我的日記
11/8
今次係我第一次整網頁比大家睇，希望反應唔錯啦，咁我先有動力再整好一d比大家欣賞．．．我今日約左朋友拿會計筆記，計劃要比心機讀好會計，考好成績，雖然辛苦，但我都願意．．．諗起今個月無乜特別假期，今次有排挨先過一個月出糧．．．
12/8
又返工啦，今日老細唔係度，個秘書又唔係度，真係好free，我同margie成日講笑，笑到我死，又講老細是非，講親都笑到收唔到聲，佢話老細肥到都分唔出邊度係條頸．．
13/8
今日去到尖沙咀海港中心，比我遇到一位好隨和既男仔，個樣都唔錯，仲教我點去某個地方添，我臨走時係升降機出面比我再見到佢，我都無諗住同佢傾，但佢都好有禮貌同我閒談，感覺好自然．．．另外，放工之係又比我撞到吳生，成日都比我撞到佢，佢越大越靚仔呀，有次睇流星花園，忽然覺得佢個款有少少似道明寺呀，尤其係輪廓呀．．今日搭車忽然諗返起有次坐我隔離既女仔訓著左，我都唔理佢，照睇風景，點知我個膊頭忽然好似有野撞，原來係個女仔個頭撞到我，佢就好尷尬，我就覺得好好笑，我個膊頭咁硬，唔知佢會唔會比我撞親呢．．哈哈．．
14/8
今日無乜特別野發生．．
15/8
今日好遲先放工，因為個女仔同我傾左兩個鐘，又講公司情況比我知，又講下大家既野，了解一下大家，因為遲d我會同佢part 住做野，所以一定要有溝通，先可以工作順利．同佢傾偈我覺得好自然，大家有乜講乜，我都好開心大家咁坦城．．而且我覺得佢几好人，佢個人好真，又好善解人意，又好關心人地．．係呀，我記得有次個老闆仲話我同佢好似樣，哈哈．．
16/8
昨晚發了個惡夢，個陣時係夜晚黑，我係露台睇野，忽然比我見到有個著住小學體育衫既男仔跳樓，唔知點解個場景好清楚，好驚，好采無比我睇到佢血肉糢糊個樣姐，唔知呢個夢有乜先兆呢．
今日真係好開心，因為公司d同事個個都對我好好，個司機好似電視劇個個肥貓，好cutie，有個叫阿文，又好幽默，另外，有三個女同事又鍾意同我講笑，老闆又對我好好，成日都幫我，又想請我食飯，我真係覺得好幸福，就算人工唔係咁多，我做得開心己經滿足．．短短一兩個星期，我己經可以同咁多人咁熟，又玩得，佢地又好鍾意逗我笑，可能我係公司裡面最細個個啦，個個都好就我，我都好開心．．．
本來都好開心架，但當返到屋企知道eva曾經自殺，都有d唔安落，我都好明白佢既感受，有時我都會代入佢身份，十几年黎都好似比人蝦，無人鍾意，當搵到個理想對象，但發現佢又好似人地咁蝦佢，生活係咁既世界裡面，我覺得好孤獨，好想咸．．但諗返轉頭，我係唔可以話佢完全岩晒，好多時都係佢引發爭端，自找煩麻，如果佢一早肯聽長輩的話，佢就唔駛淪落成咁啦，宜家係度訴苦，但自己又唔肯改，好難幫到佢．．佢一直唔改，人地都好難接受佢．．只好睇佢點諗點做了．．希望佢有一日真係出人頭地!
