五月六月森路歷程
|
六月二十八日 星期二 (晴) 今日返夜更 ( 返二放十點半 ) ，今日好開心，因為可以訓到十一點呀 ! 正 !! 不過返到公司都仲係好累，我覺得每日下午兩點至四點，係我精神最差時間，會較難集中精神。 今日返夜更，同 BS 傾左一陣，聽到佢講呢到除左對外之外，仲要對內，話內部溝通有 D 問題，搞到我有 D 驚呀 !!! 六月二十三日 星期四 (好陰) 唔開心，真的唔係好開心? 今日係yahoo，竟然係搜尋那一欄搵 "開心" 兩個字!! 全話我冇晒一年前的那一團火，我都覺得講得好o岩，我都覺得自己對任何事的熱誠都減退了不少!! 究竟點解呢? 工作? 剛升職，應該都ok? 但其實這是否自己喜歡的工作?? 戀愛? 女友仔對我都幾好，但係諗深一層，我們的關係真係完美嗎? 你是否愛我? 隨左係我迫你講的時候，其他時間真係就....，至於我亦有我的保留。 朋友? 好似好多，但係知心又有幾多? 家庭? 看似冇問題，但會不會有好多問題其實存在呢? 興趣? 其實我有乜興趣呢? 青雲路我是一個小導師，但好像真的能醫不自醫!!! 多少常傳，欣賞自己，我能做到嗎? 希望全所講的說話是真的，我真的已經左谷底，下一步將會好轉，希望我唔會係係山谷中間，仲有得跌落去!! 或許我真的要休息!! 六月十八日及十九日 星期六及日 (晴) 原定今日(星期六)已經係荃灣返工，但係遇上一些波拆，搞到仲留左係彩虹。如果早知仲係彩虹，我就請假啦! 因為今日青雲路POST CAMP，搞到我今日心郁郁，想去見下我班仔仔女女，雖然佢地唔係我至愛的一班，但始終係我人生當中，都唔會有好多次青雲路，所以我真係要好好珍惜我每一班的仔仔女女。所以，我今日特登係LUNCH TIME 早左偷走，晏D返去，特登可以返去見佢地最後一面呀!! 下午，原本係一個風平浪靜的日子，但係點知收到個消息，主席呂生話唔做呀! 聽到真係唔係好開心呀! 因為係我心目中，佢係一個好好先生，而且佢係法團都唔係一個係到玩野O既人，真係不可不慨嘆一句，好人真係難做，做好人要堅持都真係難上加難。不過，同呂生傾左成個鐘，都好開心呀，因為佢講左幾句野我都好記得，同埋令到我開心，因為佢話 "越做得野O既人越快走" ，"不如我同盧生傾下，升你上去做個主管位"，呢幾說話令我覺得得到別人的肯定同認同，是非常值得開心。(其實我係一個好SENSITIVE O既人，別人的一句讚美 ，話者一句無心的說話都好可以好影響到我自己的開心同唔開心。) 今晚，約左AA一班莊員食飯，好開心可以見到佢地呀! 不過，我可以逗留的時間只有一小時，之後，佢地仲好開心去唱K TIM呀! 我就冇得去，因為，原定今日有忠福CAMP，我係為左同AA食飯而遲左入去呀! 之前，已經俾小桃鬧，問我對忠福的承諾有幾重視，係呢件事入面，我承認我係有做錯，但係亦令我反思到，究竟忠福係我心目中的地位，其實，毫無疑問，AA係我地位，真係高過忠福，係AA入面，我得到別人認同同尊重，相反，我覺得係忠小福入面，我係被忽視的一個，感覺好唔同，多小常傳，我反而係AA入面感受得到，相反，講求多小常傳的忠小福，真係唔係好感受到呀! 突然間，有離開忠福的一個衝動。 六月十七日 星期五 (晴) 女士們，每個月總有唔方便的日子，而我都一樣，定時定刻都會簡唔中出現低落迷失的時候，唔知點解最近就真係有點沉呀!! 究竟有咩令到我唔係好開心呢? 幾唔開心都好，我都唔會俾自己o既心情影響到自己呀!! 六月十七日 星期五 (晴) HE!! HE!! HE!! 又差不多一個月冇寫過日記啦!! 自己真係有點兒懶呀!! 如果要俾藉口自己，我會懶壞左部電腦，我諗我都係要認真搵個時間去砌返部腦先得呀!! 今日係公司真係冇乜野做，大笨象都騎唔掂我呢隻馬仔，所以都唔俾野我做，搞到我無所事事，還掂都冇乜野做，等我回顧一下過去半個月做過o既野啦!! 六月一日至六月八日 ~~~~ 我去左青雲路呀!! 好難得再有機會去青雲路，去青雲路真係好開心呀! 總好難得可以去DAVID係東莞的TRAINING SCHOOL。那裡的工作人員都非常有禮貌同親切，連清潔工人都會同你一個三九唔識七O既人打招呼呀! 今次CAMP P 俾我的回憶如下：
