夏季青春劇台前幕後大比併 文:何家文 11/07/1999

深田恭子帶挈堂本剛贏收視

平時稱兄道弟的Kinki Kids成員堂本剛與堂本光一，在今個暑假就要鬥過你死我活，皆因兩人的新劇《To Heart戀至死》及《P.S.你好、俊平》都是走青春路線，針對放暑假的年輕觀眾。

堂本剛有人氣姐仔深田恭子幫拖，收視先贏一局。今日將兩套劇台前幕後來個埋身大比併，且看鹿死誰手。

首先，收視方面兩套劇在日前已播出第一集，據日本Video Research調查所得，《To Heart》首集以17.7%收視晉身收視榜第6位，但《P.S.》雖早一個星期播出，但始終入唔到十大，所以阿剛的《To Heart》先贏個頭威！《P.S.》女主角瀨戶朝香似乎唔多爭氣。

男主角鬥戇居

在《To Heart》中堂本剛飾演一個20歲出頭的拳手，性格傻傻更更，但打起拳來，就非常認真。而《P.S.》中堂本光一就飾演一個考不上大學的留班生，性格冇主見，十足正牌「黃大仙」，任何人要求他幫忙，他一定會答應。另外兩人都有一個共通點就係阿剛與光一在新劇中都好有女人緣，但對處理男女的感情事就非常失敗。所以今個回合打和！

恭子二奶Look嚇人

而兩劇的女主角《To Heart》的深田恭子及《P.S.》的瀨戶朝香，在性格上有很多相似的地方，包括兩人都有開朗的性格，而且為愛情竟可主動追求男仔。

另外在形象上，兩人都是青春少艾，但好可惜，深田恭子最近發福不少，當穿起冇袖背心及鮮豔紅裙時，十足深圳二奶款，非常娘丙；而瀨戶朝香就唔同，雖然以前她肥過，但最近Keep得非常Fit，加上擁有5呎6吋半的身高，就算穿起普通便服都恰到好處，比女主角身材，《P.S.》贏唔少分數！