[蘋果日報]　有碟話碟：《金牌女兒紅》拉雜成軍

金牌女歌手和無線花旦的合輯《金牌女兒紅》出版當晚，老蘭某酒吧內，唱片界橋王C跟電視台師爺D飲大兩杯，開始語無倫次……

C：「都話我條橋得啦，舊年隻《男人魅》咁成功，今次隻全女班既《女兒紅》，唔慌差得去邊。」

D：「你咪咁老定呀，我公司班姐仔冇個係唱家班。你睇佘詩曼唱個首《黃沙中的戀人》，開頭『啊啊啊』個幾下冇黎神氣，搵黎姿唱都好過佢。」

C：「但的詞填得岩feel喎，劇集歌曲唱得好唔好只係其次，套劇掂歌就自然掂，電視劇歌製作方法唔可以同一般流行曲比較，始終電視劇既潮流係慢的，走得太前觀眾反而唔接受。」

D：「好彩廖碧兒首《實情》都夠hit，唱功係就幼嫩的，但有板有眼，人靚聲甜，聽得佢有用心去唱，抵佢有得唱多首《分手》。」

C：「大佬，我做唱片架。五音不全係電腦禁一個掣就可以tune番正，唱片錄音唔可以作準，一般觀眾更加聽唔出。但發音唔正就點都tune唔到，你睇楊秀惠翻唱吳卓羲首《別怪他》就真係怪雞，廣東咬字好唔正，唔睇歌詞都唔知唱乜。」

D：「冇得比喎，楊秀惠係大馬人，都要畀下機會佢。不過咁多個姐仔中，胡杏兒似乎最有天份，聲底夠實淨，佢首《幸而》都唔係咁易唱。」

C：「鍾嘉欣首《發誓》都唔差呀，把聲似足鄧麗欣mix埋梁詠琪，唔拍劇淨唱歌都得。」

D：「似人即係冇性格者，聽完都唔出邊個唱，似鄧麗欣不如聽番鄧麗欣，佢首《Let it flow》，雖然同舊作《青山散步》冇得比，起碼清新。」

C：「講突出都係側田作曲、楊千嬅唱既《有過去的女人》，background個groove好紮實，歌曲推進有晒層次，林若寧既詞似樣好多，比同碟其他歌有血有肉，真係冇得頂。」

D：「你係咪飲醉左呀？今次隻碟擺明係玩電視同唱片crossover，拉雜成軍，宣傳多於一切，唔係因為有好歌而出碟。」

C：「呢度講呢度散，我覺得隻碟除左班花旦既fans，相信冇乜人有興趣。萬一落係的尖酸刻薄樂評手上，更加難以想像……」