ChitChat體壇：唔想做神的米高會復出嗎？
NBA初賽過了大半，仲係水靜河飛──打架新聞除外。 無工潮，無突出班霸，無令人驚喜的新紮巨星（去年曾偶爾驚豔的高比，今年係成熟左D）。 Playoff未到傷兵哀歌卻四奏，偉大如奧拉祖雲也得了怪病，隨時宣佈退休，斯人獨憔悴。 肥仔巴克利去年（定前年？）俾人抬出場，被迫退休做旁述（三鬚頓時懷念佢係球場巴衰口，口沒遮攔得有幾分可愛）。 肥仔而家日日勤練五小時，減肥外仲野心勃勃話要跟米高佐頓重出江湖。真唔真？米高會放棄做班主，跟阿巴揹起谷底的巫師？米高確實係傳奇人物，傳奇性從高峰退出打職業棒球，搞到佢個仔都唔知爹D係籃球界天王巨星，跟住復出再領風騷又再光榮跟教練退隱過其班主癮。 如果佢真係三入三出真係傳奇中既傳奇。響今日欠缺天皇巨星壓陣的NBA，米高復出故然係球迷心願。而家旺角賣NBA衫既阿伯話自從米高退休，球衫少左幾倍生意！不過米高好識做人，當年退休，謠言四起，有話神傷老爹被殺，有話驚高峰墜下，佢自爆唔想比人捧做神。米高，你係得既！知進退、知人有限制不強求，你永遠係三鬚心中的王者至尊。
