最近天氣反覆, 有個朋友既朋友病左, 可能因為喉痛以致失聲, 問我食乜好. 我自細除左喉痛同咳就百病不侵(都夠啦)!! 所以問我點算就最晒, 雖然我都幫唔到手. 除左食 E喉痛同咳既藥水之外, 可以食蘋果....蘋果??

係啊!! 之前D朋友(Jessie同阿Ken)教, 用蘋果切粒, 擺落個碗/碟, 落D蜜糖, 隔水蒸10-15分鐘. 可以當甜品, 但亦有潤喉潤肺止咳既作用, 如果要加強效力, 可以去藥材鋪買D川貝磨碎佢一齊蒸.

估唔到我朋友聽左之後, 真係身體力行, 日日整比佢朋友食, 不過都係開唔到聲 :<

講起蘋果, 令人聯想到阿當夏娃的禁果, 其實, 聖經冇話佢係蘋果, 而係「知識樹」(or 分辦善惡樹)既果; 箴言話: 一句話講得得體, 好似金蘋果跌係銀網子裡(即係點?)咁靚同明貴, 雅歌裡面既新娘形容佢情人好似林中既蘋果樹(太矮?)可以躺在佢懷中, 但牛頓卻因躺在蘋果樹下而中「頭獎」(唔知佢當時係咪拍緊拖?).......總而言之, 一日一蘋果, E生係咪真係會遠離我呢? 除非我好有錢, 否則, 就算我有病, E生都唔會走去我屋企接近我, 既然唔會接近, 又點遠離呢? 所以事實可能係: 一日一蘋果, E生見少左 :>