Hríseyjarkirkja
var vígð 26.ágúst 1928. Arkitekt var Guðjón
Samúelsson og smiðir Þorsteinn Þorsteinsson frá
Lóni og Jón Einarsson. Frumkvöðlar að
kirkjubyggingunni voru konur í Kvenfélagi Hríseyjar.
Í upphafi var kirkjan máluð af Jóni Þór
og Vigfúsi Jónssyni frá Akureyri en síðan
hefur Hörður Jörundsson málarameistari málað
hana árin 1960 og 1990.
Jón
Espólín segir að enskir hafi eytt Ólafsfirði
og Hrísey og brennt þar kirkju árið 1423.
Í prestatali og prófasta á Íslandi segir að
alkirkja hafi verið fyrrum í landi Syðstabæjar en
bænhús í landi Ystabæjar. Síðar
var bænhús í Syðstabæ en var lagt niður
með konungsbréfi 15.maí 1765.
Áður
en kirkja var byggð í Hrísey áttu menn kirkjusókn
í Stærra-Árskógskirkju. Hrísey
tilheyrði Stærra-Árskógssókn þar til
23.janúar 1928 þegar Hrísey var gerð að sér
sókn. Hrísey tilheyrði Stærra-Árskógsprestakalli,
síðan Vallaprestakalli og Hríseyjarprestakalli frá
árinu 1951. Í Hríseyjarprestakalli eru 2 sóknir,
Hríseyjarsókn og Stærra-Árskógssókn.
Í Hríseyjarsókn eru um 200 sóknarbörn
en í prestakallinu öllu um 600 manns.
Fyrsti
prestur Hríseyjarprestakalls var séra Fjalarr Sigurjónsson
1952- 1963, síðan herra Bolli Gústafsson vígslubiskup
1963- 1966, séra Kári Valsson 1966- 1982, séra Sigurður
Arngímsson 1982- 1984, séra Helgi Hróbjartsson 1984-
1986 og séra Hulda Hrönn M. Helgadóttir frá 1987.
