31 May 2001....Thursday

今日終於落大雨，熱左咁多日，都係要過一過冷河o既，唔係人都癲呀！今日買左個新o既harddisk，因為我家陣係咁download歌，唔頂得幾耐架嘛，ｄprogram呀game呀又食位，裝多幾個都唔得掂！買左番o黎，整左成晚，明明係20.4GB，FDISK都係得三千幾Mb，都係聽日拎番去舖頭攪攪先得啦！今日先知，原來我部電腦粒Ｕ要換o既話，就要換埋底板，如果唔係，就買粒舊Ｕ；哈！電腦世界真係變得快，塊板上年中ＣＩＨ先換咋，咁快就唔入流。

以前：一台電腦用上好幾年或者十年，家陣三日唔埋兩日又要換呢樣換果樣，有時唔係你要趕潮流，而係呢個圈已經容納唔到你ｄ只係舊左少少o既野，你要繼續就要跟；手提電話，function唔夠多，無得入歌仔無圖象顯示上唔到wap無得換殼，就唔夠ｉｎ，於是每日都好多人去手機舖門口，好似睇實個股市咁，睇下有咩新貨到，第一時間去掃；女裝衫褲涼鞋，幾十蚊件幾十蚊對，著一季就唔興；識女仔，香港ｄ又吋又大女人，唔識溫柔唔幫你洗衫煮飯生仔湊仔搵錢多過你，唔緊要，唔希罕，國內咁多美女等住我去慰藉佢，使咩受你氣；等個拍左拖十年o既男人同我結婚？唔需要喎，使少少錢上大陸mark仔，個個禮拜唔同款都得，要幾浪漫有幾浪漫啦，日日都可以重拾十年前初戀個感覺呀！

快……真係轉得好快，快到個個都未必知自己做緊咩，又或者係咪想咁樣做，快到抖唔到氣，所以連ｄ人自殺都快ｄ，唔需要再三思而後行，租間屋買包炭set個爐，最多搵膠袋封埋個煙霧警報器再寫多封遺書囉！

我都係白痴地比較鍾意：呢部電腦無壞我都唔想換，唔好放咁多野囉，聽歌咪快ｄ整番部心愛mini hi-fi，買碟聽囉，ｄgame呀programe呀無用咪鏟囉；手提電話打得到收得清咪得囉；衫呀鞋呀，要換款，但買ｄ襟ｄ款色簡單ｄ，肥左唔o岩著都要留架，十年後可能興番，又或者希望自己有日瘦ｄ著得到；感情隨緣囉，唔一定要搵ｄ人去慰藉自己，殺到o黎又o岩o既咪去馬囉！但係最想呢，就係可以好似以前細個時，同學朋友會親自走o黎你屋企門口搵你去玩，傾計仔咪"mou"o係冷巷尾傾囉，無話要打電話架喎！我諗我鍾意睇日劇都可能係呢個情意結，成日都見本村松隆子佢地ｄ人行好遠路都要上門拜訪o既，真係好鬼正！依家o既香港，隔離屋姓咩都未必知啦！

30 May 2001....Wednesday

又係半夜時份，四點啦，明明週身骨痛，仲係唔死去訓，聽日又死得架啦！

今日聽講"電腦室的風波"已告一段落，咁咪好囉，大家四四六六拆掂佢，唔使面左左，不過我發覺阿劉真係好鬼醒，咁快就攪掂，如果俾我，可能仲嬲緊仲煩緊仲唔開心緊，我個人真係唔係好大方架咋，扮大方就得o既，總之佩服佩服啦！

頭先又做左ｄ滿足一己私慾o既野，download歌囉，其實搵搵埋埋做咩呢，唉，個硬碟已經就o黎爆架啦，仲死去搵歌，不過呢ｄ野真係情不自禁，唔做對唔住自己呀！一向只買正版CDo既我，已經破哂戒，咁同買老番有咩分別喎？ｄ歌實在令人懷念 ~~~ 我覺得非常咁正呀！！！！！