六月九日星期四 當然非常之累啦! 但係到要返工，冇心機做野，但係真係估唔到佢竟然將七日的工作都留返俾我做，佢仲竟然同我講一句，我好多野做呀，但係睇佢張工咭，日日都好準時走，返到來，又唔見佢有乜特別野做左出來。唉!! 呢個人真係唔係好得呀!! 真係好累，準時放工，返屋企覺覺豬。 六月十日星期五 今日同法團開會，大笨象竟然朝早話去睇醫生，唔返工，仲要搞到晏一晏，成兩點先返工，樣樣野都要等佢返來先有得做。真係唔可以唔大大聲咁~~~~~唉!!! ~~~~ 今朝仲要有簽名運動，佢仲要唔到!!! 都唔知佢有冇心係到做呀!!! 下午，大笨象終於都返來啦!! 跟進又真係係到忙餐死呀! 不停係到做呀做呀! 不過都係六點前做好晒所有野!! 今日大笨象俾青蛙鬧呀! 以前青蛙鬧IC，我會覺得唔開心，但係今次竟然心涼呀! 不過我覺得佢係抵死呀! 青蛙叫佢做O既野，隻大笨象食晒落肚，唔話俾上面知，抵佢死呀! 佢都唔同人溝通O既!! 上又唔講，下又唔講，全部將D野留晒係自己到，真係遲早玩死自己呀!! 另外，委員踢爆佢，話同佢講電話講佢唔明，要搵另外一個同事講，再轉告佢知先明，我聽到真係都覺得想笑呀!! 六月十一日星期六 今日端午節呀! 約左十一點，開小福小組MEETING，呢次好可能係最後一次OFFICIAL 聚會呀! 有LV，LIZ，KASE同AKA出席，如果MONICA，KELVIN，EDMOND同FRANKY都到埋就好啦!! 不過，我地之後開完小組去唱K，好開心呀! 今日AA有一個分享會，俾有心參加第四屆AA的人，真係估唔到又一年啦!! 仲好記得搞AA那時的開心，和其他莊員一齊努力，真係好開心呀! 諗返現在，自己的ENERGY 好似低左好多呀!同埋，唔知點解覺得自己的魅力，好似冇以前咁勁，搞到現在自己心情都係MA MA! 其實，唔知點解好想再搞多年AA，不過，我知雲尼實會唔俾呀!! 六月十二日 星期日 今日捉左雲尼陪我去AA的WORKSHOP，今次係講辦公室政治O既WORKSHOP，不過冇我預期想象中咁正，反而講緊一D BASIC 野，唔通又係青雲路所講要BACK TO THE BASIC ， BASIC 都未搞掂，點做好其他野呢? 之後，同左雲尼去左行海旁，呢個係我地以前成日會去的地方呀! 今日再去返真係好開心呀! 呢到係一個我地好鐘意的地方呀! 係呢到我地做過好多野呀!! 行行下，竟然落雨，搞到我地兩個都唔知幾狼狽呀!! 不過我又想起張學友同湯寶如~~~相思風雨中。 之後去左行一個我好鍾意的地方~~~~玩具反斗城。 六月十三日 星期一 今日好勤力係到打交接備忘，連大笨象問我份會議紀錄可唔可以係今星期做好俾佢，我都好唔客氣咁答佢，未必得呀! 可能之後大家電郵聯絡下啦!! 其實自從佢來左，我都真係好優閒呀! 今日再次小福，又再次令我失望，因為我個組連埋我得四個人出席呀! 咁少人出席，阿全問起責上來，我都係要俾人鬧呀! 之前問大家會唔會來，大家都應得好快呀!! 估唔到咁快剝晒底呀!! 今日大佬全係到反小福艇，問大家的COMMITTENT LEVEL 有幾高，其實，我都覺得自己真係好HEA! 我覺得我BUDDY SILVIA 眼入面的那一團火同決心真係俾我大好多呀!! 唔知係咪出來做野之後，已經唔再敢承擔太多呢? 討厭這樣的我，我明明係一個好有鬥心的人，好憎一個咁O既自己呀!! 六月十四日 星期二 今日硬著頭皮打會議紀錄，好悶呀! 冇乜野好做，一日就KO左份會議紀錄啦! 今晚原本做乖乖仔返屋企喉飯，點知經理一個電話叫我過荃灣開會，等我可以先見下個法團先，咁我咪唯有乖乖咁去LOR，原本諗住一個小小O既會啦! 都搞到成十點半呀!返到屋企已經11點幾啦!! 好累呀!! 六月十五日星期三 冇野好做，原本今日LAST DAY，下午同鄭生，CARRIE同大笨象去食LUNCH，呢隻大笨象除左笨之外，仲喜歡做一隻離群的大笨象，同佢一齊真係有野好講呀!! 飲茶對住佢，真係會悶死呀! 今晚同左雲尼去睇戲呀! 好開心呀! 雖然大風大雨，我地都永不改變，一齊去睇史密夫決戰史密妻，仲有得去麥當當，如果可以日日都係咁，咁就好啦!! 