OFW na napagkamalang bakla, binugbog sa Saudi Arabia

Ibinunyag ng Migrante Sectoral Party ang kawalang-hiyaang dinanas ng isang overseas Filipino worker sa Saudi Arabia na binugbog ng mga pulis matapos maparatangang bakla sa konserbatibong bansa.

"Mismo ipinahayag ng embahada ng Pilipinas noon pang Mayo 10 na binugbog ng tatlong religious police ng Saudi Arabia ang OFW na si Graciano Cauilan. Ang dahilan? Pinagsuspetsahan siyang bakla ng mga nag-asunto sa kanya," banggit ni Connie Bragas-Regalado, tagapangulo ng MIGRANTE Sectoral Party.

Dinakip si Cauilan sa Old Industrial City sa loob ng Riyadh noong Mayo 5. Matapos hingan ng kanyang iqama o work permit, biglang pinaratangan siyang bakla at agad na sinuntok, tinuhod at isinakay sa isang Nissan Patrol SUV na may plate no. 872.

Matapos dalhin sa kanilang pinuno, dinala si Cauilan sa ospital kung saan ginamot ang kanyang mga sugat sa ulo at iba't-ibang bahagi ng katawan.

"Ang tanging pahayag ng embahada sa pangyayaring ito ay 'grave concern over the excessive and unnecessary use of force on a Filipino man on mere suspicion of being a homosexual.' Walang iniisip si Philippine Amb. Bahnarim Guinomla na hakbang para bigyang proteksyon ang daan-daang istranded na OFWs na walang trabaho at mga baklang Pinoy na nakakalat sa buong Saudi Arabia. Maraming Pilipino ang maaaring ma-aresto, mabugbog at makulong sa nasabing bansa," ani Bragas-Regalado.

Wala ring sagot ang pamahalaan sa matagal nang hinihiling ng miltanteng grupo na bigyang proteksyon ang mga 915,000 OFWs sa harap ng rumaragasang crackdown laban sa mga undocumented na migrante at mga bakla na parehong binabansagang mga kriminal ng gubyernong Saudi Arabia.

"Dapat nang magsampa ng diplomatic protest ang pamahalaan sa gubyerno ng Saudi Arabia sa nangyari kay Cauilan. Ngunit ang patuloy na pananahimik ng Malacanang ay dagdag na patunay na walang pakialam ang administrasyong Macapagal-Arroyo sa kalagayan at kagalingan ng mga OFW sa nasabing bansa," ani Bragas-Regalado.