F4，鬼叫你紅！

轉載至香港新浪網
跟紅頂白，向來是有風駛盡里娛樂圈的「至理名言」，唔紅嘅，那管你死人冧樓，都一於少理；大紅大紫嘅，就要預左俾人有咁盡用到咁盡。好似近期當紅的F4，前幾日黎香港幫百事做宣傳，全個音樂會攬住罐汽水通台走，HardSell到無倫，連夜晚的私人慶功宴都照樣俾周刊登晒做封面，真係「只要你紅，就一定用到你盡!」

不過，電視台都唔執輸，好似亞視執水尾，買左部《流星花園》的播映權，結果，收視都有番咁上下，就自必然繼續利用F4的人氣大做宣傳。百事唔畀亞視採訪，又博到上一日頭條。昨日幫《夏日陽光美少女》搞記招谷宣傳，無厘頭擺幾個紙板公仔出黎，又叫班女仔選心目中最愛F4邊位成員，就連今晚都用《流星花園》從末曝光的片段做噱頭硬撼港姐，亞視呢招食得唔好，可能隨時殺無線一個措手不及！