school

小強車學堂

小強車學堂嘅開放並非小強要教大家揸車，我自己手車都係普普通通啫，只係想可以同大家分享一下我揸車嘅心得，亦好歡迎大家來一起討論，文流一下㗎 !

突發事故時的應變

我今次想講嘅係喺揸車事件簿所提及嘅問題。究竟如果真係有車突然 CUT 埋黎，或者前面突然有野衝出黎，我地應該點做呢 ? 其實而家講緊嘅都係突發事故，好難話可以即時做出嘅都係正確反應，好似前面有車突然收掣，潛意識嘅反射動作可能令我地立即急速扭軚，意圖避開前車，但其實咁樣做已經錯左。咁點樣改變自己嘅潛意識呢 ? 其實就好難架喇，不過只要我地經常提醒自己若真係有呢 D 事發生嘅時候應該點做，有時間喺安全嘅地方練習一下，應該可以俾自己個腦記低，讓事發時有正確嘅反應 !

就講突然有車 CUT 埋黎先吖 ! 如果有車高速從後駛上，你就要打打醒十二分精神，預左隨時有時發生，呢個好講你平時嘅駕駛習慣，有冇多D留意路面情況，多唔多望後鏡。但如果咁唔好彩真係有車突然CUT埋你度咁正確嘅做法係點呢 ?

千祈唔好急速扭軚

首先第一樣要做，就係踩 BRAKE，千祈唔好扭軚，你一扭軚架車就會因急速轉彎而失控，隨時撞埋壆或者隔離線嘅車度，因為其實只要收慢架車已經可以同前車拉遠距離，況且佢CUT得埋黎都唔會即撞，因梗與前車有些少距離，就算前車 CUT 埋黎再踩 BRAKE ( BRAKE 燈著左，即係擺明同你玩野 )，亦毋須扭軚，因為前車係以同你差不多嘅速度行駛，即係大家都一齊郁緊，而你又已經踩 BRAKE 收慢，就算有碰撞損毀都極輕微，個人就更加無事，除左嚇餐飽之外。不過一定要捉實膛軚，避免因碰撞而失控。

善後工作

這時對方如不顧而去，就盡量記低佢個車牌號碼，然後停埋一邊善後。如對方停車你就跟住佢尾停車，如在高速公路，就應該將車駛埋路肩，如果唔係就停在原地，但人一定要離開車廂。呢個時候基本上佢講乜都冇用，我建議唔駛同佢講數，因為佢衰硬，絕對唔可以姑息呢種人，要立即報警，等警察黎攪掂，告埋佢不小心駕駛，呢個至係正確做法。我以上所講都係假設你亦係以安全車速行駛，唔係就閣下自理喇 !

2 秒守則

咁至於有東西 ( 人或狗或其他 ) 衝出馬路又點呢 ? 我自己嘅格言就係「你死好過我死」，佢亂咁衝出馬路係你唔啱，撞死都冇說話好講，你一扭軚就撞燈柱、剷上壆或行人路，所以唯一可以做嘅都係剎車，睇下佢好唔好彩，DUP 唔 DUP 得切喇 !至於前車突然減速而炒車就更簡單，遵守 2 秒守則，方法你睇住前車經過嘅地方，例如前面一條燈柱，佢經過之後你就數「一千零一、一千零二」，你至到𠴱支燈柱嘅話，即係你同前車保持有 2秒距離，車速越快距離前車應該越遠。而大埔吐露港公路地上更有人字符號，方便駕車人士判斷與前車距離，離開 2 個人字就為之安全。不過講真，香港 D 路咁多車，要遵守 2 秒守則都幾難，你跟咁開個位咪俾人攝左 ! 所以我個人認為最少都要離前車一架巴士位咁上下，夜晚少車嘅時候離更遠更好。千祈唔好跟貼D大車，佢咁大架將前面視線完全阻擋，前面有事發生你都睇唔到，佢一重 DUP 你就同佢車尾 KISS 喇。不過我覺得香港D駕駛人士好鍾意 "拮" 住 D 車黎行，好似前面架車拖住佢行咁，所以一有咩事起上黎咪食串燒囉，尤其夜晚都冇乜車嘅時候都跟貼前車來行，呢D人炒死都抵呀 !