| 3週刊- Mini Cookies 四朵金花 | |
| cookies info |
原本九為一體的Cookies，踢走了五餅女，變成了Mini Cookies，剩下的四餅女Stephy、Theresa、Miki與Kary，理應是最卜卜脆的四件，不過Cookies正在招募新成員，新鮮熱辣的曲奇餅即將出爐，她們過五關斬六將留下來，逃出生天的滋味已經不好受，然而前面的路更加險峻，稍一不慎隨時被淘汰，連渣都冇得剩。 Cookies好比生長在溫室內的九朵小花，被摧花人摘去五朵，從此在外日曬雨淋，溫室內的四朵每日膽戰心驚，惟有竭力吸取養分，希望自己長得更燦爛奪目，也許有天會遇上惜花人，把它們好好栽培，可是花無百日紅，再美的花總有凋謝的一天，好命的話被製成乾花，才能苟且偷生，但顏色始終暗淡無光。 今年初轉投金牌經理人黃栢高旗下的Mini Cookies，四餅女一改以往啦啦隊的造型，騎呢制服不再，改頭換面轉走青春少艾路線，四朵金花茁壯成長，繼續爭豔鬥麗。 很難得Mini Cookies可以齊人做訪問，以前九餅合體，三個女人一個墟，吵耳到不得了，現在四人剛好可以開一枱麻雀，沒人騰出來要做斟茶遞水的工作，她們你一言、我一語，同樣具震撼力。 風頭直逼Twins 去年暑假，剛出道的Cookies強勢出擊，九餅女柴娃娃闖樂壇，風頭直逼人氣女子組合Twins，她們的首本名曲《心急人上》唱到街知巷聞，就連一班大學男生都模仿她們組成Aunties，自家製作男版《心急人上》，此MTV不單止在網上廣傳，他們更巡迴表演，在台上露腳毛大唱大跳，成為一時佳話。 九個女孩子湊在一起，是非亦隨之而來，被選為隊長的Stephy曾遭杯葛，Miki與Shine成員徐天佑鬧緋聞，已淘汰的Angela又被翻舊賬曾拍三級片，關於她們的新聞層出不窮，不過一開始便說明Cookies的概念是抄足日本女子組合Morning娘，換言之即是隨時會飛人，然後換新血，能成為Cookies成員當然難能可貴，但壓力絕對不輕。 四餅劫後餘生 今年初多次傳出Cookies將會有變動，大家都在猜測當中誰人留低、誰人離去，相信她們都清楚知道始終有人要離隊的事實，在一次公開演唱《最後一塊》時，九人想起將要離別都哭成豬頭一樣，結果四月正式宣布僅得四名成員可以留任，Stephy、Theresa、Miki與Kary成為劫後餘生。 餅女各有特質 四人能夠繼續做餅女，當然有其過人之處，她們性格迥異，有靜有動，放在一起卻產生化學作用，究竟她們認為自己有甚麼長處才能留低呢？ Stephy：我個人幾成熟，諗野會理智同全面D，可能比較適合做Cookies，其實大家都有唔同特質，遇到問題我會好平和，然後冷靜去處理紛爭，以前九個女仔一齊，意見一定好多，我會攤出嚟講，諗得清晰唔會亂，綜合所有人既意見後再慢慢諗，通常都會做最後決定。 Kary：其實諗番起年紀可能係一個優勢，我係最細既一個，細D機會好似多D，仲會多D人幫，我出道乜都唔識，做錯就會有人教，而且唔會俾人鬧，年紀輕取勝少少。我諗野冇咁成熟，好多時諗唔明會問人點樣處理，佢地亦好照顧我。 Miki：我覺得自己冇乜可取之處喎！樣樣都差唔多，乜都好平均，可能係性格外向啲，我好鍾意同人玩，不過好講夾唔夾，通常第一眼就知道合唔合眼緣，我以前對人會熱情D，而家靜D，因為我講野好直，容易講錯野得罪人。我既優點係開心囉！哼！哼！哼！（發出怪異的笑聲） Theresa：我每一方面都好平均，不過我好肯去學，優點可能係勤力，每當我覺得自己跳舞跳得唔熟，我個心都會好唔舒服，所以要好努力去練，要跳到熟先至肯停。 無懼歲月摧花 一直以來Cookies的賣點都是青春活力，四人均是花樣年華的美少女，從沒想過青春是女人的大敵。 Stephy：人愈大，賣點當然會唔同，我哋唔可以停留，要不斷演變、進化，好似而家Cookies少左人已經有變化，我地冇咁細路女，而且我相信每一年都會有轉變，隨住唔同年齡做唔同既野，欣賞我地既人會一路支持。係人都會怕老，我都驚架！只不過而家仲細，冇話諗咁遠，最緊要係做好目前既野先。 Kary：我就話細有細好，大有大好，D人成日話我細個唔夠成熟，機會可能少D，大個D可以有多D嘗試，變化都多D。 Miki：講真，我一D都唔驚老，人就係咁架啦！呢個係命運，遲多幾年大個D，我可能已經唔係Cookies，不過會響第二方面發展，當Cookies換上新一批成員，我地就會變成前輩，到時咪做其他野囉！我已經下定決心響呢行一直做落去，亦冇得番轉頭。 Theresa：人始終要長大，唔同階段就要做唔同既事，以前Cookies賣青春活力，成隊啦啦隊咁，而家少女得多。其實有D野唔到自己話事，亦都控制唔到，我只可以自我增值，豐富自己既知識，對做任何事都會有幫助。 愈叠馬愈熱鬧 餅女由九變四，難保他日會再改朝換代，但她們卻下定決心，無懼威脅，即使要面對被淘汰的局面，也只會當作是另一個新的開始。 