疲倦的我，帶著沉重的身軀，開始尋找租車公司(Mazda Car Rental)，本人於網上透過Tocoo預約了一部1300cc的Mazda Demio。跟據租車公司回覆e-mail提供的地圖，我和太太便朝著札幌火車站北出口一直搜尋，誰不知．．．由早上8時許一直至9時都未能找到。問路咩！無人知響邊，有啲人就理都唔理你。於是，我便從附近街道的停車場入手，哈哈．．．無幾耐就俾我找到喇，原來Mazda個租車店廣告牌唔係寫Mazda，而係寫日文，重要唔多起眼，唉．．．。跟著我就同租車店個職員一齊check車，然後佢用啲唔咸唔淡嘅英文介紹車上的GPS(全球定位系統)掂用，基本功能勉強都識喇，大鑊．．．比原定嘅Plan遲咗成粒幾鐘，即時將目的地嘅電話輸入GPS，找到目的地同行車路線了，出發！
起初未習慣點睇個GPS畫面，入錯咗幾次路口，之後習慣咗都幾好用。陰公，札幌去層雲峽要揸3個幾鐘頭車，以我成晚無瞓嘅狀態，只能以一字記之曰‘慘’來形容，好彩無驚無險又到站，但可惜，心想係層雲峽睇紅葉，但係大部份都變咗枯枝，紅葉都尚有，但只剩下一點點。
不過就俾我哋見到雪景，一坐欖車上黑岳後，一整片的雪地就在我腳下，白芒芒一片非常美，積雪都接近1呎厚，我老婆見到咁嘅情景，就即刻變咗個細路一樣，係咁玩雪同擲雪球，真係辛苦少少都抵。跟住我地落山後，就揸車去夫妻瀑布(流星瀑布及銀河瀑布)同大函，可能因為季節關係，個瀑布較為少啲水流落嚟，而大函又無咩綠油油嘅樹葉襯托。
之後我哋就回程返札幌行街同預備食晚餐，途中又俾我哋有個驚喜，就係有兩頭蝦夷鹿(一大一細)係馬路上，可惜唔停得，如果唔係我一定影低佢。
額外一提，日本嘅IC高速公路甚少著路燈，當日回札幌只靠隱約嘅行車線揸車，真係好唔慣。返到酒店後，都已經晚上7點了，即刻放低部車，搭火車由新札幌去札幌食嘢，由於無帶止皮膚敏感藥，所以食飽後，即刻去藥房買定支皮膚敏感藥膏，避免重蹈覆轍，哈哈．．．今晚有覺好瞓了．．．zzzzzz。