En la triesma yaro di sua regno la rejo Ahasveros facis en la chefurbo Shushan festino a sua princi e vasali, a la satrapi di Persia e di Media, ed exposis koram li la richaji e la glorio di sua imperio.  La festino duris cent e okadek dii.  La manjopladi e drinkovazi esis ek oro ed arjento.  Sur la pladi videsis manjaji di maxim delikata sorti: kamelala gibi en sauco di koquita fishi, karno di gravida asnini, garnisita per rostita akridi, marinita raupi di papilioni pudrizita per maiza farino, hepati di olda kati en lakto di ratini. Pri la liquori on havis ti ek beri, ek mielo, ek hordea e maiza malto, ek diversa frukti.

Singlu povis drinkar kande lu volis sen mustar vartar sua  foyo, nam esis suficanta quanti de drinkovazi raptita ek la templi dil Hindui, Egiptiani, Greki, Hebrei, Filistri ed c.

Ahasveros igis la gasti drinkar e manjar ek ta sakra utensili intence, por demonstrar la impotenteso dil stranjera dei e samtempe valorigar la dei di Persia qui helpis il spoliar la templi dil vinkiti.  Ho blindo!  Il ne savis la parabolo pri la porko e la socisi.

La festino esis tante splendida ke esus vana volar deskriptar ol.  Se la folii dil foresti transformesus en skribili, la riveri en inko la tota tero en skribofolio, lo ne esus suficanta por reprezentar olua beleso.  Lo nedicebla esas bedicebla.  La festino esis joyoza.  La dineo e drinko  esis spicizata per konversi edifikiva ed amuzanta, solena e gaya.  La rejo sidis sur la trono di Solomon la Saja, olqua transportesis ek Jerusalem, ed ilua kordio joyis, kande il audis la racionoza konversi dil gasti.

On aranjis konkursi inter la ciensisti pri diversa nobla temi: uni questionis, altri respondis.

    "Pro quo la dei igis la suno lumar jorne e la luno nokte?" questionis konjuristo Kaldeana a Persa astrologo.

    "La jornala suno esas indico por dinear,e la vesperala luno por supear" esis la respondo.

    "Ma pro quo la lunala lumo esas min forta kam ta di la suno?"

    "Se la du lumi esus egala, nulu savus la difero inter la jorno e la nokto, la homi abandonus su al amoro dure duadek e quar hori e mortus de exhauteso."

    Ica expliko provokis tante bruisoza aplaudo ke la konjuristo, qua intencis konfuzigar la Persa astrologo, cesis questionar e desaparis inter la gasti.

(Ek: La libro pri Esther)