屈蛇x睇魚岩x罾棚角咀

日期：27-9-2003

出席人物：LingLing，阿基，阿Poon

行程：西灣亭，西灣山，睇魚岩頂，長岩坑，長岩頂，罾棚角咀，浪茄仔，浪茄，萬宜路

難度：3星

後記：by 基

開學冇耐，襯唔係咁忙就行多ｄ山，遲ｄ可能好多野做呢！我前一晚仲特登走左入Hall屈蛇，玩左成晚只係訓左兩粒鐘，第二日差ｄ腳軟行唔到呀！

係Hall屈蛇都幾好玩～不過訓就慘ｄ，而且Hall個冰箱實在太廢，ｄ?喱同水雪左成晚都唔多凍，天氣咁熱冇凍野食，點算？

第二日係Hall Can食完野就出發，不過我仲好眼訓呀～

呢個景係LingLing間房影出去的夜景，睇煙花當然冇問題，不愧係香港最貴的大學宿舍！

去到西貢老麥搭小巴入西灣亭起步，行大半個鐘就到左西灣山頂，大家睇下阿Poon個"Look"就知個日好熱！

我地係西灣亭"hair"左一陣，跟住就係西灣亭行落少少搵路上睇魚岩頂．

呢帶山頭有一個特點，就係完全冇樹蔭，好鬼曬，由離開西灣亭之後我地一直係烈日下行走，好鬼熱～好彩我地帶左好多水～

落睇魚岩頂後向長岩頂進發，路兩邊係密林，真係好熱～係上長岩頂之前會經過一條小溪，呢條溪仔就係長岩坑．天時暑熱，雖然長岩坑只係溪仔一條，水亦唔夠冰涼，不過對當時來講就係消暑極品～我地搵左個冇咁曬的地食午餐，食玩之後玩左一陣水．

睇魚岩頂係西貢三尖之一，不過比其他兩尖較少人到，其實睇魚岩頂可以係西灣亭度近觀都唔錯，不過點都唔及上頂靚，上面就係企係睇魚岩頂影的全景相，可以見到蚺蛇尖同長咀！

上睇魚岩頂的路都幾好行，只係上頂路斜左ｄ同密左ｄ，而山頂就雜草叢生，冇位休息，所以我地影完相就走．

企係睇魚岩頂影相仲會見到我地今日的主要目的地－－罾棚角咀，LingLing左手邊突出來的山咀就係罾棚角咀！

睇魚岩頂仲有另一樣野睇，就係好多類似燕子飛來飛去～有冇人知係乜雀？

因為Hall個冰箱實在太廢，所以原本的冰?喱同，冰水同冰梨等全部欠奉～不過好彩仲有條溪仔洗下面！

見風景咁靚就影下相先，我地身後就係長岩灣，不過有好多垃圾比風吹左埋海邊，有ｄ殺風景～

我地係度玩左一陣就要上路，之後仲有排行呢！

抖夠就行，跟住長岩頂一路行出罾棚角咀，一路都冇樹蔭，行得都幾辛苦下，終於行到罾棚角頂，開始見到一望無際的大海，行前ｄｄ睇，原來仲可以行得出ｄ，再行出少少，嘩～仲可以再行出ｄ呀！！

每次出咀都係咁，以為到左，但原來山後有山，永遠驚喜重重，直到下降最後一個草坡，去到崖邊，才是真正到達呢！

去到崖邊，望住一望無際的大海，天空海闊，真係乜煩惱都冇晒，連炎熱的天氣都唔記得la！

罾棚角咀對出有個好得意的小島，叫飯甑洲，圓圓地好似一舊包．我身後就係飯甑洲．

罾棚角咀海岸有ｄ海蝕洞，身手好可以爬落去玩，不過我地冇落去玩(身手差)，就咁企係崖上欣賞巳經好正！

仲有呀！落去一定要小心落石！我地見到有大石滾左落海呀！

欣賞完一望無際的大海同海蝕洞，我地都要走喇～走的路一ｄ都唔短，只係萬宜路巳經10K～

走前景張合照先la～

離開罾棚角咀，要走回頭路至長岩頂再搵路落浪茄仔，唔使講又係又熱又密的林路～落到浪茄仔再搵路去浪茄，條路有少少攀爬，但唔難．

其實浪茄仔都幾水清沙幼，不過衰在淡水水源唔穩定，唔係係度camp都唔錯．

最後出到萬宜路剛好日落西山，等我玩下剪影先～影完相我地就好"relax"咁慢慢行出萬宜路，結果差唔多8點先上巴士．

後後記( by 基 )：罾棚角咀真係好靚，雖然係熱到呀媽都唔認得，但一望無際的大海令人暑氣全消，下次再去一定要爬落去玩海蝕洞呢！

原本我地仲想上螭渠石頂的，點知行過左先記得～哈哈～