ChitChat體壇：甘比爆大鑊！ ■三鬚

　　勉族大佬甘比點解咁火眼，伏係人家changing room門口，又守住馬刺車隊，尋釁半粒鐘才悻悻然離去？NBA籃壇火爆大鑊，三鬚見得多，滾火油鑊下球員互揪，跳觀眾席追打，擾嚷幾分鐘已經好出位，少見紐約大中鋒甘比哥哥咁，比馬刺費利鋤幾下就扯咁長火，要勞煩主席、領隊、隊友、大隊保安都阻佢唔住，連累和事老教練雲根迪被撞爆眼角，縫了十五針。導火人費利又爭唔落，　　一場波兩度肘擊甘大哥仲眼愀愀挑釁人。毒的講句，莫非輸波過龍，想累下對手罰款停賽？係咁，道行咪勁過麻煩大帝洛文，擅長係關鍵時候扯起對隊主將無名火，贏了比賽也賺了風頭，打唔成NBA也可拍戲！醜角之一的費利無乜風度，淨係堅稱自已是無心之失，純係激烈比賽中常見的意外。咁樣講，係人都扯火啦！有誠意既就應該學下當年J博士艾榮既勇於認錯和道歉的風度。入樽創始人DR.J當年係未出道米高佐敦的偶像，隻手遮天。有次比賽和另一紅人喙木鳥布特爭吵出手。事後竟然不怕禁忌跑到對方更衣室，當時人人以為他來尋仇，誰知他伸手道歉。這事稱頌一時。點解以獨食見稱的天皇巨星唔以牙還牙，反而放下face尋和好哩！　　　Dr.J未帶領76自由人隊取得冠軍寶座前曾來港分享球藝和信仰。三鬚有幸獨家訪問他。他還熱情地抱起我拍照（詳見籃體網頁 http://www.bsm.org.hk）他跟我說信了耶穌變了，不再獨食，還故意傳球給無表現的隊友得分。

我曾撰文作預言：自由人隊多了一雙肯傳球的手，冠軍在望了。果然給我命中！勉佬甘仔，與其興合合以眼還眼，不如試下放下自我與人和好，可能因你的成長，紐約人又向冠軍邁進一步哩！