31 August 2001
Friday
今日算是一個特別的日子，happy Friday，八月份最後一日，一個學年最後一日，一個會計年度最後一日，亦係兩個老友記在校最後一日……一個完結即等於另一個開始，完結我不掛心，反而我比較在意另一個開始，將來的事永遠是世人難以捉摸的一個項目，不由自主，不能控制，因世上變數太多，就算是最理性的人，可以做的，只有將預計到的傷害減到最低……其實今日感受良多，在我愛蒲的一家快餐店遇上他們，短短半句鐘，話題深入且認真，當時感受很特別，人家的私事家事，竟又有我的份兒，我竟好像成了人家的大女兒，人家的大家姐一樣，說教說教說過不停，哈，多事的行為又再按奈不住，但老套說句，在我來說，我不是八掛，而真是希望深入了解身邊每一個人，深入的人際關係，真心關心對待值得我愛的人，亦真心對待自己，總括來說，今天很多事都可令我心靈滿足~~
29 August 2001
Wednesday
好開心，因為我個小小雪櫃送左o黎，其實想有好耐，因為我成日飲啤酒，如果要雪o係下面，我拎上o黎好多時都放到熱哂，而我又想雪下ｄ爽膚水、水份面膜之類o既野，有個雪櫃仔係方便好多呢，最重要係因為特價，幾百蚊有交易；為左放呢個雪櫃，我放工返o黎執野執到滿身大汗，要搬好ｄ位安置佢嘛！原先ｄ櫃又重，真係搬到手都斷，好彩，今日意志力強，最終都完成，不過稍後，又要執過張書檯，因為我執到件檯面大好多o既檯，又要攪一輪呢！其實我真係好鍾意將屋企o既野換o黎換去，得閒又買ｄ垃圾返o黎o既人，可能屋企係我最鍾意逗留o既地方，所以成日都想佢唔好咁悶，有時又轉下床位啦，又時又轉下張檯位啦，不過搬o黎搬去都係一個地方裡面，對其他人o黎講，都係幾無聊o既動作，哈，不過我就係咁架啦！有時有ｄ小轉變，都係好事呢！
暑假真係接近尾聲，我o既工作，今日就稍為可以舒緩一下，因為我由以前o既好主動，變我較為被動，想專心做好一兩樣野，唔好再咁分身不暇，令自己太多負擔，但睇見其他同事，佢地真係真係比我忙好多，呢個禮拜四周都係積極o既氣氛，可能我以前習慣左啦，所以，我唔覺得特別特別忙碌，反而，佢地真係好緊張呢，由其阿劉，同佢傾開先覺原來佢今年真係要負責好多好多好多野，而最主力o既都有佢份，真係慘，好彩佢仲咁後生，多野做忙碌可能係一個好機會磨練自己，又或者學更多野呢，都算係裝備自己o既一種呢，唔緊要架，我一定會支持佢架，俾心機呀！新同事新老細，新人事新作風，大家重新開始努力啦！
28 August 2001
Tuesday
今日去國超個網，佢彈個窗話一號風球，我地都以為係，因為的確好大風，但成晚睇電視，都唔見有個一號logo，到依家，都唔知係咪真係一號風，無論如何，今日天氣的確係幾好，幾舒服，由其是我間房，好好風，每次大風，兩個風鈴都叮叮作響，好好feel……
尋晚搵左一堆歌，好耐無聽過，而最深刻就係"生命的插曲"同"唯獨你是不可取替"，家陣聽番，都係咁正，由其"唯獨你是不可取替"，記得有一次唔開心，連聽十次，repeat再repeat，我都係一路聽一路喊，好悽涼，到依家都係覺得許志安個原裝版最正，特別係和音同編曲部份呢！仲有仲有，張學友"原來只要共你活一天"同彭羚"不許眼兒再下雨"，無得頂呀∼
26 August 2001
Sunday
