近日，陳冠希和陳文媛經常走在一起，不久前有周刊更拍下陳文媛登上陳冠希的保母車離開的相片，兩人相戀之說更甚囂塵上，但在傳媒追問時，兩人卻例牌否認，只堅稱兩人投緣，只是好朋友。

不過，兩人不知是心有靈犀，還是有心暗示，近日同時帶上同一款情侶手鐲，如此巧合，好難令人相信兩人的關係只是好朋友。

前晚兩人又再走在一起，一齊出席一個在會展舉行的活動，陳文媛表演時，台下Fans有理冇理，當正陳文媛是陳冠希的正印女友，高呼「陳太」，而陳文媛則是聽在耳內，甜在心頭，一副甜樣，同棵十月芥菜冇乜分別。雖然陳文媛聽到叫「陳太」時，情不自禁甜笑，但事後卻詐傻扮懵，甜絲絲咁話︰「我完全聽唔到有人咁叫，我同Edison只係好朋友，冇其他。」

日前陳冠希惹「咖喱雞」疑雲，因頸上貼了膠布，所以被指掩飾「咖喱雞」。前晚，陳冠希刻意在傳媒面前澄清事件。陳冠希展示頸上紅印，表示自己去台灣時被蚊咬，十分痕癢，所以用手整損，根本唔係「咖喱雞」，陳冠希強調當日根本冇唔俾記者影相。

「咖喱雞」疑雲拉埋陳文媛落水，陳冠希就話成件事同陳文媛無關，陳冠希指咁傳法，無論對自己和陳文媛都無益，而自己亦冇向陳文媛提過件事，因為根本冇需要。

陳文媛接受訪問時大叫︰「救命！」並呼冤話︰「又關我事？我完全唔知件事，佢損手爛腳又關我事，咁我好大責任喎！」