La ter-globo jiras cirkum la suno unfoye en 365 dii, 5 hori, 48 minuti, 51 sekundi, e rotacas cirkum su en 24 hori.  Ica sistemo di aranjo havas mea aprobo.

    Kad la globo duros rotacar pos mea morto me ne savas.  Se yes la esos tre desutila disipo di energio ed ago pro qua me faliis deskovrar racionoza skopo.

    La mondo esas habitata da me e la cetera personi. Le laste mencionita tote ne importas.

    Esas nun definitive pruvita, ke manjar fishi esas bona por la cerebro (por la cerebro di la manjinto, ne di la fisho).  La desfacilajo esas, ke ne existas sat multa fishi en la totajo di la maro por donar pasable granda cerebro-povo a kelka personi.

    Esas multa personi qui, se li ne manjas fishi, komencas parolar quale foli, e la manjo di fishi ne facas multa difero.

    Se vu pozas granulo de salo sur la extremajo di la kaudo di ucelo, ol divenas facile kaptebla, nam ol falas del extremajo di la kaudo.  Se esas la ucelo, e ne la granulo di salo, quan vu deziras kaptar, la maxim bona procedo esas rostar ol ante pozar salo-granulo.

    Che Southend-on-Sea (Anglia) la "voco di la maro" mencionita dal poeto, esas klare dicernebla.  Ol krias "bona taso de teo, sioro" ed anke "Fotografuro, Sioro, vu e la damzelo, un shilling".

    Esas populara kredo ke la povo ri-produktar sua speco esas limitizita al animali e vejetal kreitaji.  Tamen, retro-venante adheme pos luxoza repasto, kelka personi semblas vidar du horloji ube, ye lia departo, existis nur un.