21.12.2001        停拍多時《2046》上海正式復工.王家衛暗彈木村演技差

王家衛昨日透露停拍多時的《2046》正在上海復工，但卻未有提及曾公開表示不滿他拍攝手法的木村拓哉有否再參演，只語帶雙關地說：「演員做得唔好，係導演的責任！」以退為進的言論，卻被指有暗彈木村之嫌。

王家衛執導的《花樣年華》，昨日舉行記者會宣布發行電影特別版VCD，片中還輯錄了《花》片從未曝光的八十分鐘片段，包括在片中飾演梁朝偉太太的孫佳君，在電影上映時被刪減的片段。

當記者問到曾公開表示不滿他沒有劇本的木村拓哉，在《2046》的演出，會否如孫佳君般，要推出VCD才重見天日，王家衛說：「《2046》拍攝時我唔會諗唔要邊個的戲分，佢做得唔好係導演的責任，我唔希望有這些事。《2046》在上海拍緊啦！（木村仲有冇份，之前有傳佢唔拍？）唔話你知，唉！日本經常有好多消息傳出啦！」

自稱現場改劇本
此時身旁的孫佳君卻突然表示王家衛拍《花》片時亦沒有劇本，令她在拍攝現場甚為困擾，王家衛聞言即暗寸她說：「有！你都有睇劇本拍啦！其實因為我鍾意成日改戲，所以好多時現場先寫！」另外孫佳君談及戲分重見天日亦表示：「上映時我的戲分出唔到街梗係失望啦！因為連自己都未睇過自己拍過乜，依家有機會睇番好開心。」

另外，記者問孫佳君與羅兆輝名下的淺水灣豪宅成為銀主盤一事時，她只說：「今日淨係講《花樣年華》，依家唔答住，下年先答啦！（係咪冇錢供？）唔想再講呢件事。（與羅兆輝有否聯絡？）都話唔講，再問我就走！（會唔會唔敢再投資？）總之以後我會將自己投資落電影度。」(太陽網)

王家衛說演員做得不好是導演的責任。