28 May 2001....Monday

估唔到無啦啦尋晚又通宵，同阿劉，兩條友，攪網攪歌傾o下計，就到天光！不過因為臨天光佢先提醒我今日係要影畢業相，我o係無咩裝身兼趕車o既情況下，就出左去同佢食早餐先，返o黎再玩過件衫做個daily mask再加個水份mask，攪攪個頭咁先返學，不過攪左同無攪都差唔多，可能係本身個人問題，咁呢ｄ大家都知，唔使我再詳細說明啦！

上晝其實唔記得自己做過咩，印象好模糊，因為差不多中午時份已經有些少虛脫現象，個心跳得好快，個人軟弱無力，就係咁，又再攬住我個cookie monster即場昏迷兼流口水，到放工時佢地先叫我起身，慚愧？少少啦，不過無辦法，我地ｄ扮ＩＴ人梗要扮埋日夜癲倒先夠神似嘛！不過咁真係會死快ｄ，一時又好早，一時又好夜，一時又唔訓，一時又訓十幾個鐘，我都唔係好適應得到，何況身體入面o既機器！

尋晚無訓o既原因係我學識左將CD Track轉做ｒａ，我知好易，好多人都識，但呢個唔係令我唔訓o既主因，其實主要係挑選唱片時，我唔知點解突然諗番起呢隻碟，左搵右搵，終於發現，一播之下停唔到手，最後做左呢隻碟幾首心水之選o既ｒａ，好想好想放到網頁上做background music，於是攪埋哂佢，嘩！主頁個音樂十二分之正，音樂一起，再望住ｄ魚魚游游o下，可以用"賞心悅目"形容，心情忽然有少少激動，估唔到效果咁好，可能你地會覺得誇張，但呢個絕對係我當時o既心情，滿足度係十分呢！呢隻碟已經係九三年買，每次聽到，情緒都不其然變得激動，心裡面好似有ｄ野"硬住"，總之個感覺好難忘！跟住阿劉又介紹左個search engine俾我搵歌，知佢搵到隻"super woman"，我又突然想起要搵一隻歌，但係真係唔記得歌名同邊個唱，搵左好耐都搵唔到，我只係知有隻廣東版係張學友o既"再愛上你"，"情不禁"或者"每天愛你多一些精選"都有呢隻歌架，而我就係想要英文版囉，各位摯愛親朋，如果知道呢隻歌係咩名或者邊個唱o既，通知我一聲啦！唔該哂啦~~~

27 May 2001....Sunday

都有一排無BBQ啦，尋晚就有幾個朋友o既親戚、朋友o既親戚o既朋友到o黎燒一燒，幾條友就o係一個小小o既天台度玩左幾粒鐘，都唔知點解可以玩咁耐，如果係幾個人圍住個爐傾o下計，食o下野飲o下酒都話可以成晚，但係佢地又唔係幾抵得熱，又唔係好食野，又唔係好傾到咩計，點解可以o係天台玩成晚呢？原來重頭節目係劈酒，先玩"nut"麻雀，再猜十五二十啦、"吱吱喳"啦，係咁飲，仲話爭ｄ骰盅添，於是攪到好似去左天台ｂａｒ咁，四條友就係咁樣飲哂ｄ啤酒啦！跟住咪去我房到坐o下囉，突然發覺其中一個全晚都好high o既dee dee入左廁所好耐，又無聲，我屋企又無浴缸，唔會就咁訓左掛？拍門又無反應，門又反鎖左，好鬼驚架嘛，好彩條房門匙可以開埋廁所門咋，跟住另一個哥哥入去，哈哈，原來佢坐左o係地下，神智不清，無哂反應，又嘔左少少，好好笑！跟住o既一個小時佢老婆同朋友就負責服侍佢，佢地話未見過佢係咁架喎；好啦，出o黎上床眠一眠，點知佢又"那"高件衫，仲要個樣好似ｄＡＶ女郎對住個鏡頭咁姣，擺哂post果隻，朋友俾件衫佢"come"住，佢又唔要，死都要拎張被，咁佢地唔想佢整"那渣"我張被，咪死都唔俾佢囉，佢又死都要，跟住佢老婆一巴扯過去，哈哈，好似鬼上身俾人用筷子一夾咁使得，真係乖哂！佢就訓o係床上面，佢老婆就跪o係地o下"bok"係床邊，我地就坐床尾呀，坐�_，個畫面真係好似等緊一個昏迷緊o既病人起身一樣，真係爭在佢老婆未捉住佢隻手叫佢振作ｄ咋！諗番都覺得勁攪笑……最後我地就係咁o既陣勢同姿勢o係度睇左套"朱麗葉與梁山伯"直到天光啦~~

