Li venas, grasa e parnutrita

Sur voyi e stradi;

Li flugas, manjas la panpeceti --

Ne saturite li pose saltas

per flugi vagera

ad la balkoni platega por li.

An la fenestri di la vicino

sucede li venas,

li furetagegas, parazitesas --

Un del paseri, aventurema

adiras la bordo,

perchar sucesas ne sen hezito—

E pose yen ke lu pepiadas

per krio senfina

quan lu fortigas kom chefucelo;

Ceteri venas plu audacoze.

Li flugas trupope

ed omni perchas sur vua greto.

E vu joyegas pro ke li venas

Per salti sencesa,

sur sua pedi gracil e flava

por saturar su per friandaji –

emule furtante

la din buleti quin vu forjetis.

Se li remarkas plu dika peci

por bona repasto,

li interluktas pro jaluzeso.

La stroki pluvas per beko-frapi,

Li balde iracas

E shokas pluse per alo-frapi.

Ma, pruff, eventis lejera bruiso

Li omna flugeskas

livante kune frumenta pano!

La voyi balde furnisos a li

sen helpo homala

lo bezonata por lia vivo.

Yen! la uceli sen petra domo,

pro helpo deala

nultempe sucias la nutrivesaro

e sempre trovas la alimenti

sen semo, sen sparo

nam al Kreero li fidas sempre.