呢排為開學事忙到死，唔係扮忙，而真係好多野要做要安排要預備，可能對我o黎講最忙o既係要o係工作上面轉回一個低調o既小書記；尋晚有人o黎屋企BBQ，有ｄ人係第一次見，有ｄ見過一次，有ｄ識左幾年，但係，呢排真係無咩心情同精神去應酬，所以食左ｄ野，飲左幾罐就訓覺，佢地就繼續玩樂，可能o係人家眼中我又一次作出古怪行為呢！今日起身，返左屋企，睇到封家信，好明顯係搵人代筆寫，唔知當中誠諾又有幾多係真心，係咪老套講句，唔去相信或在乎，將來就唔會有太多失望呢？
22 August 2001
Wednesday
今日係多事之秋：本來晨早起床，應該清新開朗，但我洗頭洗到隻耳仔入左水，塞住左隻右耳，攪到家陣仲係唔係幾舒服，本來想去睇醫生，但又驚好鬼貴，於是就由得佢先囉；今日有新同事面試，戰況激烈，好彩，最後都唔係果個人得，都算係好事；知道阿抄隻老虎仔突然不幸去世，佢情緒激動嚇我一驚，希望佢心情快快平伏，亦都希望老虎仔安息；飲茶時唔明點解自己為左鄭一兩句笑話而突然發癲，初而口角，差點動武反檯，幸好檯上點心食物甚多，為免浪費，我們最終當然沒有反檯啦！誇張左ｄ……呵呵！不過我今日好唔掂，本來想叫少ｄ野食唔好咁貴，但出乎意料，真係對各位唔住，食左餐咁勁！由其係阿明同阿黃，為左陪罪，我家陣自飲兩罐生力清啤啦！仲有，我聽日要請阿鄭食個廿八蚊o既自助餐先得，唔知可唔可以彌補到佢弱少o既心靈呢？！
20 August 2001
Monday
我記得中學時買過一張書籤，上面寫住"緣起緣滅"，我好鍾意呢四個字，覺得好有意思，我性格亦如同呢四個字，我唔鍾意強求感情發生同結束，由其要結束時，要走，我都留唔住，所以唔會留！我都曾經講過我係一個喜歡逃跑o既人，當然，人大了，當想逃走時會比從前想清楚一點，到了真的想清楚後，任何事都阻不到我，可能我逃走係想要重生；勉強只會一池死水，死路一條，只剩軀殼，沒有靈魂沒有自我，隨緣係我生活指標，所以唔係人人可以接受！平時我吱吱喳喳，說話多多，但當中其實一大半都唔係真實的我，有時我只係對於事情而作出分析，並唔代表等同我個人形容，又或只想攪攪氣氛，大家多些話題。
親情、友情、愛情一視同仁……"緣起緣滅"
18 August 2001
Saturday
今晚約左一個好耐無見o既朋友出街，真係好耐啦，我諗都有成年……我地首先去CITY SUPER行，我買左ｄ野，都係ｄ唔等使o既野，跟住不斷飲野，因為天氣好熱，又行左好多路，本來想去睇少林足球，搵左幾間都睇唔到，有間旺到得番最後兩行添，幾"近"呀！最後，又行左好多路去加太賀食野，呢個地方，諗起，原來我每次去都係同佢去，我地八點幾食到差唔多十二點，人地收檔我地先走，飲左四支sake，佢唔係好飲得，但每次都奉陪到底，今次，我衰左呢，算係醉醉地，我搭巴士搭到過哂龍去左天水圍先識醒，哈哈……不過今晚真係好開心，因為我地傾左好多計，好秘密o既計，佢就係因為我地傾得咁開心佢先冒住出酒lan
都飲咁多呢……多謝佢聽我發癲囉！仲有要多謝Michael，因為我飲到醉醉地，本來想同佢一齊返屋企，點知佢又未放工，咪一個人返，但佢可能驚我醉倒街頭，竟然再打俾我，又睇下我番到屋企未，好似老豆咁呀！真係感鬼死人~~
留言版突然多左好多人，由其對我性格o既批評，我諗我應該開心，人地唔care你又點會點醒你過你兩招呢？我係咪真係太自我？太目中無人呢？其實唔識關心體諒人係我先至真呢？唔通我真係咁差……？
