今日係第一日0既紅色假期，屋企人好自然咁去附近0既酒樓飲早茶，講講0下我前排去大澳0既事，我老豆同阿哥就好有意欲咁去大佛行，話吸收一下靈氣喎，仲係坐言起行果隻添...勁~~~所以我地好快12點幾就出發囉~

    去到中環碼頭，嘩~~~估唔到咁多人搭船喎~~個個都好似因為SARS係市區擴散而逃到離島咁，話時話我地真係都想吸0下新鮮0既空氣先去0既...估唔到天氣咁好，好快就去到梅窩碼頭，去到有種似曾相識0既感覺，係以前學校、朋友去CAMP的必經之地^^我地好順利咁就搭寶蓮寺0既車loo~不過都幾長途，很多彎路，又上山又下山咁~坐都坐到累囉~~~

    搭0左成個鐘頭車終於到喇....第一0既感覺就係一個字→"弊"，因為果度超晒又熱，無塗防晒添^^實在太好陽光啦~去到果度望上個大佛到，覺得真係幾高喎，但行行0下，影0下相咁又好快到頂囉喎~上到去雖然都幾熱幾晒，但都好風，d景又靚...空氣真係幾好，我阿媽係度猛咁索"靈氣"^^真攪笑，果度仲有一些小攤位賣d珠鍊、牌仔咁啦，最吸引我阿媽去望，但.....阿媽係咁話貴...值唔值呀咁講，但都係唔捨得走，那....呢d就係女人囉^~^

    跟住就落山囉~我係咁叫肚餓，落到去搵地方食0野，其實專登0黎到梗係想食0下齋0架啦，最攪笑一落山最開揚0既食肆就係車仔檔，果度仲係咩肉都有.....真係破壞晒果度0既"靈氣"。我地堅決唔食，跟住被一個招牌吸引，果度仲有張報紙介紹可以歎荼添，噫....0岩晒老豆同我呢d好茶0既人喇，我地就跟住d指示牌沿小路入→"茶園餐廳"，我阿哥有好幾次要放棄，因果度真係幾僻，而又要行迂迴曲折0既小喎，一個又箭咀又一個箭咀咁.......

    終於去到喇....噫?????絕不是甚麼餐廳，只係.....係....有一檔石屋仔，還有幾張有傘0既桌，真係幾有大拍檔0既feel喎~~老豆急不及待去叫0左一壺「雲霧茶」，我地坐係果度，初時都幾熱的，但慢慢感覺到陣陣0既涼風，好舒服呀~我地旁邊有竹樹和雲霧茶林呢^^係果度我地都幾特別...點解？因為大部分人去度果度，真係好似當餐廳咁，左面叫凍檸茶、免牛三文治，右面叫可樂、乾炒牛河咁~~~噫?????呢度咁近大佛，點解會無人叫齋食0既????所以我地難得好一致咁→一定要叫齋食^_^就係咁，環顧四周，就只有我地係度飲湯、歎茶、"爬"飯、食齋喇~幾咁特別呢???能夠達到我地0黎0既目的，就係要吸....吸....吸...."靈氣"^^

    好快就到四點幾五點loo~要返歸囉~真快....食完無幾耐，阿哥又係度諗食咩晚飯？話想食炒蜆喎~於是就到中環碼頭時，見到大笪地果度又有旗，又有燈咁，又咁0岩係中環落船喎，果兩位老人家就建議不如行去上環大笪地啦~0下~~~~行去???好！「死就死啦」(普通話版)，我地一齊打橫掃過去，去到一個唔知叫咩中心，果度好似迷宮0架，d光管唔同顏色咁~~好似行緊catwalk咁，所以又拎部機出0黎周圍影，但遭到老豆講0左一句，唉~~~唔好好似大陸人啦^^，0下.....居然話自己果女係大陸妹，哼！我一口純正0既廣東話0架^~~~^但去到先知原來大笪地已經摺0左.......0下~~~行0左咁耐，個肚都打鼓囉~做乜摺0左都有燈著0架>.<(埋怨！埋怨！)

    之後去0左灣仔「表哥」食0野，聽講佢賣行廣告，就冒名去試0下啦，但係d 0野食原來無料0既，名過其實，果碗粥好有化學味道，好醬口，而且d材料好奇怪咁發脤(豬潤)。各位兄弟姊妹，如非必要，都係唔好去試囉~~~除非你想試0下點難食啦^___^今日0既行程就係咁多喇...好滿足呀~~~P.S：下次去一定要去番果間「茶園餐廳」，因為服務態度同d0野食都係一流，而且環境舒適，價值又合理，值得推介^^(不過千祈唔好嫌有大排檔feel呀！)