中學四年級暑假無無聊聊，有朋友問我有冇興趣跑步，同佢一齊參加一個暑期訓練班，初時去到都係玩下玩下。但到第二堂，八號風球，得我一個去到同個阿SIR，我問佢跑唔跑，佢既答案緊係跑啦！就係咁，o係咁大雨既情況下，我同佢兩個一齊跑10個 200米，跑完之後覺得好有成功感，仲覺得個阿SIR好厲害，所以之後就下定決心，一定要好似阿SIR一樣跑得咁快。但而家同佢既距離都係差好遠好遠。佢跑每一個項目，每一個時間，我都係遙不可及。

中五學期初，我學校都有好多同學跑得比我更好、比我更快，有三個都係荃灣會。有一個同學見我好鍾意跑，所以佢問我不如你同我一齊去青衣運動場練習啦！ 我好奇問：同乜人跑呀？佢既答：一個田徑會既練習，有好多勁人。 就係佢，我就到荃灣田徑會既主場(青衣運動場)，之後跑得快一些，TWAC總教練(張志華)問我跑唔跑會賽？我答跑。就係咁我就成為TWAC既成員喇！

最難忘比賽經驗： 基本上，個個比賽我都好難忘，因為次次比賽都跑得唔好。但上年我參加澳門國際馬拉松，係我人生中第一個馬拉松，仲未夠二十歲，跑完之後，其實都唔係咁倦，但o係跑既過程中，最後17公里有個好朋友(阿輝)同我一齊跑，我同佢一邊跑一邊談天說地。跑得好開心，我跑比賽從未試過跑得咁輕鬆，覺得好自由自在。雖然時間跑得唔係快，又唔係好，但都算係三個小時內完成，都算係咁啦！

個人最佳成績：唔係咁想講，因為冇一個時間跑得好，遲些......再同大家講。

個人感受： 現在我有兩個屬會，第一個係TWAC，我會代表TWAC跑團體賽。第二個係HVAA，大部分公路賽就會代表HVAA，張SIR(張文豪)係我啟蒙老師，所以我都會代表HVAA跑步。

最難忘事情： 在 2003年，2004年既屈臣氏越野錦標賽，我真係好難忘......

2003年：因為冇練跑既關係，所以最初諗住跑下就算，但後來發覺唔夠人跑，我逼住仲有一個多月既時間練習，而且係我最後一次青年組既越野賽，結果在不要命的比賽下，終於都拎左團體第一名。這是我第一次的青年組團體第一名。又係最後一次。自此之後，當時我就有一個別名：小螺絲

2004年：剛剛升到公開組，而這時，主席既關係，我一定要跑得更好，一定要完成主席既心願，就係TWAC不單止要青年，而且公開都要奪標，但當時存在很多不利因素，如有人冇做田總証，有的在比賽前一星期腳傷......但最後都能夠達成主席既心願，而且青年既張文明及公開組既陳家豪都係冠軍，更厲害的是陳家豪當日把MARK WILLIAMS擊敗，簡直令人振奮。而紀嘉文只係僅次於他們，全場第三。結果青年及公開組都能奪標，真係好開心！

展望： 我希望能夠跑得更好，希望有機會代表香港參加比賽。

24/7/2005