我信主之前係一個極之無聊既人，冇乜理想，過得一日得一日，果時覺得Ｄ人信神佛好蠢，但係，我由２年級開始就有返學校個主日學喎。當時係因為成班好同學都返，我就打算同佢地一齊返，返到去，唔係搞破壞就係傾計，導師講既野都冇幾樣有聽過入腦…直到６年級都係咁…記得第一次接觸團契，係一個主日學聯少年團既問答比賽，之後主日學既導師都鼓勵，一直都有返團契，直到我Ｄ friend都走晒，我都一直返。初初返既原因係佢好玩過主日學，但返左幾個月之後，導師們就開始同我講耶穌，因為咁，我就認識左佢啦、信左佢。我曾經有好幾段時間完全唔記得左佢，原因係對教會既感覺不如以前，再加上自己Ｄ同學朋友，足足有成兩個幾月冇祈禱，睇聖經，但我都唔覺得同祈左禱，睇左聖經有咩唔同，咪又好似平時咁生活。直到Moniz同我上左一個叫"成長八課"既課程，我認識左神好多，知道左基督徒應該做既野。我開始有祈番禱，睇番聖經。

有一次，我真係感受到神就係旁邊。那次就是一次歷奇營，我同三個女團友貪玩，打算落淺水玩陣，但愈行愈出，就好驚，覺得好危險（之後聽負責人講番一Ｄ都唔危險，其實可以到地既）。神就救左我地幾個（多謝晒馮Sir，戊榮，團長，仲有大家姐），有驚無險。團長就同我講"你都未同上帝做過咩，佢唔會俾你地咁快死住架…"我覺得講得好有道理，要為神做左大事，先死得有意思，每次我好想死既時候呢番呢句野就會冷靜返，你都試下啦！哈哈！之後，返到屋企，俾阿媽狂省唔見左野，當時真係激到跳舞，唸唔到其他野，淨係唸緊點樣冷靜Ｄ，我囉起電話，打左俾Tracy傾左陣計，好番好多，我就好似聽到神同我講野。之後我有唔開心既事，都會祈禱，交俾神。雖然，我呢篇得救見證唔夠人地果D勁，但好希望幫到Ｄ初信者。我信左神之後，的確有左理想，有目標，冇以前咁火爆，又會尊重人地既信仰，睇完聖經都希望可以行到出黎，唔想個聽左道又唔行既人，亦會盡力做到大使命，呢個就係我既目標啦！