街咪喺呢度附近囉，過馬路都唔知點過，唔係好見有行人過路燈 (好似一次過過8條行車線)	唔去過點叫去過北京呀？
人民大會堂	- 印象中樓底好高 - 入面D 廳係由各省份命名 - “香港廳” 要自費入場。。。
故宮 (紫禁城)	- 據聞有 9999 間屋 (實際好似冇，不過都好大好宏偉，絕對體驗到以前D人上朝有幾咁麻煩) - 佢有37。5米高，以前中央政府為左尊重佢，所以北京市建築物既高度都唔可以高過佢，不過當我00年再去北京時已經有好多好高嘅大廈。 - 故宮經歷左元，明，清三朝 - 由於以前皇室認為 9 係最大數，所以D石級呀，門上面既銅釘 (我唔記得左個名呀) 都係同 9 有關，去到數下啦。 - 故宮嘅地基據聞有15層，相傳係皇帝怕人刺殺佢喎 (信不信由你) - 正殿中有一球型之鏡，據聞如果皇帝失德，就會跌落黎扑死個皇帝。袁世凱就曾經因為喺民國時期稱帝，又怕呢個 “波”，所以將張龍椅推後啦 (咁都得？最後咪又係咁)。 - 由於地方大，只係重點式參觀幾個殿，鐘錶館，珍妃井咁 - 九龍壁有一塊唔係用磚，而係用木砌成。自己搵啦。 - 一句講哂，跟團就冇可能睇哂，不過唔跟團都冇用，好多地方未必開俾遊客嘅。	一定有5個好啦。唔去過故宮，唔好同人講話去過北京呀。仲有，就係絕對推薦讀中史嘅人去呀。對讀中史都有幫助㗎。
十三陵	- 明皇帝陵墓群 -只有定陵被開 (不幸中之大幸也！) - (好似) 葬左明神宗同2位皇后 - 入面嘅野都係仿製。真嘅俾人打爛哂，連皇帝條屍喺幾百年後再俾人“火葬”過。點解？讀下中國近代史啦。(提示：XX大革命) - 陵墓好深㗎，地底嘛，同埋有D凍 - 墓入面道門 -- 中國偉大之設計。點解？道門好重GA，道門喺出面就好難推開，但係當時就可以好輕易咁將道門推埋，唔俾人盜墓。(去到聽導遊講啦)。
長城	- 主要係明長城 - 不到長城非好漢 - 以前就係靠佢黎防禦外敵啦
圓明園	- 以前清-皇家避暑勝地 - 後黎英法聯軍火燒圓明園 - 而家只有頹垣敗瓦，哀哉！
頤和園	- 慈禧太后用黎住 - 園內有湖，長廊，石船等景點 - 一直被人話係慈禧挪用軍費建成。但係有學者已經駁斥呢個觀點。大家參觀時就唔好鬧慈禧啦。
盧溝橋	- 最著名係橋上石獅子，造型各異 - 有歷史價值 -- 七七盧溝橋事變嘛
恭王府	- 正 - 前和珅之官邸，後為恭親王之王府 - 勁多經典名劇喺度取景 - 園中之石同樹都有來歷 - 內有康熙之御筆，極珍貴 - 據聞以前係曹雪芹 (《紅樓夢》作者) 祖父曹寅封地 (唔知真定假)。
備註： - 由於我係98年去，當時仲未興胡同遊，所以冇得介紹。 - 北京呢幾年變化大，所以有時我介紹嘅可能已經過時。我對上一次去係 00 年，唔知而家事隔 2 年變化如何。 - 北京空氣都幾差，呼吸系統有問題嘅就盡量小心。 - 北京城規劃係喺好耐以前已經係咁，道路幾乎全部南北向，呢個係北京城最大特色。 - 由於呢次係我第一次去旅行，好多野都唔記得，如果資料有錯請話俾我聽。