OCTOBER 2003

VOL 1. NO.1

ANG KATOTOHANAN ANG MAGPAPALAYA SA IYO Labindalawa lamang ang mga alagad ni Kristo nang pasimulan niya ang misyon niya rito sa lupa. Ngunit matapos ang ilandaang taon, ang Kristiyanismo ang naging pinakalaganap na pananampalataya sa mundo. Nang itatag nina Bonifacio ang Katipunan sa Tondo noong 1892, sampu lamang silang nagtipon-tipon sa Tondo. Ngunit makalipas ang apat na taon lamang, pinasiklab nila ang rebolusyon na nagluwal ng kalayaan ng Pilipinas. Ganyan ang lahat ng bagong ideya. Nagsisimula ito sa maliit at dahan-dahang lumalaki. Hanggang tuluyan itong makapangibabaw. Lalo pa’t ang ideyang ito ang nagdadala ng katotohanan. Mahirap supilin ang katotohanan. Maaaring mapigil ito panandali lamang. Ngunit susulong at susulong ito hanggang yakapin ito ng mga tao. Kaytagal nang nangingibabaw sa Marikina ang isang uri ng kaisipan. Isang kaisipan na iisa lang ang sinasabi--na ang Marikina ay modelo sa kalinisan at kagandahan. At dapat itong tularan ng ibang siyudad at bayan. Pinagtatakpan nito ang mas mahalagang katotohanan. Hindi napag-uusapan ang mga katiwalian sa city hall. Hindi nababanggit ang walang katuturang paglustay ng pera ng bayan. Hindi nadi-diario ang pagbagsak ng industriya ng sapatos at iba pang negosyo rito. Hindi nalalantad ang mga illegal at labis-labis na buwis sa ating siyudad. Hindi tumatampok ang laganap na kriminalidad na bunga ng kahirapan at kawalan ng hanapbuhay. Totoo ang mga ito. Ngunit hindi lumalabas at lumalaganap. Kayat hindi tayo malaya. Alipin tayo ng kasinungalingan. Ngunit hindi panghabang-panahong masisikil ang katotohanan. Lalabas at lalabas ito. Ito ang dahilan kung bakit namin inilalathala ang Lak-Bayan. Ito ang maliit naming ambag sa paglilinglod sa katotohanan. Dito, mababasa ninyo ang mga bagay na hindi nyo pa alam dahil pilit ikinukubli sa inyong paningin. Ang diariong ito ay tungkol sa inyo at sa mga nais nyong sabihin. Sa inyo ito. At ang katotohanang mababasa ninyo rito ang magpapalaya sa inyo.