BALITA - Pebrero 15, 2005
References: Connie Bragas-Regalado, Tagapangulo, 259-1145 & 0927-2157392
Vince Borneo, Information Officer, 0927-7968198

MIGRANTE: Kinokondena ng mga OFW at pamilya ang pagbomba sa Makati, Davao at Gensan; sumuporta sa panawagang makipag-truce ang gubyerno sa MNLF

"Mahigpit na kinukondena ng mga overseas Filipino workers at kanilang mga pamilya sa ilalim ng Migrante Sectoral Party ang naganap na serye ng mga pambobomba sa mga lunsod ng Makati, Davao at General Santos na ikinasawi ng hindi bababa sa 10 katao at ikinasugat ng mahigit 136 iba pa sa magkakahiwalay na insidente ng pagsabog kagabi.

"Mahigpit naming kinokondena ang serye ng mga pagsabog. Nakikiramay din kami sa mga pamilya ng mga nasawi at nasugatang ordinaryong sibilyan. Kailangang mahuli, malitis at maparusahan ang mga may pakana ng panibagong pananakot na ito sa mamamayan. Dapat hindi ulit mangyari ang walang-batayang pagdadampot ng mga kapatid nating mga Muslim sa Culiat, Taguig at Quiapo upang may maiprisinta lamang sa media na umano'y mga 'suspect bombers,'" ayon kay Connie Bragas-Regalado, tagapangulo ng Migrante Sectoral Party.

Nanawagan si Bragas-Regalado sa lahat ng mamamayan na mahigpit na magbantay sa mga susunod pang pangyayari, lalo na ang mga hakbang ng pamahalaan. "Dapat mahuli agad ang tunay na salarin ng pambobomba sa tatlong syudad. Nananawagan kami sa pulisya at militar na huwag basta-basta manghuli at magharap sa media ng mga suspek."

Nangangamba ang Migrante na baka "gawin 'smokescreen' ng Malakanyang ang mga insidente ng pambobomba para palawakin pa ang gyera sa Mindanao."

"Hindi dapat gawing dahilan ng gubyernong Macapagal-Arroyo at Armed Forces of the Philippines ang mga pagsabog para patindihin at palawaking pa ang atakeng militar sa Sulu. Marami nang sibilyan ang nadadamay sa mga operasyong militar sa Sulu kung saan 100 na ang napatay at 7,000 sibilyan ang napilitang lumikas sa Panamao at mga karatig bayan sa Sulu. Sinusuportahan ng Migrante ang panawagan sa gubyerno na itigil na ang pambobomba sa Sulu at magpursige pa sa isang "truce" sa mga grupong tinutugis, partikular sa Moro National Liberation Front, sa lalawigan ng Sulu para wala nang sibilyang mapipinsala sa gyera," ani Bragas-Regalado.

"Ang insidente sa Makati, Davao at GenSan ay hindi dahilan para magdeklara ng todo-largang panggegyera sa Sulu at sa buong Mindanao. Dahil kapag nagtodo-gyera ang AFP sa Mindanao, mas maraming sibilyan ang madadamay, kasama na ang milyun-milyong pamilya't kaanak ng mga OFW," ani Bragas-Regalado. #