見到佢咁，我真係要再次再次提醒自己，o係出面唔好飲醉酒，最多返o黎屋企嘔~~~

26 May 2001....Saturday

尋日發生左一件唔開心o既事，雖然唔直接關我事，但係依然覺得唔係幾開心！

阿劉俾人恰，恰到喊，經過了解各個證人o既口供，我都覺得beyond唔o岩，點解要攪到咁呢？經過呢件事，我又會諗o下自己，我平時都好惡死架喎，無啦啦會發癲架喎，咁我其實都好hurt人，希望我都唔好再咁黑人憎啦！咁beyond又控制o下自己啦！

24 May 2001....Thursday

今日依然好熱好哂，但係我居高臨下，所以都有ｄ風，幾涼爽！可惜，我飲緊beer beer，所以都有ｄ出汗，生力super light，都幾好飲！

可能太熱，連小強都出o黎行o下，頭先發現一隻勁大小強，嘩，真係大隻，但係我o既殺蟲水俾米高拎左去用，手無寸鐵，又要鎖緊目標，點算好？隨手搵本忽然一週掟佢，諗住掟暈佢都好啦，點知仲衰，落左去電視機櫃後面，太多阻礙，無得捉，唉，打定輸數由佢o係度一晚啦，點知佢買棺材唔知訂，公然挑戰我，俾我見到佢o係衣櫃面，即時一手拎住忽週拍落去，斷左隻右腳，死左，不過無一ｐａｔ野，終於都有得安樂死…唔係，係安樂訓！訓ｌｕ．．．．．．

20 May 2001....Sunday

今天天氣熱得很，成身"香"汗！呢排真係，時晴時雨，攪到個人都唔知點咁！

星期五，又一個"經期前情緒失控"o既好例子：我為左唔想ｄ學生再用ｄ膠叉羹，發左一場好大o既脾氣，係爆粗兼鬧老頂，個個都唔敢惹我，因為真係好認真o個隻，唉…我都知衰架啦，次次發完脾氣都有ｄｄ後悔，但後悔o既唔係覺得件事唔o岩，係點解攪到咁，不過，依家諗起，我都仲係唔高興，都唔明，一邊就話要攪好行為秩序，但一邊個個都就哂ｄ學生，係好就喎，又俾佢地入輔導室涼冷氣，講左九十幾次叫ｄ學生自己帶食具，我仲要叫個供應商免費sponsor餐具套裝俾佢地，等唔好咁浪費啦，順便等佢地知知地咩叫環保，點知，成班友日日都話唔記得帶，日日都係o個班人，最慘日日都俾我見到，咁佢即係當我傻啦，好啦，有ｄ知我會鬧，就走去問人地送飯o黎o既拎，又俾我知道，咁究竟係咪我不近人情？ｄ細路有時做ｄ野，盲o既都睇到佢地係特登定係無心之失，如果我知佢地特登o係學校玩野，對唔住，我真係唔會手軟(不過有時ｄ同事自己俾人玩都好開心 ，係呀，話緊你呀老鄭！)，如果佢串，我一定仲串過佢架喎，呢個唔係自己尊嚴問題，係佢思想行為o既問題，如果你縱佢，你即係話俾佢知佢咁做無問題，個個都話細路仔要慢慢教，但有無真係教得有效先？日日都講住同一番無咩作用o既說話，佢地會聽得入耳咩？佢地只會"咀妙妙"，自己諗o下日日哦住o個幾句係咪有用？我地係大人，好多時人地苦口婆心同你說教，你都當佢耳邊風啦！打成一片唔代表可以俾佢玩你嘛！聽日，我會繼續抗議膠羹事件，就係唔理，咩都唔理，咩都唔跟，不過對自己無好處，因為阿頂實會捉我入去哦番粒幾鐘，佢成日都係咁架，要人地發脾氣先得，佢鬧我都還好，最慘佢係講埋ｄ唔啦肺o既所謂道理呀、陰謀論呀，又成日講：關，你唔明架啦，我有我o既用意，你出o黎見識少，仲後生，哈！我呀，當年……，一出"當年"呢兩個字，我就知死得架啦！唉……做"八婆""管家婆"真係唔係幾過癮架咋！

