入黑名單我未驚過，呢行只要一日仲有價值，點會有永遠既敵人𡦃？我有信心一定可以入番無線，所以家陣當玩冇薪假期，「出外」進修下囉！其實係八九年對台牽起挖角潮，只要肯過檔，人工立即幾級跳，肥姐、盧海鵬、黃日華、吳啟華、秦沛等，統統過晒隔籬發展，我都有幸被「睇中」，仲出到五倍人工，你話點抗拒，當時夠話向左走，冇得向右走返轉頭啦！（註：當年無線總台還在廣播道，對台位處無線左邊。）最諷刺係唔講錢反而俾人炒。
自我增值等發圍
諗起今日遭遇，決定走都係明智，最低限度搵到唔少私己錢，可以有果句講句，唔使無故被炒都冇聲出，無線好多手足仲封埋我做偶像，全靠我出聲，公司暫時停止炒人，犧牲都值得。講真我第一桶金係拍完《義不容情》，當時收視好高，接廣告接到手軟，一年拍足十二個廣告，酬勞等如無線一年人工，試過有製作公司畀份合約我，寫明包一百場騷，加埋商場做司儀，條數真係好和味，我話做無線純為興趣，絕對冇講大話。
講到點都好，我目前會全力增值，要比以前更加努力，難保班管理層又換人，我已做好心理準備食回頭草，正所謂「好草唔怕食」。