識我o既人都知道我好鐘意貓，又係真喎，我覺得貓係世界上最靚o既動物，佢地對眼真係好有神，又大又靚，哈哈，可能食得魚多啦!!不過有d人就話貓好高傲，唔想睬人，我都覺得自己個性格幾似貓，忽冷忽熱，好難觸摸。其實我好細個就接觸貓，因為細個o個陣每個星期六我地成家人就會去我大姨屋企過夜，佢屋企養左兩隻貓一隻狗架，所以我同佢d寵物就成日接觸喇。

佢有兩隻貓，亞媽叫"細細"，個仔叫亞金，佢地係家貓。細細係一隻花貓，佢個鼻仲有粒墨架，好好笑，至於性格就好純，佢係爸爸o係士多偷架。亞金就係一隻金色o既貓，佢條尾好得意架，條尾o既尾部成個波咁，好可愛。不過亞金比細細早死，佢死之前病得幾緊要，又唔食野，連行都冇力。細細都係病死架，因為隻狗Bobby死左之後，佢就唔食野喇。亞金死o個時我仲細個，都未識傷心，到細細死o個陣我真係好唔開心，因為我同佢好有感情，佢成日陪我溫書，我又同佢玩，而家諗返都仲係咁難過•••

而家，就有我o既王子陪我，佢係英國短毛，係靚仔黎架，我係公主佢係王子，關係仲好親密。其實佢係我同小狐狸o既仔先真，佢又叫做狐狸貓，第時佢老婆就係o亂毛喇，好期待我地一家4口一齊生活o既日子。