今日仲慘，掃地拖地洗廚房，點解咁乖？我都唔想架，事緣尋晚九點幾落去廚房拎野飲，o係樓梯已經聽到有水聲，以為係個金魚缸ｄ水聲，點知落到去，一開燈，水浸！點解呢度咁邪架呢？上年一搬o黎，已經失驚無神水浸左一鑊，係大大鑊，跟住又電腦中毒，到今年又差ｄ火燭，依家又o黎水浸，見到o既時候都幾唔like架，嘩，都唔知邊鬼個開大哂個水喉，ｄ水係咁流，咁o岩個盆度有d野塞住左，所以攪到ｄ水流哂落地下，水浸左成個廚房，好在無流到廳咋，如果唔係，又唔知會唔會漏電又或者浸壞埋我部陳年playstation呀！個石油氣爐下面濕鬼哂，我見到都好無奈，又夜啦嘛，又眼訓，終於咪等佢慢慢流番落坑渠度，今日先攪囉！還掂都係，梗係要成個廚房洗過啦，ｄ水同ｄ油積一齊好核突架嘛，最後整個清洗時間係三個幾鐘，真係人都癲呀！而經過查探，兇手應該係阿老細，因為尋晚屋企無其他人，老二老三返左大陸過夜，阿米高返工，佢應該唔會咁無手尾，而且發現有人煮過飯o既痕跡，所以，我肯定佢係兇手，可能飲大左無閂水喉。今日中午見到佢飲完茶返o黎，我拖緊地，真係好想問佢係咪佢做架，不過最後都無開口問，算囉算囉，當減肥啦！

17 May 2001....Thursday

好鬼眼訓~但因為好似幾日無寫野，都要寫番幾句！

今日做左好多野，就係因為ｄ學生唔使返學，所以做左好多無謂野！首先返去睇o下網頁，又搵o下活動日有邊度好去啦，因為阿抄報告個東涌炮台唔多掂，所以要另尋地方；跟住阿鄭請飲茶，返到o黎無耐又三點，幾條友o係電腦室攪o下lee，攪o下路，聽o下鬼故，忽然想聽軟硬，於是幾個就一路聽一路笑，阿鄭仲笑到有抽搐o既情況出現，攪到我驚驚地，原來佢係未聽過架！四點半，朋友突然call我出去tea，兩公婆放假去新屋睇睇喎，於是順便坐阿抄架電單車出去，嘩！真係呢有少少膽怯，幾驚架！好彩終於安全到步；中間阿敏敏又打俾我，約我地食飯，順手去新屋欣賞一下，幾好架間屋，我地又多個新地方玩呢！之後返到屋企又要洗衫又要聽阿敏敏傾訴心事，到家陣十二點幾啦，唉∼成個幾禮拜到未超過九點訓，今朝仲六點起身晨運，依家有ｄ虛脫，ＺＺｚｚｚzzzzz∼∼night night!!

