今日一早 9:00要去小額錢債庭，一早7:00幾要爬起身，都幾想死﹗雖然尋日已經做哂工課準備好，但本身尋日開始作病，個狀態真係麻麻~都有些少擔心。 去到同個客傾，根本傾唔到，佢激動到想殺人咁。之後先知原來，原本佢九月份結婚，但為左依件事，依家同未婚夫分開左，婚就結唔成。講講下仲喊 ~ 唉﹗之後佢仲問個主任需唔需要搵個前男友做証？( ﹗)情況一發不可收拾。可能佢唔覺，但從佢一D小動作中可以睇到，佢既情緒好有問題。佢不斷問我﹕你話丫．．．你話丫．．．﹗比著你．．．比著你．．．”可能我蠢，我真係唔識答。之後唯有再排期一月再審。 我唔明白，愛情響依家係咪已經比人做左定位？可以用好多實質既野去量度出來？個男人可以為錢？肥？而悔約。而個女既，因為失去左一 D野，係咪搵番些少所謂"榨那"（錢）填補就會好過一 D？我唔知﹗

可能我內懦弱，自尊心強，如果我既男人係咁，我唔會有咁大勇氣同一D唔識既人講我既不幸。就算係識都未必會。自己已經受傷，我只希望好好療傷，點解仲要搵機會響傷口灑鹽？我知道每個人都有唔同既表達方式，但我已經老喇，唔再小朋友。我真係唔忍心響人面前出一個咁大既醜，我知道我已經負擔唔黎。但如果我係１７、１８，我會﹗可能做得更狠，反正年輕，有何不可？比著你．．．你又會點做呢？

祝好

EMILY