這張相係我三歲前影的，果時我住在木屋區，據聞間木屋係爸爸起的；我呢個髮型亦是老豆操刀的。我和哥哥、姐姐每人各有一個座駕，如下圖所示，我果個座駕係隻唐老鴨車仔，而姐姐的係部小型三輪單車。姐姐今日睇到呢幅相仲話：你咁好有部唐老鴨車仔，我部單車幾咁寒酸。但大家有冇留意到，部唐老鴨車仔表面風光，其實要用對腳爬下爬下先至行到ｏ既。兼且小時候平衡力不足，又想行得快，爬下爬下就成部車塌埋一邊ｏ添。

所以當時小孩子心態好想踩家姐部單車，唔駛爬，車速仲快成倍。但我總係有個強烈的記憶，就係每一次我哭鬧要坐上部單車時，總係比阿爸阿媽抱番落唐老鴨度。可能我太細個，表達能力不足，無論我點講，佢ｏ地硬係唔相信我識踩單車。我果時諗，三輪之嘛，又唔係二輪，有咩咁難呢！而家諗番起，可能佢見我連四輪ｏ既唐老鴨都歪塌，所以唔信我安全踩到三輪。但係，阿媽，"踩"三輪車點都易過"爬"四輪車ｏ卦！