中文全名就唔講喇，因個名「正」過頭；

英文名係出世紙都已經有：Judy，同我中文名有莫大關係，不過唔使估喇，你地估唔到架喇！

花名就一大堆，唔同場合唔同人就叫唔同o既花名，大多數都離唔開果樣動物－豬，小學好似無，中學開始就係叫「豬標」，到家陣都仲有人叫，激死！迪迪、迪迪仔、祖迪（告魯夫）、朱迪，一大堆差唔多o既名。

到家陣都仲未知自己係男定女，有待公佈！

都唔係秘密，不過唔鍾意自己講呀！肖虎，天秤座（係典型天秤座，因為太陽同月亮星座都係天秤座）。

品酒、抽煙、家陣間中打麻雀、對住個電腦唔知攪咩，好鍾意睇有關命理生肖星座o既資料，因相信可以對了解別人及自己性格有幫助，睇電視、睇電影、聽歌、唱Ｋ、情緒好唔好都鍾意買野、行家居用品店、煮野食同食野，總之鍾意玩，但要玩得大家都開心！

覺得自己好鍾意成日發掘一ｄ唔同o既興趣，一時一樣，但三分鐘熱度，好多都唔會持久，但我又覺得無傷大雅，人應該不斷吸收唔同o既資訊同智識，唔一定要拎住本書去讀又或去上堂，每一日你都可以學到好多如果你係一個對周遭人和事感覺強烈o既人；

我個人好懶好懶，情緒化得很，心情好時咩都好落力做，心情唔好時，搵刀「行」住我都唔做；自己唔覺得自己係一個斤斤計較o既人，但好多時不知不覺自己根本係計較緊，我好多時事後發覺，都會好唔鍾意自己咁，所以盡力都希望唔好有下次！

我做人絕對係無目標無計劃，曾經無，依家都無，我諗我將來都唔會有。有好多人會諗住幾時要有車有樓，幾時要結婚，幾時生仔，又或者要升職要搵幾多錢，呢ｄ我諗都無諗過，就算每年要生日要許願，我都諗唔到有咩願望，吹蠟燭許願都係扮下野架咋，講真架！每年新年要祈求咩，都係無，可能因為咩都想要咩都想係好……，又或者，太多野唔到自己控制，一句講哂：好灰囉！都唔明點解要o黎呢個世界……

總結係，多數憑感覺做事，直覺囉！唔太理智……

我發覺自己特別鍾意藍色係「車仔」（Sanrio - The Runabouts）出現時，深藍主色加可愛o既車呀船呀飛機，總之覺得其他o既都睇唔上眼，只有呢個系列，之後就係我網入面條魚魚，我聽人講叫「風車魚」，直到最近睇書先知係叫「翻車魚」（炒車魚？），但用左咁耐，都唔想特登改正喇！呢隻野絕對唔hit，都幾冷門，系列應該係叫「Puku z Island」，同黃雞雞仲有綠青蛙係同門，1992年出品，所以連佢公司個官方網頁都放棄左佢，一條魚都搵唔到，於是膽粗粗自己畫，自己覺得都畫得幾好架！我屋企家陣好多野都係藍色，不過都唔係樣樣野藍色都要架，仲要睇下靚唔靚呢！

畫下畫下，整下整下，攪到呢個爛鬼網頁，多得阿劉指教指教。初時，唔太識寫網頁，亦唔知原來網上世界好大好大，好多野學，到家陣，都算係好過初初咁啦！不過同人地果ｄ真係無得比，咁自己都係諗住有個寄託咁咋，好似寫日記咁，我由細到大只係寫過幾個月日記，仲要係因為同男朋友炒野激氣掉左，家陣得閒寫o黎發洩下、分享下，已經成為我習慣。我平時唔開心都幾鍾意閉關自閉，ｄ朋友都唔係好明解我，家陣，我差唔多無咩保留咁講我日常o既感受，我ｄ朋友原來都有睇，呢度成為左我地o既聯繫同話題，歌都有唱啦，「開不了口」嘛，咁樣o既講通方法都幾好！