11 May 2001....Friday

o岩o岩返到屋企，好�ョA因為今日晨早起身去個seminar，為左唔好失禮人，於是尋晚去左洗頭恤髮，好似好大陣仗咁，但如果我自己吹頭，個頭會好似"步驚雲"，所以都要拎幾十蚊去攪攪佢！咁大個女，去髮型屋咁多次，最唔滿意係今次；家陣ｄsalon洗個頭好平，平時見到四十蚊都有，尋日去o個間廿八蚊，因為上個禮拜去過剪髮，都幾好，所以今次都去。我就無mark開人攪個頭o既，通常都係是但搵個，於是今次都係是但啦，有個阿姐幫我洗頭，但我覺得佢係同我洗埋塊面囉，都算啦，到吹頭，o個條似中年古惑仔，我都唔歧視佢，我一坐底，想點煙，個睇住我想點煙架喎，但佢仍然係亂掃我ｄ頭髮，ｄ頭髮掃哂o係我面前，攪到我點唔到煙，大佬呀，你有無當我係客o黎架，停一停唔會死掛，咁我咪發老脾掟底支煙囉，咁佢keep on吹頭，但係真係吹到你頭到暈埋o個隻，跟住用梳，佢就吹到紮哂馬，拗哂腰，使唔使呀我心諗，梳頭時將ｄ頭髮扯到行一行，驚死ｄ頭髮唔斷，咁ｄ頭髮拮到我對眼，我想撥開少少，佢即刻話：等陣先，唔好整住，一陣吹完先啦，你咁樣阻住我架！嘩！你老fing�魽A我即刻黑哂面，係勁黑，佢無理我架，激到我�魽I我心諗，你條友都唔知係咪成日fing頭，fing完自己個頭就fing我個頭，點知隔離企左個女仔o係度吹緊自己個頭，仲同佢講：我尋晚同阿邊個邊個跳舞，跳左成三個幾鐘先至落去買藥食！跟住佢話：我又係喎！呢ｄ原來真係有樣睇架！好啦，吹完，個頭係乾，但完全唔o岩feel，我心諗，算，我今日忍你，到俾錢，我一蚊tips都無俾，反正你都收我九蚊護髮素啦，態度又差，你都唔care我呢個客啦，俾條命呀俾！無下次囉！本來都諗住第時o黎做color，你都唔想做我生意，咪由佢囉！真係呢，係我先忍得佢唔出聲渣，俾第二個，一早出聲�u你啦！都唔知係咪出o黎撈架！

10 May 2001....Thursday

依家係零晨四點，唔好以為我又通頂，其實係o岩o岩起身，尋晚就兩點半起身，因為呢一返屋企就訓，所以就半夜起左身，都唔知做咩好，於是就食o下野，上o下網，追o下蚊，"Our"o下痕咁囉，零晨五點仲拎番隻"孤男寡女"出o黎睇，睇到天光，幾正呀！

尋日下晝突然天色變黑，橫風橫雨，勁大o既風吹起哂d木棉棉花，係風中飛舞o個隻，好壯觀，幾鬼浪漫呀！ｄ學生仔個個都乘機搏亂，特登行出行入，個個都大叫：落雪呀！好攪笑！但隨即落大雨，我同ｄ同事就慘啦，要攪佢地放學，攪左好耐，好�レn煩！所以呢，我係死都無諗過做老師架，可能人工福利好，但真係老命都俾埋佢架，好鬼辛苦，呢個世界就係咁架啦，受人錢財替人消災，有得必有失，我情願做一個小小小書記，唔使咁大責任感同壓力嘛！你睇你睇，我真係幾唔長進架∼∼

8 May 2001....Tuesday

今晚又係一個失眠夜，本來一點已經offline，熄哂燈，上哂床，可惜，磨左成個鐘，都係訓唔到，個人愈來愈緊張，鬆弛唔到，所以又再上網，又再做網上面o既一隻遊魂。

去豆釘劉"拎一拎"度睇人地ｄ網網，係睇哂佢度ｄlinking，發覺佢地ｄ網網內容好豐富，見得到佢地用左好多心機，無論網頁設計啦，內容啦，都好正，我覺得佢地唔係識畫公仔o既，就係好識用文字o黎表達自己，仲有呢，佢地大多年幾都係十幾歲或者二十出頭，構思意念都好豐富，好有風格；再睇佢地o既記事，生活都幾積極充實，好羨慕呢！

反而睇"撲碟園"，有番ｄ年近三十(雖則重差三四年)人生o既感覺，老啦，真係老啦，想扮天真都唔得呢！(其實我話緊你呀~~劉!哈~哈~哈~)