17/8
每逄到星期六，都覺得特別累，返到屋企都要訓成三個鐘，不過呢個感覺幾好，有目標就咩都好．睇新聞話將會發布失業情況，我都好驚係雙位數字，希望唔好啦，希望個個有工開，商人到香港設廠投資啦，如果唔係，香港睇黎都死緊啦，個個又唔開心，到頭來令到個社會唔穩定．．有時我出街，見到個個都低頭行路，個個無晒自信，都有d唔開心，希望政府要負責任，搞好香港，創造更多就業機會比失業人士啦．
18/8
雖然今日係星期日，但一樣好累，死啦，我仲報左夜校讀讀添，到時一定累死啦，個樣都會殘d，到時真係唔想見人．
19/8
今日同同事合作好好．
20/8
今日搭巴士竟然比我再撞返x，佢亦都見到我，但我無理佢，佢都同佢朋友傾偈，初時我都有少少緊張，但之後我唔係好想見到佢，心諗你快d上樓上坐啦或者快d落車啦，總之唔好行埋黎同我傾愒，好采我附近無位，容乜易比佢坐過黎．我一直坐，但我無正視望佢，但我知佢有，直到佢落車，我都無理佢，個種瀟洒感覺几特別．都唔知當黑還是有緣，上年又唔會比我撞到佢，但今年就比我見到佢都有成四次啦，唔知係咪佢累到我今日做錯野呢．
21/8
今朝成六點起身，就寫下日記．
22/8
今日係農曆七月十四日，返到公司就同同事傾偈，講下之前有乜事發生係呢個節日，我本來以為尋日係七月十四，原來今日先係，佢仲講埋以前發生既特別事，搞到我都有少少驚，做野都做唔好咁．到放工搭巴士，我見到部私家車被小巴撞到個牌掉左，哈哈．．坐坐下，見到個月亮好圓好靚，乜咁快就中秋呢咩．．
23/8
今日搭車返屋企，我忽然好掛住小學個男仔，好想同佢聯絡，但根本無可能，我只知我同佢都係住同一區，但始終都無緣比我見到佢．．
27/8
近來好多事發生，真係有d支持唔住，加上工作，令到自己好累好累，漫無目的係咁做係咁做，唔想理咁多野，唔想知咁多野，但偏偏要比我知比我擔心，太多野要煩，要自己解決，但我相信時間可幫我解決問題．．
28/8
今日我終於鼓起勇氣講出我心裡面既說話，講完都舒服晒，人地又知我點諗，一個人諗多左，始終係負面，其他人比意見會好好多，谷住谷住身體都唔好．睇流星花園時，有時都好希望好似杉菜咁，有乜講乜，好有正義咁，好勇敢好堅強．
30/8
今日有個朋友仔生日，可惜我陪唔到佢，因為要返工，不過唔緊要啦，佢都有男友陪啦，駛乜無著落呀，哈哈，過一個浪漫既生日啦．．返到屋企一路食飯一路睇電視，原來今晚流星花園大結局呀，呢個電視劇都几好睇，夠青春夠時代感，而且好感觸．我好喜歡杉菜爽朗正直，純真同堅強．
31/8
今日真係好累好累，本來今日做到一點，但我見今日無野做，所以幫公司做下野，對於平常人來說，可能會覺得咁蝕抵，但對我來說，雖然真係幸苦，日做夜做，但我亦好享受呢個感覺，我覺得盡得自己係一個對公司有用既人，我亦學到毅力，而且比人一種勤力既感覺，加上我自己又唔鍾意無野做，好悶，有時係屋企無野做都會搵野做，令自己辛苦．．另外，公司裡面既人對我又好，個個司機好好人，見我推唔到箱就幫我，又同我玩，好得意，佢又成日都好開心，成日笑笑口，几可愛架．
4/9
忽然記返起有次係車上面見返一位朋友，雖然佢曾經對唔住我，令我對佢好失望，但事隔咁耐，對佢己經無感覺，個次見返，己經好似陌路人咁，始終無聯絡咁耐啦，不過，如果佢真係聯絡我既話，我都唔會抗拒既．
5/9
我都好耐無上網改自己網頁啦，由於真係好累好忙，根本無時間做其他野．尋晚我發左個令我好驚訝既夢，發生係我同一位朋友，呢種事係無可能發生既，不過真係估唔到．今日司機同我講笑，我仲無意間爹佢添，哈哈．好想時間過得快d，因為又可以有糧出麻．
