五月十五日 (星期六) (晴)

今日屋企無電呀！

 五月十四日 (星期五) (雨)

婆婆話比我聽今日媽媽要返學校考試喎！又話媽媽放學返來會買d糖糖返來比我食喎！點知媽媽今日約左朋友出去食飯呀，我等左好耐佢都未返喎，又無人同我玩，我又想食糖糖喎>.<，後來叩虎又話打比媽媽問下佢係邊喎，點知佢都無聽電話，之後叩虎仲落埋去搵媽媽，結果叩虎又係一去無回喎，婆婆又去左訓覺T.T……

後來我一隻丙等到十二點幾，媽媽同叩虎先至返屋企，媽媽仲同我講佢買比我盒糖漏左係學校唔記得拎返屋企呢……T.T

五月十三日 (星期四) (晴)

今日媽媽佢無啦啦走來我籠籠面前，同我講話乜野改機票遲d先去美國之類，又話要查清楚d資料帶我去美國喎！究竟美國是什麼東東呢？食得的嗎？唔知有無菜菜咁好味呢？

五月十二日 (星期三) (晴)

今日我去厠所的時候，唔小心賴左d尿尿出來呀！結果媽媽提早幫我清理厠所同籠籠，我幾驚媽媽會罵我呀，點知媽媽無話我喎，仲放左我出來玩呢！後來媽媽唔知做乜打電話比果d旅行社喎，我見佢係咁打電話，等左好耐都無講野喎，本來我都想陪下佢等的呀，但我陪左佢等左廿五分鐘左右都無反應喎，我都無心機等嘞，咪自己一個去周圍玩law。後來唔知幾時先見佢打通左喎，聽佢講話乜野訂六月五日機票走之類，我即刻行埋去佢身邊聽清楚媽媽講乜law，點知佢就收線嘞，不過我都享受左一陣“波地密沙池”，好過無啦，但係媽媽做乜咁快要走呢？

五月十一日 (星期二)  晴

今日好熱呀！你知啦我又肥又多毛好怕熱的麻，所以今日覺得好辛苦。今日叩虎唔知點解好早起身喎，我心諗一定係有事發生左嘞，後來媽媽同我講話叩虎今日去見工呀！其實我好想叩虎快d返工的呀，因為叩虎返左工我咪可以作惡都無人理^o^，所以我每天都祈求蒼天比份工我叩虎law。

不過當我咁樣諗既時候，媽媽又即刻講左句話叩虎已經有人請左佢喎，仲係明天上班。下？一.一 咁做乜又見工喎。但係我都唔理得咁多啦，我要趕住還神的麻！

五月十日 (星期一)  晴

今日是二零零四年五月十日，媽媽去見美國領事呀！

今朝我一早 (都幾早的呀，七點幾) 就見到媽媽係度梳洗，我企起身同佢打曬招呼佢都無理我，平時我一同佢打招呼，佢實讚我乖，仲會比d小食我做獎品，但佢今日好似好心不在焉！聽婆婆講媽媽今日要見美國領事拎學生簽證呀！唔知到領事是什麼來的呢？聽講要用那些蕃鬼佬文同佢地溝通的，婆婆成日以為我係蕃鬼佬丙，其實我都唔知乜係蕃鬼佬，如果我識，我一早教左媽媽啦！點會見住佢去送死唔救佢丫！講下講下都累嘞！唔知媽媽返來會唔會心情變返靚靚，比糖糖我食呢？

五月九日 (星期日) 陰                                                                                                                                   

婆婆話，今日係媽媽節喎！叫我要孝敬下我媽媽！我都唔知乜叫孝敬，我諗孝敬就係比d野媽媽咁解啦！所以我今日孝敬左好多“金丹”(即米田共) 比媽媽，等佢今日可以早d同我清埋個籠，比d世藝佢麻！我諗我都算係一隻孝順既丙來的。後來婆婆仲比左成個蘋果比我呢！可能婆婆都覺得我乖。

五月八日 (星期六)   陰

今日我好慘呀！因為婆婆、媽媽仲有叩虎都去仲探太婆，得返我一個看門口咋。好悶呀！等極佢地都唔返。原來太婆捉住佢地唔比佢地走，佢地成十一點先係太婆屋企度返來，搞到我十二點先有得出來玩 T.T

五月七日 (星期五)   晴

今日媽媽掛住同敏敏姨姨傾電話，無同我玩呀！後來我咪走埋去媽媽身邊度訓低law，媽媽見我咁可愛，就一面傾電話一路同我做“婆地密沙池”嘞！好彩我夠醒目咋！咁我就享受左成個鐘“波地密沙池” 嘞！各位兔朋友仔，唔好話我肥丙唔教路呀！如果下次見主人傾電話，好快d行埋去，懶可愛咁訓嚮佢身邊，一定有著數的呀！

五月六日 (星期四)   晴

今日媽媽同叩虎出左去同老師食午飯喎！所以今日屋企好靜，訓午覺都訓得好d。但係今晚叩虎無返工呀，成晚都係屋企睇實我喎>.<，搞到我要扮曬乖。今日我聽見媽媽同婆婆講話乜野要申請我去美國喎，又話乜野適合我。其實美國是什麼來的呢？