6 May 2001....Sunday

原本星期六拉隊上深圳，但最後取消左，無得去！

今日收到媽o既電話，主要都係關於屋企o個個"病人"，一個無得救o既人，我唔知我呢個做家姐o既係咪真係對佢關心不足，我唔知佢有"病"係咪我攪成咁，但對於我o黎講，我已經唔想再理佢，真真正正唔想！我媽問我可唔可以收留佢，我一口拒絕，問題唔係有無地方，而係，佢唔值得！我自覺係一個好感情用事o既人，"情"好影響我，但我唔知點解，對呢個屋企真係唔留戀，呢個家o係我心目中應該係一早要散，只不過拖到今時今日；其實，呢ｄ都係人同人之間o既感情之一種，緣來緣去，無話因為係一家人就一定要唔分開，分開只不過好似拍拖咁分手，無咩大不了，最多咪傷心一陣，平靜落o既之後，都只不過係一場回憶，賽翁失馬，嫣之非福！好似好洒，你地實會話依家我梗係咁講，但我想話你地知，係呀，我係一個好情緒化，好感情用事o既人，但人會疲倦，當你不斷咁有好多野煩你，令你唔開心，初初會接受唔到，但如果你唔選擇離關呢個世界o既話，呢ｄ野慢慢就會習慣！有事o既事候咪見步行步囉，好多野都唔係你控制範圍之內，所以就繼續做自己鍾意o既野，隨心而行！

我媽話佢頂唔住啦，可能走，佢呢排已經係第二之同我講，第一次係順口咁講，咁我就話：走啦，快ｄ走！我唔係惡意，係真心；到今日佢又講，所以就問我可唔可以收留個病人，我今日都係仍然好真心答佢：你走啦，無所謂架！我唔係好明，或者係佢唔明我，我叫你走，係覺得，我明白你o既感受，你走左可以唔再面對你唔想面對o既問題，而且，呢個地方，一早已經唔再值得戀棧，點解唔走？人係一個個體，要留要走，無需要有人同意，一切都只係個人決定，無人叫你走左之後唔再聯絡你關心o既人，但坎左起碼唔需要再係一個困局，當年我離開都係一樣，對大家都有好處，所以今日我先可以同佢坦坦白白討論，呢個世界唔變即係無轉機，即係無機會，變好你都有借口留底，變壞o既一早就要拎去填海。

今日o既結論係，最後佢同我講左一句：等我諗下先啦！或者我真係唔明白佢啦！要決絕o既時候，我都係幾絕下架！

3 May 2001....Thursday

識我o既人都知我鍾意飲酒，"硬野"我唔飲o既，啤酒、果汁酒、sake同cocktail比較多。以前後生，成日劈酒，因為成日一大班人一齊，高興嘛！練下練下，都可以飲到幾多架！廿歲，我諗我係飲得最 "行"o既時候，o個時，咩酒都試，竹葉青、brandy都試，o個期又興飲Tequila Pop，一次過飲十杯八杯都ｏｋ，飲醉酒對我o黎講都係平常事；記得有一次，一大班舊同學o黎我度打邊爐，o個晚，勁囉，又紅酒，日本清酒，啤酒，Tequila，都仲唔夠，飲到唔夠飲，再去買Vodka，於是，當晚十個有九個都醉，有ｄ人仲嘔，仲要係嘔到走廊有條路出左o黎，而ｄ未俾完全消化o既打邊爐食物就訓哂o係地上面，好經典！o個次之後，我都好少豪飲，但會買ｄ清酒同sake放o係屋企，慢慢飲。

我鍾意飲酒，係因為我鍾意飲完第一啖時，軟軟地o既感覺，好舒服！呢幾年，唔再鍾意劈酒，就算去pub，去ｋ，一大班人，我都比較鍾意自己慢慢飲，除非好高興啦！有時都會買ｄ酒返屋企飲，就算飲到想訓，可以即刻訓�儦嚏I依家，我諗一年最多飲醉一至兩次，因為返上樓要行四層，我好驚返唔到上樓訓左o係樓梯呀！前幾日，去朋友間pub，空肚飲啤酒，因為見到有隻好似生力啤競飲大賽o既上闊中窄下闊o既啤酒杯，好想試下，於是拎左o黎飲，仲要有條o靚仔過o黎玩，飲下飲下，都唔知自己飲左幾多，飲完之後，好慶幸唔知點樣返到屋企上到房，嘔到死下死下，死未？