7/9
尋晚知道做左七年既女同事要走，話要生仔，聽到之係都几擔心，因為我就要兼顧採購，船務，售貨同埋秘書一職，對於岩岩出埋做野既我，真係有少少壓力，不過我亦都明白，呢個係一個好好既機會，我可以學到好多野，唔單止係紙上既工作，仲有人際關係，我要同客(包括外國)同廠同同事溝通，連司機駕車路線我都要顧及，而我係公司既地位就好重要，唔可以有出錯，雖然我既職位只係文員，但做既野係等同秘書一職，管理成間公司，甚至比普通秘書做既野更幸苦，因為要做埋sales,shipping and merchandering．所以我都好珍惜同女同事既相處時間，同時我亦要係短短四個月裡面要係佢身上學晒所有既野，都唔簡單．
11/9
真係好掛住葉，點解地方少少，但我同你既世界就好似好大咁，尋尋覓覓都係得個吉，我唯有等待你既出現，等待你的電話．今日搭巴士返工，係一個鐘裡面，大部份既時間都係想住你，諗返起小學既時候，雖然對對方都有好感，但我同你都好避忌，只係用眼神接觸，有時，我一見到你見到我就避開你既眼神，你亦都係，個種感覺直到宜家仲存在，但未曾再試過呢種感覺了．．
13/9
周杰倫既回到過去好好聽呀，而李龍怡既夜遊杜拜都好好聽呀．．好緊張呀，我就黎要返夜校啦，唔知適唔適應呢，希望返學個几日唔好咁多野要做啦，不過都几難，我開始要理間公司既所有野，要係個女仔走之前學識好多好多野，而且佢對我好好，佢信任我，比我處理國外生意，所以我唔可以令佢灰心．．
15/9
宜家掛住返工，咩都唔埋咁，又無時間睇報紙，又無時間出街，好似與世隔絕咁，而且返到屋企食完就訓，對身體又唔好，又無時間做facial，皮膚差左少少添呀．所以一到星期六日，我就最忙，起身之係做個全面facial，然係睇下報紙，如果唔累的話，會出下街，唔出街的話，都要check email同整下個homepage，有時又要做下家務，連星期日都咁忙，真係充實啦．哈哈．．
18/9
一早搭車就發生一些事．由於太多人搭巴士，就算平時唔多三個人坐既三人座，都坐滿，而我今早就坐三人座既最入．初時只係一個同我差唔多年輕既男仔坐，後來又多一個人，所以個男仔迫埋離，而佢個膞頭自然會貼埋黎，我都算．之後佢訓覺，但佢個大比貼埋黎，我即刻縮，佢都好自覺縮埋，都算佢啦．話時話，有d男人真係好衷格，詐訓索油，我最憎呢d，所以女士們要小心呢d人呀，如果有唔對路，就走啦或者用袋隔住，比個袋佢掂到都好過比佢索油啦，本小姐都試過唔少次呀！
我開始學出入口既野啦，真係好多野要跟，學到唔少架，宜家都習慣左個環境，同同事又几好，有時同佢地講笑真係好開心架，笑到我咸架，宜而大家係工作上又互相支持互相鼓勵，有八街野大家又講下知下笑下，個感覺都唔錯，而且個老闆又好就我，又同我講笑，笑到我死，佢仲話我仲乜成日都笑佢．哈哈．
21/9
今日係中秋節，我今日出左街，為的是買件衫比爹地，買隻手錶比媽咪，雖然好累但都值得．
22/9
今日好累好累，要訓到十一點先起身，睇完逃學威龍又訓三個鐘，以前都唔鐘意訓同埋好難入睡；宜家就好訓，一訓就兩三個鐘．明晚係我上夜校既第一晚，唔知點呢．我都諗住返學前飲番雞精提神先．
14/10
都隔左好耐無寫了，一來之前好忙，但宜家就好得閒，因為我辭左份工．辭左份工之後個几日，日日都有工見，而且比以前見多左，見既公司都唔錯，不過始終都要等消息，希望比我係個間珠寶公司做啦，因為好似好有前途咁．
16/10
好開心呀，今日收到個電話叫我返工，果份工仲係我好寄望既工呢架，雖然好興奮，但同時亦都好緊張，擔心做唔好，希望我會做得開心同耐d啦．