係七十年代某一個清涼的晚上，家在蘇屋的一位陳叔叔在家食飽飽落街搵街坊吹水乘涼之際，有一個圓形的物體從冷冷的小巷滾出來(現代的人稱之為排球)，陳叔叔同幾個街坊覺得好奇怪，但又反正得閒，就同幾個街坊係度玩個波。如是者過了幾晚，陳叔叔同班街坊都約定食完飯一齊玩波，順便鬆鬆筋骨，有時佢地仲會帶埋老婆仔女一齊乘涼玩波，不知幾開心。後來陳叔叔見到幾個豆靚將個波係條掠衫繩上面拋來拋去，見到又幾得意喎，就將班街坊分開兩邊學班靚仔一齊玩個波。又如是者過了幾年，陳叔叔同班街坊晚晚如是，已經將個波玩到出神入化，仲自己訂立一些規則，仲比賽計分添。後來有一個叫B仔豆靚大學畢業，衣錦還鄉，有一晚見到陳叔叔佢地係度玩波，大家玩得好開心，B仔就同陳叔叔講係城市都有人玩緊呢種波，仲將排球知識同規則講解俾陳叔叔同埋班街坊知，成班人聽得津津樂道。自從個晚之後，陳叔叔因為B仔所講的排球故事攪到晚晚失眠，最後佢按奈不住，立刻召集班街坊開緊急會議，就係個晚，陳叔叔就成立蘇屋排球隊，希望同其他球隊切磋切磋。初初幾年，球隊成績彪炳，終於打響名堂，可惜因為陳叔叔年事已高，無能力再帶球隊南征北討，球隊成績不斷下降，最後更因陳叔叔要臥床休息，球隊最後也淡然離開排球圈，陳叔叔一統球壇之心願亦不了了之。之後，亦有好多熱愛排球的人仕希望用蘇屋排球隊的名義去延續陳叔叔之未圓夢。

直至2003年一個雷電交加的晚上，現任總教練陳老師和張教練不知從那個三姑六婆得言知這一個可歌可泣的故事，便決心集合一群對排球運動熱愛萬分的有能之仕，重整蘇屋排球隊，試圖一統排球壇，延續陳叔叔的夢想之餘，還努力將排球運動推廣開去。但係先從哪裡開始呢？正當兩位教練因此事傷腦筋之時，俾佢地遇到一年一度的中秋節，正所謂人月兩團圓，兩位教練正同家人一齊慶祝，開開心心玩燈籠食月餅，咁橋俾佢地同時見到一種應節之水果"沙田友"，兩人當時一個眼神交流，好！就從沙田開始，集合一眾沙田友梁山好漢成立沙田排球會，創一番事業。

故事到此為止，信不信由你，信則有不信則無。但據聞個位陳叔叔現隱居於沙田馬鞍山某處，當你某日係馬鞍山見到一位伯伯係樓下公園玩波玩到出神入化，可能佢就係傳說中的陳叔叔，記得同佢打個招呼，多謝佢對排球作出的貢獻呀。