六月十六日 星期四 今日真係悶到發瘋呀! 因為真係冇乜野做，原本係今日可以離開彩虹，但係因為有d問題出現左，搞到走唔到，現在仲冇限期，仲唔知留到幾耐先有得走，係到真係好辛苦呀! 真係唔係好想對住舊大舊飯，成隻大笨象，踢又唔識郁，講佢又唔明，同拉牛上樹真係冇乜分別。今日開始悶到有D想癲呀! 之前都仲話有會議紀錄同交接備忘可以做下，今日真係冇野好做呀!! 悶到想死!! 今晚同左屋企人去睇電視，因為屋企壞左部電視，發覺已經全部冇晒D大笨象電視呀! 得返薄E E O既電視，左睇右睇，最後都係豐澤，揀左一部，不過其實電視對於我，真係一件可有可冇的東西，係屋企的時間真係不會多!! 不過，我知這是爸爸媽媽的唯一娛樂呀! 所以，買邊部都由佢地話事啦!! 五月二十一日 星期六 (晴) 星期三我咪遞左辭職信，估唔到星期五我就要收返封信，因為高級經理賞識我，佢出面留我，佢仲話會升我職TIM，不過要調到好遠做野呀!!! 星期五晚MUB畢業典禮，今次MUB真係好少人呀! 不過，不過每個人的得著比前兩期多左呀! 希望我地可以友誼永固啦!! 星期六返工，朝早忙，下午無所事事，一放工就飛左去剪髮，真係好熱呀!! 夜晚仲去左忠福+COMMITTEE的GATHERING，好開心好好玩呀!! 五月十九日 星期四 (晴) 星期三終於都遞左辭職信，我的上司一D反應都冇，唉!! 我對佢真係好失望，走或者真係會好呀，始終佢做野都真係唔係好得呀! 特別係溝通方面，同伙記完會冇溝通，講野仲唔經大腦TIM，仲要超冇記性。 近日，五點半準時收工，這是對他的一個控訴，還是我真的冇乜野好做? 今日，去左雲尼公公的喪禮，都真係冇諗過會係呢個時候見佢的親戚呀! 雲尼那一句說話，"如果今次唔見真係冇機會見啦"，真係令我有好多反思呀! 五月十七日 星期二 (晴) 近日都發生左好多事呀! 五月十三日至十五日 MuB 原本去做組長，但係點知唔夠人，要落埋水TIM，不過都幾好丫，再一次經歷大師的課程，美中不足的是今班真係好少女仔呀! 五月十四日朝去左見工呀，用左一個小時填FORM，一個小時同個經理傾偈，好似成功機會都幾大呀! 上完MUB，同女朋友傾左我的計劃，最後，決定左辭工啦!! 五月十六日同十七日，返左學校幫AA搞活動，都幾得意呀! 同D人影相，都好開心呀!! 五月九日 星期一 (晴) 今日做左個小小記錄，原來我一返工就要坐係到簽差不多要簽三十分鐘o既名，保守估計一分鐘最少簽三個，即是我每日最少簽一百個名呀!! 今日都好得閒，冇乜特別野做，呢個星期我都預計我會過返d朝九晚五的生活。 今晚發生左件青蛙事件，發現雲尼都真係幾得意可愛呀!!! he he!! 五月七日 星期六 (晴) 又好幾日冇寫到日記呀! 因為係公司真係好忙呀! 要忙開會o既野。 星期五開會，破紀錄兩點先完會，簡直係過份，今次開會真係仲有d火藥味呀!! 不過，都真係覺得呢班法團有d過份，自己又唔睇清楚d野，做法又騎喱，真係等住係到d業主慘呀! 花一生積蓄買的一間，俾班咁o既人係到玩。 今日好累呀! 但係要九點補習，所以都係八點起身。補完習去左開會，個會一開就去到七點先返屋企，不過，好開心，因為有得行玩具反斗城。 五月四日 星期三 (晴) 今日冇啦啦俾人鬧，都真係未見過d咁野蠻o既人呀! 佢簡直有d問題，明明叫我地幫佢關水掣，叫佢填份form o者，都要大大聲係到鬧人，佢仲要好似係我一個中學同學個阿媽tim，真係估唔到d女人真係可以咁野蠻呀! 五月三日 星期二 (晴) 今日收假好開心呀! 因為我訓到一點先起身出街，之後仲去左麥當當食午餐，完全係舒適的生活，之後就乖乖去左讀書書。 今日小福堂都好正好開心呀! 玩左一個dating活動，認識左一些新小福。 今晚唔知點解訓唔著，眼光光，搞到衣家又冇乜精神tim! 五月一日 星期日 (晴) 屋企部電腦又壞左呀! 唉! 好煩呀! 好可能係底板有問題，底板又問題即是等於要買過部電腦呀! 煩呀! 突然間收到個唔係咁好的消息，真係要好好珍惜人! 今日假期都要返工，不過都幾開心呀! 唔係太多野做，仲可以係office打下電腦，我仲係到聽歌睇戲，都咁 "疏乎"。 |