Stephy：我慣左好多人一齊做野，得番四個人冷清左，所以好想加人，感覺熱鬧D，而且係一種挑戰，咁樣先會有進步。從第一日入娛樂圈，就知道呢個圈好現實，我既心態係有乜就做好佢，唔諗得咁多，就算面對被淘汰呢個事實，都係理所當然。 Kary：我當然有諗過淘汰呢個問題，就算加入年紀細過我既新成員，對我都唔會有大轉變，反而更有挑戰性，我好鍾意做呢行，只希望喺唱歌方面發展。我以前對自己冇乜信心，但係愈做愈有，我會諗身邊人個個都靚過自己，身材又好過自己，我可以匿去邊？我惟有催眠自己，要向好果方面諗，可以留低並唔代表係最勁，但係我會努力去大做。 Miki：一直以黎我都預左有新成員加入，可能咁樣大家會開心D，識多班朋友仔，有新既火花。我冇好深入去諗淘汰呢個問題，順其自然囉！今日唔知聽日事，不如做好今日既先。 Theresa：我從來冇諗過做其他方面既野，我中六讀左一個學期就退學加入Cookies，當日已經下定決心，亦證明俾屋企人睇我有諗清楚，我絕唔會諗如果唔得會點，只係想盡力去做，唔想自己後悔。 她們的心底話 人與人相處，難免會有衝突，重組後的Mini Cookies不和消息絕跡了，四個人一條心，更加珍惜逆境中建立的友誼，間中吵嘴只為緊張的生活增添不少樂趣，且看她們怎樣互相批評共勉之。 Stephy：Kary呀！好嘈囉！見到佢會好開心，佢份人好直好爽，玩得之餘工作好認真，佢外表雖然低能D，成日傻更更，但諗野可以好成熟，係一個叻女；Miki好簡單，佢好鍾意笑，好鍾意同人講野；至於Theresa呢！佢係緊張大師，對所有野都好執著，對自己冇乜信心，有時明明可以做到，但硬係覺得自己唔得，追求完美係好，但太執著就唔好。 Kary：Miki乜都冇所謂，佢好Sweet，你打佢佢都會笑，好難先整嬲佢；Theresa成日都俾我蝦，佢係一個好勤力既人，冇野做會狂嗌悶，佢身上我學到要追求完美，好多野我會「Har」過就算，但係佢好執著，每次表演完佢都會仔細檢討。Stephy好神秘，佢處事好冷靜，但又可以玩得好癲，不過佢絕對係深不可測，喜怒亦唔會形於色，我希望佢可以表達出黎，外露D！ Miki：Kary佢有時太癲喇！無時無刻都「Be-Li-Ba-La」，有時想一個人靜吓，叫佢唔好嘈佢都會煩住晒，呢樣野有好有唔好，起碼佢帶俾我哋唔少歡樂；Theresa要求好高，成日覺得自己好有問題，仲有呀！佢已經係最瘦嘅一個，但仲成日問人係咪好肥囉！上車落車都問，你敷衍佢都會照問；我平時同Stephy好熟，乜都會講，但係唔知點解，我始終唔係好知佢深入啲嘢，亦唔係好知佢性格究竟係點？ Theresa：Kary成日恰我，係小霸王，我好了解佢，亦因為佢最細，所以好錫佢，佢成日嘻嘻哈哈，響工作緊張既時候，佢可以令我地輕鬆D，唯一缺點就係成日恰我；Miki份人好隨和，佢諗野好簡單，可以話係好純，不過佢既笑聲有問題，都唔知佢係咪真笑，同佢傾偈好舒服，感覺好好；Stephy真係好神秘，同佢可以有好多話題，但傾左好耐都唔知佢點諗，不過佢諗野係比較成熟，而且超級冷靜，不過摸唔清佢。 Cookies從未變過 四人輪流說過對別人的感受，當中Kary的反應最激烈，因為她不滿被批評是最嘈最煩的一個，隊長Stephy果然是大家口中的神秘人，她非常冷靜地說：「我有去表達自己，但真係唔知點解你地會唔了解我，我亦可以玩得好癲，但係冇人會明白我，可能我都唔了解自己啦！」 Mini Cookies始終是四個獨立的個體，大家都有自己的性格和處事方式，要完全了解一個只是相識了年多的隊友，還需要一段時間，看見她們吵完嘴又繼續嘻嘻哈哈，可知道四人間並沒存在芥蒂。 九人又好，四人也好，Mini Cookies始終沒變過，一樣是隊形十足，而且依然嘈吵呢！ 溫室的小花 要四小花選擇一種花來代表自己，Stephy選了象徵純潔及高貴的百合；Miki選了象徵熱情及活力的太陽菊；而Theresa及Kary就同樣揀了代表愛慕及崇拜的向日葵。 Stephy：我酷愛白色的花，而且百合只有幾瓣花瓣，簡單得來已經很美，感覺也像我比較簡單而大方。 Miki：本來我是選擇向日葵，因為給人很開心的感覺，但後來發覺太陽菊較為嬌小顏色也較奪目，跟我性格比較相似，給人的感覺同樣是很開心。 Theresa：我本身喜愛陽光與海灘，每逢陰天都會很失落，向日葵就代表陽光，感覺上很積極，跟我做人的態度較相像。 Kary：向日葵看上去好像有個大嘴巴，就好像我一樣，哈……！給人開心、美麗的感覺，而且很有活力呢！ 訪問前想到買甚麼花呢？大家想也不想便認定Stephy會揀百合，而Miki就會選擇太陽菊，最後結果跟預期的同樣不謀而合。雖然沒有猜中Theresa及Kary的選擇，但是由此可見這四朵小花在複雜的娛樂圈打滾了一年多，依然沒有被世俗所污染，仍保存著在溫室的純真。 |