星期六要上深圳－－上次同一班底上去，同班大陸佬飲，約十個人飲左四十幾支喜力，廿幾渣紅酒，飲到講哂國語，都幾攪笑！唔知今次又會點呢？

家陣，我飲緊我都幾鍾意o既Boone's wine soda，甜甜地，幾好飲架！C H E E R S~~~~

1 May 2001....Monday

放長假o既日子，同平時無咩分別，或者最大分別係，平時你可能一日只會睇一隻碟，但假期，你可以睇多過一隻碟；平時打機打到到喉唔到肺，假期你可以打爆個game，唔滿意個結局都仲可以打多一次；平時可能打台灣牌打一個東，但假期你可以打幾個東；做o既野同平時做o既一樣，假期只不過係俾機會你盡情放縱，讓你更加沉迷你o既消遣……以上講o既當然係我啦，哈哈！

兩個東之後o既早餐，當然由大贏家攪掂啦，而我攪左成晚，都有贏------廿蚊！廿蚊都係贏，好意頭呀！唔知點解，早餐時大家都殘哂架啦，但係竟然傾左一ｄ好嚴肅正經o既問題，而問題係關於我，諗番都覺得有ｄ怪，主題係：我o既人生有咩目標！我察覺好耐好耐架啦，就o係人人都為左生活過得好ｄ，將來過得舒適ｄ而努力搵錢o既時候，我依然，係"依然"都無諗過為自己將來鋪路，無論金錢、事業或者人際關係等等，我都無為呢ｄ野做過ｄ咩，我依家成日諗，究竟我係咪要改變o下呢？但係講到最後，我學識左四個字"心中富有"，係囉，學佢地話齋，我又唔係要人地認同，既然唔想咁現實，咁百般不願咁去做一ｄ野，咁咪就做番自己囉！人地覺得你生活無聊，做ｄ野好不設實際，你自己唔覺咪得囉！

我諗，我要學o既，其實係要放開ｄ自己！

25 Apr 2001....Wednesday

頭先同d同事有聚會，好開心咁去，好唔開心咁走！係第一次，o係佢地面前發脾氣，到依家，個心都唔舒服，有ｄ頂住，想喊！我諗頂住o既原因係，我覺得自己唔應該咁唔識趣，咁唔大方，但係我呢排實在好燥，唔通咁快就更年期？

同佢地打果ｄ麻雀，好無聊，我根本唔鍾意，點解唔係自己出沖都要俾錢喎，好唔公平，無心機打，雖然唔使我俾錢，但我情願同阿劉阿林佢地唱ｋ，好過"side"我ｄ時間！佢地又突然走哂，就係呢個導火線，令到我話唔打就唔打，食左支煙就走人！

我覺得佢地都幾驚訝我咁做，無人出聲，於是我又o黎，即刻後悔，後悔點解咁細路女脾氣，咁大個人啦，大方ｄ得唔得呀！點極都唔明，要衰幾多次先得呀？

可能我expect每次我同佢地聚會都會好開心，但結果同我期望相差太遠，佢地大年紀果ｄ又淨係為左打麻雀先o黎，由其阿黃，我有ｄ嬲嬲地佢，我最唔鍾意見到ｄ聚會唔合群，想打麻雀使咩攪咁大，又話同人攪生日會，唉，其實可能只係我自己覺得係咁，我又發癲啦∼∼∼

P.S. 頭先同阿劉傾開，我發覺其實都係阿廖衰，自己唔想打果Ｄ牌就出錢要我打，又話刨馬，又去左唱歌，你個死人頭，你睇下你，竟然激到我要o係我個網到都發脾氣，一陣就除隻鞋打你個小人手小人口小人眼，等你買唔到馬！

