二零零五年八月十一日    星期四    天陰

六點起身，真係一個好大o既考驗，仲要係連續兩日添，真係想死﹗尋日屋企多o左個芝士味o既蛋糕仔，今日就用o左o黎做早餐喇﹗落到七仔，仲買o左盒朱仔奶，之後就上車喇。不過真係嚇鬼死，我食完個蛋糕仔，諗住開盒朱仔奶o個陣，坐我隔離一路聽緊歌o既男人無啦啦遞o左包紙巾俾我，但我又冇食得好污糟，又未開到盒奶，都唔知點解會咁，咁我唯有接過包紙巾，我拎o左一張出o黎之後，諗住俾番包紙巾俾個男人，點知佢已經睏o左，搞到我都唔知點。不過我拎住張紙巾，愈諗就愈唔對路，雖然小人之心度君子之腹又好似真係好衰，不過亞媽教落，防人之心不可無丫嘛，所以最後包紙巾，我o向冇機會俾番個男人o既情況下將佢袋住o左，而拎o左出o黎o個張紙我就用都冇用過就丟o左喇﹗哈哈﹗

番到公司，又要打電話，又要搵Carrie拎錢，又要check props，搞掂哂，一個人就出發喇。之後我地出坑口接Yoyo，再出奧海城。落車之後，入麵包舖打探一下，settle down D o野就等開工喇。唔係食o左好多o野o既情況下，佢D麵包又咁鬼香，真係作死﹗最後Oscar都遲o左少少，不過Rico都係眾望所歸遲到，哈哈﹗成朝都睇住呢間舖頭唔同款o既麵包，其實都真係好似幾好咁，多款啦，又整得靚啦，同埋幾有創意，仲要唔係貴，得閒去買D o黎食先﹗

幾經辛苦，拍哂呢個location，之後我地就一齊搭車去食飯，為o左方便Rico番屋企拎番佢今日唔記得帶o既o野，我地就去o左九龍城百好喇。食飯o個陣，亞Jan同Lillian爭拗個節目o既問題，唉，大家都有自己o既諗法姐﹗不過我真係覺得個節目而家真係幾悶o既，大家都做到冇乜energy，都唔知係邊個o既問題。因為都仲有幾多時間，所以食飽飯大家都仲好他調咁坐低傾計。諗住就o黎出發，所以諗住去個toilet啦，點知閂門之後，竟然發覺腳邊有隻大小強，頂丫，好彩係一入o黎就見到，如果唔係都唔知點算﹗之後我就出奇地鎮定咁行番出去，痴線架﹗

之後我地就出發去九龍塘，哈﹗好似以前番學咁，之後我地o向歌和老街公園度拍，不過段稿勁長，Oscar NG o左好幾次，但拍o左一陣就俾個叔叔阻止喇，真係頹。我地唯有o向公園門口拍，之後再上o左山上面o既公園仔拍hip hop o個度，三個都勁低能，超好笑﹗之後我地就過學校o個邊拍喇，先o向課室做o左個opening同個closing先，我再一次要o向黑板寫下我o既真跡喇，哈哈，我手字真係okok架﹗哈哈﹗之後又要等佢地三個畫畫，哈哈﹗仲有埋親筆簽名喎，都唔知有冇人真係會寄信o黎呢﹗之後我地就出去拍激優人語，激熱呀真係﹗同個lighting叔叔傾開計，原來佢都識卓伯棠架﹗不過佢都教o左我好多打燈o既技巧，雖然冇機會用，不過都叫做學多樣o野丫﹗等o左勁耐，終於拍完喇﹗執o野收工﹗大家可以四散，我就番公司還衫，差唔多番到去o個陣，Rico先打番俾我，問我有冇得搭順風車喎，太遲咯﹗哈哈﹗

還完o野，就番上office準備聽日外景o既o野，最後就拿拿聲執o野走，因為太耐冇打波喇，我今晚要落花墟﹗

落到去，佢地已經開始練緊，我換衫o個陣，仲見到施敏同Terri，出到去，我地三個要猜波熱身，哈哈﹗今晚得我一個中間，所以真係可以補番咁耐冇練波，哈哈﹗可能真係太耐冇落o黎啦，唔係太識o向夜晚打波，對眼睏辛苦。今晚唔知點解好多蜜蜂飛o黎飛去好得人驚，亞晶殺o左人地都o向度大叫，哈哈﹗俾你踩咁多腳都唔死你就驚喇﹗哈哈﹗練o左一陣搥波就開game喇，今晚真係好爽，火火仲升o左球勁靚o既後快俾我呀﹗最後打到十點幾，大家都去換衫喇，要沖涼o既就沖過去沖涼，我就梗係慢慢行過去啦﹗點知行到個去，個亞姐竟然唔俾我入囉﹗痴線架﹗講o左勁耐先肯俾我入去，好絕﹗點知我換完衫，都仲有幾個女仔可以入到o黎沖涼囉，搞錯﹗

出o左更衣室，竟然撞到亞Fat，嚇死﹗激耐冇見﹗頂丫，讀埋同一間學校，你竟然問我畢o左業未，作死呀﹖之後我地成班去o左食o野，沙嗲皇城，麻麻地啦，又貴﹗佢地話我爛口o左好多，冇計啦，屈o左咁耐真係好辛苦架嘛﹗食飽，走先，聽日又要六點起身呀，作死﹗

完