Tinutugis ang mga undocumented OFW at bakla sa Saudi Arabia!

Kinukwestyon ng Migrante Sectoral Party ang pananahimik ng gubyernong Macapagal-Arroyo sa rumaragasang crackdown laban sa mga undocumented na overseas Filipino workers (OFW) at mga bakla sa Saudi Arabia, lalo na't daan-daang mga Pilipino ang maaaring maaresto, ikulong at i-kriminalisa sa nasabing bansa.

"Bakit tahimik ang Malacanang sa nagaganap na 'crackdown laban sa krimen' ng gubyerno ng Saudi Arabia? Hindi bababa sa 1,000 Pilipinong OFW at hindi masabing bilang na mga bakla na nakakalat sa buong Saudi Arabia ang mabibiktima sa mga reyd at pambububog doon," ani Connie Bragas-Regalado, tagapangulo ng MIGRANTE Sectoral Party.

Pinahihigpit ng Saudi Arabia ang kanyang security at immigration procedures sa konteksto ng war of terror ng Estados Unidos. Lahat ng mga migrante na walang mga work permits at iba pang porma ng mga papeles at ID ay aarestuhin, ikukulong at idedeport.

"Kami'y nagugulantang sa patuloy na pananahimik ng Malacanang, Department of Foreign Affairs at ang Philippine embassy sa Saudi Arabia sa patuloy na crackdown doon. Dapat alalahanin ng administrasyon Macapagal-Arroyo na daan-daang mga OFWs ay istranded sa mga syudad ng Riyadh, Jeddah at Al-Khobar. Ang mga OFW na ito ay tumakas sa mga abusadong mga employer kung kaya't wala silang mga iqama (work permits) at pasaporte. Karamihan sa mga ito ay sinampahan ng mga gawa-gawang kaso ng pagnanakaw, pag-iinom ng alak at pagiging bakla. Wala rin silang tsansa para sa pantay na paglilitis at proteksyon sa ilalim ng batas-Saudi Arabia. Mas malala pa ang mararanasan ng mga Pilipinong bakla dahil kung sila ay mahuli ay posibleng ipataw ang parusang kamatayan sa dahil bawal ang bakla sa Saudi Arabia," ani ni Bragas-Regalado.

Lumabas na sa iba't ibang pahayagan sa Middle East na naglulunsad na ng mga reyd ang Saudi government sa Riyadh, Makkah, Taif at Jeddah noong Abril bilang bahagi ng kanilang "nationwide anti-crime campaign." Isang Pilipino na napagkamalang bakla ay hinuli at binugbog bago pakawalan. Walang datos kung ilang mga posibleng mga baklang Pilipino sa bansa.

"Sa itinatakbo ng crackdown, mga 15,000 migranteng undocumented mula sa Somalia, Chad, Yemen, Bangladesh at Pilipinas ay naaresto noon pang Abril," ani Bragas-Regalado.

Walang komento man lang ang makuha ng Migrante sa mga kinauukulan sa DFA at kay Philippine Ambassador Bahnarim Guinomla sa Riyadh. There are at least 915,000 Filipinos in Saudi Arabia.

"Isama na rito ang pagsang-ayon ng Malacanang sa fingerprinting procedure para sa lahat ng mga tao - kaysa ang mga OFWs - na pumapasok sa Saudi Arabia, halatang sumasang-ayon ang administrasyon Macapagal-Arroyo sa pagkriminalisa ng gubyernong Saudi Arabia sa mga OFWs at mga bakla," pagtatapos ni Bragas-Regalado. #