好多人問我點解會俾無線炒？講真我都想搵人話畀我知！我從來都冇諗過自己會折墮到貼埋錢打工，都會落得如此收場！所以，當日接到記者簕「死亡」通告，我即刻好似發晒狂咁，打勻畀無線各大部門高層證實死因，雖然有人話我搵珍姐打救，事實上係比珍姐更高層。可惜，對方只係無奈咁答左一句：「你家陣搵我都冇用！」我已經知道呢鋪死梗，仲要死得不明不白！
天生我才必有用
最慶係我係呢度前前後後撈足十一年，炒我都搵個人知會聲丫！問心果句，要交人，排隊都未輪到我！扮豬、扮狗，我幾時有托過手踭？仲怕嫌唔夠醜，自己再畫大個口，扮到出神入化，搞到連化妝阿姐都要同我合照。有時小生同小丑只係一線之差，天生我才必有用，冇人肯做，我做！落妝果陣皮膚敏感，好似俾火燒咁，唔通又周圍話畀人知咩！
記得最初入無線，添哥話我D戲屎，叫我得閒就睇下人地點做。我十足睇場一樣，呢頭收工、轉頭就過隔籬廠，金睛火眼睇實梁朝偉拍戲，就算其他人嫌我阻住晒，畀晒面色我睇，都冇打擊過我既決心，結果《城市故事》大收，「洗米華」做到街知巷聞，之後同苑仔主持《我愛鬥一番》，閒閒地都收三十幾點，連黎明個音樂特輯都隊lum埋，話我冇表現？簡直係侮辱！我都有威過！