IT前晚於銅鑼灣為時裝品牌「Fcuk」搞Fashion Show，除老闆沈嘉偉親自監場外，徐濠縈、黃偉文、蒙嘉慧及泰籍演員Rita等都有到場。腹大便便的徐濠縈於晚上9時45分到場，她的出現立即成為傳媒焦點，未知是否做了媽咪的關係，平時不太理睬記者的她卻變得十分友善，就算被近二十名記者包圍依然面露笑容。＜採訪＞馬建華、張俊銘 ＜攝影＞鄭家駿、容子堂
身穿短裙黑Look、紅鞋、左手中指戴着鑽戒的徐濠縈，雖然難掩已隆起的腹部，卻大方任記者拍照，完全流露幸福之情。做了媽咪後，徐濠縈表示體重增了十多磅，但暫時不會結婚，因沒有時間搞婚事，待BB出世後才籌備。會否叫BB做花女、花仔？她笑笑口說：「可能會㗎！」
陳奕迅（Eason）向她求婚時是否很浪漫？徐濠縈甜絲絲地說：「佢喺我生日嗰日，喺超儀成班朋友面前向我求婚，好開心㗎，因為終於嫁得出。（Eason早前喺台灣話幫BB諗咗名？）中英文名都係我自己諗㗎，但遲啲先講。（有冇胎教？）會聽莫札特音樂，Daddy啲歌都有聽。」她透露，沒打算於外國待產，亦未Book於哪間醫院生產，屆時去到邊度就邊度。那她是自然分娩還是剖腹產子？徐濠縈說：「咁早未知。（Eason會唔會陪你入產房？）老公係咪應該都要入㗎？但DV就唔使。」
唔會做纖體代言人
陀BB是否很辛苦？她自言好彩沒有嘔，但很多朋友已送了鞋仔、BB被給她。奶奶呢？她說：「遲啲先講。（布置咗BB房未？）未知搬定裝修好，因為朋友話陀BB唔好裝修。（會否暫停工作待產？）唔會，今晚都開工做嘢啦。（Eason有冇叫你唔好做？）冇喎，生完BB都要出Trip去歐洲買貨，Eason都唔會覺得心痛。（Eason會唔會暫停工作陪你待產？）唔需要。（生完BB會做全職媽咪定係繼續工作？）我希望兩樣都可以兼顧，奶奶就叫我食有營養嘅嘢。（Eason嗲哋知唔知？）知道，好開心。」
不少纖體公司向孕婦招手，徐濠縈卻不會接受，她說：「因為件事唔型，時裝界一定要型！我好抗拒孕婦裝，覺得好搞笑，所以遲啲會着男裝，公司好多衫都啱着，唔使着Eason嘅衫，但佢叫我行為舉止要小心啲。（有冇打算追多個？）試咗呢個先，但第一次做媽咪，心情既緊張又興奮。（有冇催老友超儀生？）有叫，估唔到竟然爬過佢頭，可能超儀事業心重。」
Eason傳統跪地求婚
Eason昨日與2R、李香琴、杜麗莎等出席港台和馬會合辦的「群星共賀百老滙」，現場共設250席，招待2500名長者義工。昨日是Eason首次在香港傳媒面前承認即將升任老竇，早前亦在超儀及數位朋友面前向徐濠縈求婚，他說：「我係有求婚，係好傳統跪地求婚，原先安排用視像電話求婚，但暫時冇電冇做到。」Eason對於自己買了20萬鑽戒求婚亦被傳媒發現感到愕然，有指他年初已結婚及徐濠縈將往英國產子，Eason一概否認：「我一年前買定飛去英國、葡萄牙睇波，點知會生咗個仔出嚟啫！」
