終於出發喇！臨上機前，當然要影啲相先啦。時間到咧，上機！當我俾張機票空姐幫我過機時，嘩嘩嘩．吓．．彈票，當時好驚，唔知發生咗咩問題，空姐check咗一大輪後，跟住同我哋轉咗機位。攪錯，無端端幫我轉位做咩！空姐見我一番疑惑的眼神後，就同我講幫我同我太太由“經濟客位”轉做“商務客位”，yeah．．．bingo！！成世都未試個咁好運，真係未出發先興奮。一入機倉，空姐即時送上一杯香檳，然後坐係超寬闊座位，睇住部14cm大電視，興奮到震。起飛後不久，享用飛機餐，正！！食完日式頭盤再鋸扒，食完鮮果仲有芝士陪襯，跟住仲有‘蝦仁大’雪糕，大杯大杯白酒，哈哈哈．．．。後來同空姐談話中提及我倆是次是蜜月旅行，跟住呢．．．逐個逐個空姐走過來「Congratulations!!」，嗰種感覺勁唔自在，但亦好開心，因有人同我分享嘛。最後，臨落機前，國X航空更送了一盒朱古力給我倆呢，Sweet
Sweet！！
到咗日本喇！酒店預先安排專車接送，當一切安頓後，便開始旅程的第一個景點－北海道市政廳(紅磚屋)。由於北海道此季節很早便天黑，下午5時左右天空已黑透了，一片燈光照耀著紅磚屋，加上一絲絲的雨點，份外浪漫美麗，但是背後的代價就是－凍到透心！跟著，我們便到札幌電視塔，當乘坐電梯到塔頂後，360度的札幌夜景盡在眼簾，唯一可惜的是，大通公園及周遭的街燈未有完全開著呢。
是日行程完畢，當然又到晚餐的時候，之前網友說道有一間叫“蝦蟹合戰”，特色是北海道三大蟹(毛蟹，雪場蟹及長腳蟹)任吃，而本人亦在網上印了一張優惠卷係送你一細支葡萄酒(好過無)，去到之後，由於我和太太都不懂甚麼‘Sumimasen’，但好彩該店其中一個侍應是中國留學生，我倆說普通話勉強都能應付，估唔到人在日本，竟然Order食物係講普通話，哈哈．．．。
食飽後，我倆行了一會狸小路，買咗個新鮮富有柿，跟著便在薄野站搭地鐵到新札幌站，回Sheraton酒店，唉．．．惡夢便由呢一刻開始啊！當我沖完涼，搭咗成日飛機，梗係抱頭入睡，點知瞓咗一個鐘多啲，個身就開始痕，初時都不以為然，呀．．．抓下一個鐘，抓下又一個鐘，開始覺得唔對路，於是便叫醒老婆幫我睇下咩事。原來皮膚敏感，成身一撻撻，痕癢難耐，就係咁，成晚都無瞓。當時心想，第二朝重要攞車添，真係有啲後悔租車，成晚無瞓點揸車呢．．．．．．．。