17 August 2001
Friday
呢幾日又係倒塌咁早起身o既階段，前日半夜兩點幾起身，無咩做就梗係睇碟啦，今次睇o既係"一一"，感覺幾好，雖然套戲三個鐘，但又唔係幾覺悶喎！若果你睇呢套戲會覺得佢無聊，會唔會其實你對生活上周遭o既小事情都忽略了呢？
暑假話咁快又就完，下個星期同事們又陸續返o黎開會，我又要忙於為開學做準備，唉，光陰似火箭呀真係！原來我o係呢度已經踏入第四個年頭，都未及回顧又要再開始新一年，新一年我要面對好多改變，老闆變左，而同我同室而坐o既係幾個男人，我突然要服侍咁多人，有ｄ壓力，最重要係新官上任，即係咩都要重新o黎過，即係又要挑戰下自己，睇下頂唔頂得到！學校裝修期間，我棵桃花樹俾果班不知所謂o既工人整斷左，桃花陣被破壞，我下半生都係……嗚嗚！
13 August 2001
Monday
尋晚又無訓，攪到今日頂眼訓返工，死唔死！
今早沖涼時，用薰衣草沐浴露，突然間諗，人真係好奇怪，社會上大部份o既人都為將來過得好ｄ而拼命工作搵錢，又為著社會進步繁榮而發展好多好多野，世界上又有好多發明家創造好多奇蹟，但係原來人們辛勤工作之後，可以放假或享受人生時，要尋找o既就只可能係舒服o既環境，青山綠水呀，世外桃源，簡樸生活，本來世人垂手可得之物，時至今日竟然要拼了老命才能爭取到一點點，又或者可能一世也沒有，點解呢？都唔明點解個世界話就話係進步，但反過來看，其實係咪退緊步呢？
本來無一物嘛，點解要花費精神金錢先可以令人鬆弛神經，安然入睡呢？中國啦，外國啦，土地多得很，所以居住環境相當不錯，樓價也不很高，但點解ｄ人成日話香港遍地黃金，所以來香港搵錢，但到頭來搵到o既錢，就還原用o黎換番佢本身有o既野呢？老套講句，可能一個男人本身有個好太太，溫馨o既家庭，雖然搵錢唔多，緊可糊口，但開心喎，好啦，佢話要搵多ｄ錢令以後o既生活好過點，於是將所有精神時間放在工作上，忽略了家庭，冷落了太太，仔女變壞，家不成家，錢是多了，但若他他日後悔時，說家庭才是人生最重要的，那算是什麼呢？走的已走，散的已散，又再尋找另一個，又再重新建立一個家庭，轉了一個大圈……
原來人喜歡轉圈的，所以很多人都希望環遊世界，轉一個勁大的圈囉！！
12 August 2001
Sunday
呢排天氣真係好悶熱好焗，攪到唔係幾鍾意開冷氣o既我都要開住o黎訓！
尋日去左拜訪好朋友o既新居，好羨慕呢！二人小世界，家陣都係興一ｄ簡約o既裝修擺設，感覺很舒服和諧，兩口子有了這個安樂窩，都不用想再到那裡拍拖了，就乾脆在家裡看看電視，打理家務已夠一天的節目了；近來身邊有幾位男同學都已進入了自置居所並且同居的行列，這也給了我一些啟示，年紀真的大了，在我心目中男人決定買樓同居這關口其實不易過，要負擔起供樓這個擔子十幾廿年，要努力保住工作，又要給身邊的女人幸福，壓力不少，所以我都為我這好朋友開心呢，有這樣的一個男人在身邊，若她快些給我做伴娘的話，我會更加開心，呵呵∼∼
9 August 2001
Thursday