20 Apr 2001....Friday

四月真係我o既電腦黑月，上年有事，今年又有事，上年hardware，今年就software，真係一言難盡！

有時好多人話真係命苦，究竟係咪有苦命o既人呢？今日睇雜誌，話Keanu Reeves有套新戲上映，套戲係話女主角有絕症，佢想死前多嘗戀愛滋味，於是o係佢臨死前佢，佢就每個月都同唔同o既人拍拖，直至遇到Keanu，佢動左真情，唔想咁快離開呢個世界，但事與願違，Keanu最終都要目送佢離開！我主要唔係想講套戲，係男主角真實o既人生，話說原來佢好細個父母就離左婚，佢就帶住細妹流落街頭，四處漂泊，後來大個左，佢o既經歷仲慘，佢愛o既人一一離開世上：細妹絕症逝世；上年佢o既ＢＢ夭折；而最近連ＢＢo既媽媽，都因車禍而死去。生死難料，無人能控，死人不再知道何為痛苦，只有在生的人承受所有，咁呢Ｄ係咪叫命苦呢？

16 Apr 2001....Monday

呢幾日o係屋企都係日頭訓覺夜晚就通頂，唔係去玩呀，係坐o係個腦面前整呀整呀，整左ｄ唔知咩出o黎囉！其實都成個禮拜都係咁架啦，晨早七點幾就出去食個早餐，刨o下報紙，真係爭在無撚雀咋，退哂休o個隻！

家陣去到茶記，我o既"新餐牌"：１號餐轉米粉炒蛋多士凍茶少甜要刀唔要匙羹！其實都唔係好麻煩咋嘛，嘻嘻！有時，如果去粉麵檔，就叫呢個"水餃牛雜米走青走腸"，如果食炒粉麵呢，就係呢個"走蔥走九王走洋蔥"…有時ｄ朋友就加多句"走埋粉呀"笨!!!!

阿老三問我點解要出去食早餐，唔自己煮，哈！我真係好少好少煮早餐架喎，我覺得去茶餐廳食一日o既第一餐係好正架！由其係杯凍茶少甜，真係無得頂！就算屋企有隻爛絲襪呀，都唔識沖到人地咁好飲啦！況且茶記ｄ氣氛好正架喎，我都唔知有咩咁正，係咪去開有感情呢？呵呵！

我覺得煮野食，要好講心情囉，我唔想當煮野食係例行公事，咁樣整出o黎都唔會好好食，所以就算煮個即食麵，我都好俾心機架！如果唔係都食得唔enjoy啦，連自己煮俾自己食都食得唔開心，咁對我o黎講真係好大件事架啦！我諗過，住家飯唔可以煮太密，因為自己煮o既野係最咁自己口味o既，所以呢，就會死都清哂檯面ｄ野食，汁都撈埋，哼！仲唔死呀，肥得仲快過隻豬呀！

以前睇”味吉楊一”，有一集，好似係第一集，係，就係味王第一次見佢，楊一整呢個炸豬扒飯，好似，味王食完之後梗係話好好味呀，又講一大輪野啦，跟住楊一就講佢o既秘訣，就係有兩鑊油，一鑊係好滾好滾猛火o既，一鑊呢就慢中火唔係好滾o個隻o既油，先將豬扒放勁滾油o個邊，等佢金黃色（係好快o既），跟住就將佢放去另外一鑊油度，慢慢炸熟，原理係先將肉類o既表面炸香及封住ｄ肉汁，再慢慢炸o既時候肉汁就唔會流失，保留番o係肉入面，咁就唔會食到乾爭爭o既豬扒啦！

細個成日煎雞亦，於是我就學楊一呢個方法，當然，我唔係用兩鑊油啦，係開猛火好快煎香表面，跟住就慢慢火再煎熟囉，但後來發覺雞亦係唔同架，因為有層肥o既皮，煎完呢好油淋淋，不過，有一次阿唔知方太定李太呢，教人點煎雞亦無咁多肥油，就係煎熟呢再開猛個火，"dull"佢兩野，咁ｄ雞亦裡面o既油呢就會o係猛火之下迫哂出o黎，唔係講笑，我試過真係得架！

嘩！少少野講咁長，所以話呢，食真係一種情趣一種藝術o黎架！（如果因為窮到無得食梗係另計啦！）