呢排好多鬥氣事件......都唔知點講好啦，或者大家觀點唔同啦!今年聖誕唔多想出街，太多人啦，而且年年都出尖咀....真係好悶...唔想出呀!最後係揀左九龍灣食飯，d燈飾都幾靚呀!係淘大果間鐵匠幾抵食呀，食左四樣野先至$110!真係好抵!然後去德福影左一輪相先走。

送完老婆返屋企之後，收到蛇仔call，今晚有魚釣，成2星期未去過，當然手痕痕啦!即刻打比老婆請示，起衫初唔比架，不過講左陣就比去啦!不過今晚都無收獲，最得意係捉到隻龜....

今日第一堂係8:30，好早就要返到去....今日中文玩評論，即係好似社評果d啦，都ok，限時之內做完~~~不過kathy就趕唔切，不過都可以聽日交，不過d分九折囉~嗯，妳要增加對連接詞既認識呀~~~同埋句子要加多d語氣呀~!

3個鐘lunch去左飲茶，不過全世界都驚左安東尼，我都要避一避呀!如果唔係我都好難做架!QM上堂比人捉左去做數....LOG....唔識呀....做極都唔明，不過近排跟啊諾諾玩賭波，不過唔會沉迷既!

放學之後返工，校長話唔續下季張約啦....唉....要再搵part time啦.. ..不過係呢間學校做左2年半，真係幾唔捨得，同事啦...d校工啦....d學生啦~呼~~~~

放工之後去左坑口站交收，bit左個相機袋!勁抵!原本$50架，之後我去佢果邊，佢就扣埋車錢比我，最後只需$30!而且佢重送多一個大d既相機袋比我!噢!一次過可以放晒機身!濾鏡!

留意下張相.... (我影架...好好玩)

今日上Inter玩匯報，我尋晚就用左大約一個鐘準備，講果時都ok，不過有少少dead air而已，不過老婆就大件事....到佢出去講果陣，我就寫緊野，然後突然有同學叫我，佢地就指住老婆，原來傻妹係度喊bor....我起初都唔知咩事，六神無主，咁我就行出去佢前d既位置，比返d信心佢，咁我都希望佢可以講埋先...做埋呢個pre-selt先安慰佢(會唔會太嚴呢.....)

然後返到埋位....喊左好耐好耐...我就不斷安慰佢啊..幫佢抹口水鼻涕..啊權都走埋黎安慰佢呀~(傻妹~~唔好喊喊啦!)之後過左20分鐘，心情終於好轉...即刻笑返晒(女人真難明.....)原來係因為當佢講以前返工做野既辛酸史...一時感嘆得滯...喊左出黎，呢份感染力攪到我都眼紅紅...連Miss都喊埋出黎....> 口<

今日放學放3:30，好開心，可以咁早放，唔洗上無聊堂，又同老婆講返我地之間既問題....今日我毫無保留講左我既感受比佢聽...因為我真係放係心底太耐啦...我唔講，問題都唔會解決，其實我最希望佢改既，就係性格...

前日係12月15日，分別係肥熊同碩雯生日，今次又係難黎我屋企開Party，不過好鬼死多野未準備，由6點開始攪剪片同準備要玩既皇帝遊戲，蛇仔預早上黎幫手，不過都係睇漫畫...無咩幫手，我家姐同佢男友來左，係度整野食，jackie真係勁，整左炒公仔面，勁好味!

大約到10點，叫pizza食，餓到扒係度，之後大約11點就差不多人齊，差肥華未到，唯有打住機等，到11點半，肥華到達，睇返上一次party既片段，又係笑爆咀，成晚最激都係肥華除剩條白色三角褲，笑到我瀨尿!就咁玩下玩下直到2點幾，切蛋糕(差d唔記得食!)然後第一次無掟蛋糕咁散場!如果蛇仔早有預謀!等肥華走果刻追殺佢，點知一早走鬼左，追到追唔到...佢果然醒左!最後我一個人執埋、掃地拖地...到3點到先訓。

尋日夜晚終於開工整網頁，就咁整到4點鍾，11點半先起身，一起身就渾渾噩噩咁，整下網頁，睇下電視。之後2點碩雯急召我，話要返博康食車仔面，橫掂悶悶地，咪叫埋肥華一齊出去囉，死仔話5分鐘後到，一等就要3個字。食完野，走左坐左陣，吹左陣水，之後嘉璐話聽日搵埋我地一齊去傾下計，見下面咁，計一計數，都成4年幾未見過佢囉....

日頭上堂...無咩特別，夜晚去左釣魚，今日多左斌仔(會長)去幫下手，支援下咁話，其實今日天氣轉涼，我怕d魚因為未適應今日溫度，唔多開口食餌，不過都係去試下好。到左例牌釣點，蛇仔已經開左桿拖假餌，我都拿拿臨開架生啦!不過釣左個幾鐘之後，都係零魚訊，慘過鬼....

悶悶地，上次買左d玩具刀，今次拎埋去劈友，真係笑鬼死....個個爭住玩，人人都圍砍肥仔，一輪瘋癲撕殺之後，又坐定定繼續釣，突然之間，一大群魚仔好急速遊過，而且好亂，怕且都係比大魚趕入黎，四條友心血同戰意怒升100度，個個都爭靚位釣!但15分鐘後........魚群消失，各人呆若木雞...蛇仔隨即爆響口：「唔ｘ係呀！咁都無魚食!?」又一次龜績....之後就釣到12點幾收桿返屋企啦....