今晚終於dig起心肝執房，好耐無執，凌亂不堪，慘不忍睹！足足執左成兩個鐘，終於攪掂！心情好唔好同執野清潔有咩關係，我仲未了解得到，有時心情唔好時會更加懶理自己個竇，但係有時又會好專心咁清潔收拾，我記得以前拍拖，遇到唔開心事發生時，我就會好專心咁執屋啦，洗廚房，"省"乾淨ｄ鑊呀煲呀咁，又或者煮餐好o既俾自己食，我發現當我做緊呢ｄ野o既時候，我真係心無雜念，好努力咁攪幾個鐘，做完之後，舒左一口氣；最記得有一次，同拖友鬧交，我就整個下午洗廚房，佢打電話o黎：你做緊咩呀？我答：洗鑊！佢聲音帶笑並且高左幾個key話：又洗鑊？聽到之後，我自己忽然間都忍唔住笑左一笑，或者我係開心佢竟然會有少少留意到我呢個癖好，就只係因為呢一句，又和好如初，洗完o既廚房用具又再用o黎廚食我地o既和頭晚餐，但點解又係我煮呢？？哈哈~~
6 August 2001
Monday
八月六日，暑假，心情懶惰，咩都唔想做，係逃避緊一ｄ野定係俾個腦休息下重新思想一ｄ問題呢？一半一半……
呢兩日睇左好多戲，有舊有新，新o既就睇左"全職殺手"，都唔錯啦，而舊o既就係買左幾隻碟，有呢個"刀手"、"蜀山"、"戀愛起義"、"給我一口嫁"同"偷心之約"，共二百幾蚊，有人話我side錢，老翻幾十蚊有交易啦，但我唔明點解係side錢，點解佢地拎ｄ錢去同ｄ女，而又唔係自己條女，食一餐飯二百幾三百蚊又唔係side錢，打場麻雀上落一千幾百唔使side錢咩？點解你又叫我打麻雀喎？我又唔係好想打，我從來唔會主動搵人打牌架喎，打親都輸，你地贏我錢我可唔可以話你side緊我錢？side唔side錢o既定義係咩，我攪唔清楚，錢，o係我心目中永遠都有一個大大o既問號……
睇"戀愛起義"，最後林海峰為三個愛情故事做一個總結，有一段旁白係講究竟一個人開心定兩個人開心，選擇一個人好定兩個人好等等o既問題，我好在意佢呢段問題，而我問自己得到o既答案係偏向一個人好ｄ，點解？唔知點解喎，經驗淨係話我知，我比較適合一個人，除非，你o既另一半，就算唔係情侶而只係普通朋友都好，係好明白你o既，你一舉一動佢都在意而意會到你想點，唔知係咪叫心照，咁，兩個人或者都唔錯，日常生活，你想隨時食就食，想食咩都由自己決定，想訓就訓，想玩就玩，想任性就任性，想自閉就自閉，多個人，我就會諗埋佢，佢餓唔餓呢，我訓左佢咪無人陪，我想去果度玩但佢唔想去，我想佢陪但佢唔想見我，我想一個人靜下但佢想我陪；我係一個心軟o既人，人地對我o既要求，我好少拒絕，原因係唔想佢唔開心，就得就就啦，但係，好多時我咁樣做完之後，我係會後悔，係會唔開心架，所以我比較喜歡一個人，無需拒絕無需後悔……
2 August 2001
Thursday
返o黎啦！ 終於去左一次短短o既旅行仔返o黎，個人真係好似放鬆左唔少，上去時個胃勁唔妥，點知返o黎無事喎，唔知係咪心理作用呢，攪到好想再出去走走呀！今次去左好多地方，有中山啦，珠海啦，馬交啦…我諗印象最深係果度o既街道，由架車一去到皇崗開始，已經見到馬路兩邊係種滿好多好靚o既花草樹木，一直去到中山都係，仲有就係ｄ樹係剪得好靚，好園藝架喎，好勁呀真係！我同阿劉都整緊個中山之旅網頁，所以到時先再講呢次旅行啦！
過埋聽日就重生，希望聽日順順利利啦！ 唔知點解有種感覺，呢個八月會好特別，可以肯定o既係，八月會好快過，因為好忙，忙工作忙玩樂，所謂快樂不知時日過咪就係咁解囉！
p.s.阿劉成日話買左樣野送俾我，佢話一見到就諗起我，我都一直唔知係咩，原來就係－－呵呵~多謝哂呀真係！我所有魚魚o既野都係自己買，第一次有人送，有獎品收好開心呀．．．
Thank q~q~q~q~