2004年初二慈雲山睇煙花

日期：23-01-2004

出席人物：LingLing，阿基，Catherine

行程：慈雲山，沙田坳，飛鵝山道睇煙花

難度：冇

後記：by 基

每年年初二維港都有煙花睇，尖沙咀海邊同山頂一定逼爆人，唔想同人逼可以上山睇，好以飛鵝山就可以睇晒全個九龍同維港的夜景，雖然ｄ煙花係細ｄｄ，但勝在成條飛鵝山道好多位都睇到煙花，而且又易去，係一個唔錯的選擇～而我亦打算試下影煙花～

我地六點係慈雲山中心出發，係3C巴士總站後有樓梯直上沙田坳，唔使30分鐘巳上到沙田坳，我地原定計劃係沿飛鵝山道上飛鵝山，搵個靚位，然後開爐煲茶，再煎ｄ我母親大人整的蘿蔔糕同年糕，一路食一路睇煙花～係咪好美滿呢？點知........

我地沿飛鵝山道行，點知越行越大霧，唔好話九龍半島的景色，就連山下面ｄ樓都見唔到，而且仲落起毛毛雨，天文台明明話睇得到我地先上山的，唔通又"fake"左？我地抱住一絲希望繼續行，山上好大風，而且仲落雨，我地著左好多衫都仲好凍，突然間，狂風大作，又係人都吹得郁果隻，濃霧下四周白蒙蒙一片，又凍又濕，我地乜心情都冇晒...........

唉～咁大霧，我估上左山頂都睇唔到煙花，而且又落雨.......都係放棄算la～

回程時影的合照，真係好大霧呢～

影左幾張夜景，煙花大會巳經快要開始了，此時突然多左好多人睇煙花，佢地都係?車上來的．剛才我地四維走搵靚位，依家企定第睇煙花先發覺原來山上氣溫好低，好凍呀～

LingLing 同Catherine一早巳將ｄ手腳收埋入ｄ衫度，兩條友攬住取暖，而我為左影相只好將一雙手暴露係寒風之中，?車來的人當然係車入面唔出來la～

將到8點時，躲在車內的人紛紛走出來，大家望住同一方向，等待天空爆出第一個煙花，而我亦半按快門，耐心地身等待這一刻的來臨.........

我地行下行下，ｄ霧就越行越散，連雨都停左，當時巳經天黑，我地望落山～嘩！山下燈火點點，天空清到不得了～整個九龍半島的夜景都看得一清二楚，唔止呢～對面海都睇得好清楚～睇煙花當然冇問題la！

雖然上唔到飛鵝山，都要搵個靚位睇煙花，我地襯仲有30分鐘時間，四維走搵好位睇煙花，點知搵極都唔滿意，結果都係去番ｄ霧開始散果個位～真係天意呢～！其實呢個位好正，成個九龍同維港的夜景都睇晒，又冇樹，好多人都係呢道睇煙花呢！（睇到我屋企！）

砰！一聲巨響過後，天空終於爆出第一個煙花，山上的人不其然發出"嘩"的一聲，估不到距離咁遠都聽到煙花的爆炸聲呢！攪到我差ｄ連相都差ｄ唔記得影呀！

可惜我部dc唔夠好，只係一部A70，鏡頭又唔夠靚wor，光圈又唔夠細wor，又zoom 得唔遠wor，位置又唔夠好wor，天氣又凍wor.................

總之藉口多多，皆因ｄ相唔多好la～不過有ｄ都叫見得下人，大家慢慢睇la～

後後記( by 基 )：D 相係咪好唔掂呢？不過我都好開心，因為係我親手影ge~，下一次影將會更好！而且原本以為睇唔到煙花，點知ｄ霧突然唔見晒，真係開心到呀～山上的天氣真係變幻莫測呢～

睇完煙花原路落番慈雲山中心食飯，過左一陣ｄ手腳先暖番，頭先影完相隻手凍到冇晒感覺..............

至於ｄ蘿蔔糕同年糕當然係冇食到la～